38मेको येसु आ खोइलीम बाक्शा ङाक्माक्त। मिनु आ प्रेक्कुम येसु आ खोइल जिप्पाइश्शा, आ चांमी फिक्गा बाक्त। मिनु आ खोइल पुक्पु पा मेको तेल ख्रेक्ता बाक्त।
39मिनु फरिसीमी मो पशो तशा “येसु परमप्रभु यावे आ लोव़ पाइब बाक्त हना, आ कली थीब मीश मुर दोदेंशो बाक्म, दे तुइक्त वा। मारदे हना पापी बाक्ब” दे मिम्ता बाक्त।
40मिनु येसुमी फरिसी कली “ए सिमोन, गो इ कली लोव़ का पाइनुङ” देंमाक्त। मिनु मेकोमी “शेंब, मार देंनीनी?” देंमेनु
41येसुमी “साइ होव़प का के जेर लाइक्ब मुर निक्शी बाक्सा बाक्त। कामी ५ सहे देनार जेर थुइश्शो बाक्माक्त। कामी ५० देनार जेर थुइश्शो बाक्माक्त। इस्राएल ङा क्येट देनार का नाक्त का ङा गाल्च बाक्त।