ܡܙܡܘܪ̈ܐ 139:1-21

¹ܝܵܐ ܡܵܪܝܵܐ، ܨܘܼܚܨܝܼܵܐ ܝܘܸܬ ܐܸܠܝܼ ܘܟܹܐ ܝܵܕܥܹܬ ܠܝܼ.

²ܐܲܢ݇ܬ ܟܹܐ ܝܵܕܥܹܬ ܝܬܵܒ݂ܬ‌ܝܼ ܘܩܝܵܡܬ‌ܝܼ، ܦܘܼܪܡܹܐ ܠܘܼܟ݂ ܚܘܼܫܵܒ݂ܝܼ ܡ̣ܢ ܪܸܚܩܵܐ.

³ܐܘܼܪܚܝܼ ܘܕܡܵܟ݂ܬ‌ܝܼ ܬܘܼܦ̮ܬܸܫ ܠܘܼܟ݂، ܘܟܠܵܝܗ‌ܝ ܐܘܼܪ̈ܚܵܬ‌ܝܼ ܟܹܐ ܝܵܕܥܹܬ.

⁴ܟܲܕ ܗܸܫ ܠܲܝܬ ܚܲܒܪܵܐ ܒܠܸܫܵܢܝܼ، ܗܵܐ ܐܲܢ݇ܬ، ܝܵܐ ܡܵܪܝܵܐ، ܟܹܐ ܝܵܕܥܹܬ ܠܹܗ ܟܠܹܗ.

⁵ܡ̣ܢ ܒܵܬܪܵܐ ܘܩܲܕܡܵܐ ܩܵܡ ܚܲܪܕܸܬ ܠܝܼ، ܘܩܵܡ ܡܲܬܒܸܬ ܐܝܼܕܘܼܟ݂ ܥܲܠܝܼ.

⁶ܥܓ̰ܝܼܒܬܵ‌ܐ ܝܠܵܗ̇ ܐܵܗܵܐ ܝܕܵܥܬܵ‌ܐ ܩܵܬ‌ܝܼ، ܥܸܠܸܠܔ ܝܼܠܵܗ̇ ܡ̣ܢ ܨܲܠܡܲܢܬ‌ܝܼ.

⁷ܠܐܲܝܟܵܐ ܐܵܙܹܠ݇ܢ ܡ̣ܢ ܪܘܼܚܘܼܟ݂، ܘܠܐܲܝܟܵܐ ܥܵܪܩܹܢ ܡ̣ܢ ܦܵܬܘܼܟ݂؟

⁸ܐܸܢ ܐܵܣܩܹܢ ܠܫܡܲܝܵܐ، ܬܵܡܵܐ ܝܘܸܬ ܐܲܢ݇ܬ، ܘܐܸܢ ܫܲܘܹܝܢ ܫܘܝܼܬ‌ܝܼ ܓܵܘ ܫܝܘܿܠܔ، ܗܵܐ، ܬܵܡܵܐ ܝܘܸܬ.

⁹ܐܸܢ ܫܵܩܠܹܢ ܓܘܼܠܦܵܢܹ̈ܐ ܕܨܸܡܚܵܐ، ܘܫܵܪܹܝܢ ܒܚܲܪܬܵ‌ܐ ܕܝܵܡܵܐ،

¹⁰ܐܘܼܦ ܬܵܡܵܐ ܐܝܼܕܘܼܟ݂ ܒܸܬ ܡܗܲܕܝܵܐ ܠܝܼ، ܘܝܲܡܝܼܢܘܼܟ݂ ܒܸܬ ܕܵܒ݂ܩܵܐ ܠܝܼ.

¹¹ܘܐܸܢ ܐܵܡܪܹܢ: ”ܒܫܪܵܪܵܐ، ܚܸܫܟܵܐ ܒܸܬ ܟܲܣܹܐ ܠܝܼ، ܘܒܲܗܪܵܐ ܕܥܲܠܝܼ ܒܸܬ ܗܵܘܹܐ ܠܲܝܠܹܐ،“

¹²ܐܘܼܦ ܚܸܫܟܵܐ ܠܹܐ ܝܠܹܗ ܚܸܫܟܵܢܵܐ ܐܸܠܘܼܟ݂، ܘܠܲܝܠܹܐ ܐܲܝܟ݂ ܐܝܼܡܵܡܵܐ ܟܹܐ ܒܲܗܪܸܢ، ܐܲܝܟ݂ ܚܸܫܟܵܐ، ܗܵܕܟ݂ܵܐ ܒܲܗܪܵܐ.

¹³ܒܗ̇ܝ ܕܐܲܢ݇ܬ ܒܪܹܐ ܠܘܼܟ݂ ܠܪܸܥܝܵܢܝܼ، ܩܵܡ ܙܵܩܪܹܬ ܠܝܼ ܒܒܲܛܢܵܐ ܕܝܸܡܝܼ.

¹⁴ܒܸܬ ܫܲܟܪܸܢܘܼܟ݂ ܒܗ̇ܝ ܕܣܲܗܡܵܢܵܐ ܘܥܓ̰ܝܼܒܵܐ ܦܝܼܫ ܠܝܼ ܥܒ݂ܝܼܕܵܐ، ܥܓ̰ܝܼܒܹ̈ܐ ܝܢܵܐ ܦܘܼܠܚܵܢܘܼ̈ܟ݂، ܘܓܵܢܝܼ ܨܦܵܝܝܼ ܟܹܐ ܝܵܕܥܵܐ.

¹⁵ܠܵܐ ܦܝܼܫ ܠܗܘܿܢ ܛܸܫܝܹܐ ܓܲܪ̈ܡܝܼ ܡܸܢܘܼܟ݂، ܟܲܕ ܦܝܼܫ ܠܝܼ ܥܒ݂ܝܼܕܵܐ ܒܣܸܬܵܪܵܐ، ܦܝܼܫ ܠܝܼ ܙܩܝܼܪܵܐ ܓܵܘ ܬܲܚ̈ܬܵܝܵܬܹ‌ܐ ܕܐܲܪܥܵܐ.

¹⁶ܚܙܹܐ ܠܗܘܿܢ ܥܲܝ̈ܢܘܼܟ݂ ܓܒ݂ܝܼܠܬ‌ܝܼ، ܘܓܵܘ ܟܬܵܒ݂ܘܼܟ݂ ܟܠܵܝܗ‌ܝ ܝܵܘܡܵܢܝܼ̈ ܦܝܼܫ ܠܗܘܿܢ ܟܬܝܼܒܹܐ، ܦܝܼܫ ܠܗܘܿܢ ܪܫܝܼܡܹܐ، ܟܲܕ ܠܲܝܬ ܗܘܵܐ ܐܘܼܦ ܚܲܕ ܡܸܢܵܝܗ‌ܝ.

¹⁷ܘܐܸܠܝܼ ܟܡܵܐ ܡܝܘܼܩܪܹ̈ܐ ܝܢܵܐ ܚܘܼܫܵܒ݂ܘܼ̈ܟ݂، ܝܵܐ ܐܲܠܵܗܵܐ، ܟܡܵܐ ܪܵܒܵܐ ܝܢܵܐ ܡܸܢܝܵܢܵܝ̈ܗ‌ܝ.

¹⁸ܐܸܢ ܡܵܢܹܢܗܘܿܢ ܒܘܼܫ ܒܸܬ ܙܵܝܕܝܼ ܡ̣ܢ ܣܹܠܵܐ، ܟܹܐ ܪܵܥܫܹܢ ܘܗܸܫ ܐܵܢܵܐ ܥܲܡܘܼܟ݂ ܝܼܘܸܢ.

¹⁹ܛܘܼܒ݂ܵܐ ܕܩܵܛܠܹܬ ܠܪ̈ܲܫܝܼܥܹܐ، ܝܵܐ ܐܲܠܵܗܵܐ، ܪܚܘܿܩܘܼܢ ܡܸܢܝܼ، ܝܵܐ ܫܲܦܟ݂ܵܢܹ̈ܐ ܕܕܸܡܹ̈ܐ.

²⁰ܟܹܐ ܗܲܡܙܸܡܝܼ ܒܘܼܬ ܕܝܼܘܼܟ݂ ܒܥܵܘܠܵܐ، ܕܸܫ̃ܡܸܢܘܼ̈ܟ݂ ܟܹܐ ܫܵܩܠܝܼ ܫܸܡܘܼܟ݂ ܒܣܪܝܼܩܘܼܬܵ‌ܐ.

²¹ܗܵܐ، ܠܹܐ ܣܵܢܹܝܢ ܠܣܵܢܝܵܢܘܼ̈ܟ݂، ܝܵܐ ܡܵܪܝܵܐ، ܘܠܹܐ ܓܲܢܓܸܙܸܢ ܡ̣ܢ ܩܵܝܡܵܢܹ̈ܐ ܕܕܲܠܩܘܼܒ݂ܠܘܼܟ݂؟