27येशूसे चु ताम सुङ्बान लमा म्हिला हुल न्हङग्याम क्रिङ्बान म्रिङम्हेमे गिकसे “ह्राङदा न्हसी ङ्हे ख्वाबा आमासे परमेश्वरग्याम मोलम याङ्बा मुला,” भिसी भिजी।
28तर येशूसे “जुन म्हिसे परमेश्वरला बचन ङ्यान्सी परमेश्वरसे कुल्बा अन्छार लला, थे म्हिसे परमेश्वरग्याम झन मोलम याङ्ला,” भिसी सुङ्जी।
29येशूला क्युर्नोन म्हिला हुल तमाहेन्से येशूसे थेनीगदेदा चुह्रङ् भिसी सुङ्जी, “एनीगदे दान्देला म्हिगदे खाह्रङ्बा नइबा म्हि! उदेकला चिनु जे म्हाइबा। तर योना अगमवक्ताला चिनु बाहेक अर्गु चिनु आउन।
30निनवे शहरला म्हिगदेला लागिरी योना चिनु तबा ह्रङ्नोन परमेश्वरसे पुइखबा म्हि दान्देला म्हिगदेला लागिरी चिनु हिन्ना।
31निसाफ लबा धुइरी ल्होग्याम खबा ग्लेस्यासे दान्देला म्हिगदेला दोष उन्ना, तिग्दा भिसम थे सोलोमन ग्लेला ज्ञान बुद्धिला ताम ङ्यान्बारी ल्हानान थारेङग्याम खबा मुबा। तर च्यागो, चुरी सोलोमन ग्ले भन्दा घ्रेन म्हि मुसैनोन थेला ताम आङ्यान्नी।