Psalm 139:1-21

¹David ana wela Bada orau u inanai ma au kaua anatapui u aramanei.

²U aramanei mara aiwai a kiala ma a vomairi. Avena au uama wate au nota e araramanei.

³E inainanaiu maranai a babara bo au numa a vivilauvitau. Anatapuna a kaukauei e araramanei.

⁴Muriai da ata babani tam e araramanei aiwai ana latoni.

⁵Tam e garigari-kwaipipiniu, ma uram virewapananei e paipainiu.

⁶Lamna riwa kauana, awariu i aii kaua ma i ḡe-dewadewa da kolau i kwauna-kauei.

⁷Mepa ana nae da Aruam ana raugovaḡei? Mepa ana ruba da ana raugovaḡem?

⁸Ata ḡae au mara da tam kampa; mepa da i ʼrairaḡei ai au dobu ata rauviraiu, tam kampa.

⁹Mepa da ana lave nae au maramatanei, bo mepa madeḡa e neneulai,

¹⁰avena kampa ma uram ina raveniu, ma am rewapana ina painiu.

¹¹Mepa da ana riwa, “Gimtona ina tereḡovaḡiu ma lalalaina ina gimtona.”

¹²Wate avena da gimtonana amapo eḡa ana raugovaḡem. Tam awarim gimtona ina rarana me marai, aubaina tam awarim gimtona ma lalalaina lamna tagogina.

¹³Tam tupuau anatapuna u voai da alou au manawana u teretagogieu.

¹⁴A viviegualauem aubaina tam am nuavainei ma am borumei u voa-kaueu! Am rauḡaroḡaro i aii, A voepaepaim aubaina a aramana-kauei.

¹⁵Tam u vivineneḡaneu maranai a tuputupua au govagovaḡana, alou au manawana, tam ainelam anatapuna u aramanei.

¹⁶Tam u inanaiu muriai da a tupua. Aupom biaḡa u vereu da ana mae lamna au buka u girumi, muriai da aupom naona i ḡotai.

¹⁷God! I piripiri guratana da am nota ana aramanei. Am nota kolau i kwauni, eḡa aiwai ḡelaunei am kaua ana aramanei.

¹⁸I maḡa guratana eḡa me bubu, iavana ana kauana-avei, avena da ata iava-pai, tau amapo da tam ana vivinuanainem.

¹⁹Oo God! A ḡoei da ḡoʼapoapoei ravai uta viraḡeni. Tauviraḡena uta viaḡaḡei da eḡa ina nei awariu.

²⁰Aubaina e vivijiboḡim, ma wavam eḡa ita vivivirei.

²¹Bada, rava e gedugeduaiem, tau ravai a gedugeduaiei. Taui eḡa ita voteletelem lamna aubaina taui au ḡavia.