Text copied!
CopyCompare
Buka Hope - Sam - Sam 139

Sam 139:1-21

Help us?
Click on verse(s) to share them!
1(Keke kinera te Devita) Kei Zihova, ele podekau Goi si rau, meke gilana valeana au Goi!
2Gilanau Goi totoso habotu, meke totoso turu si rau; pa seu tu koa Goi ba gilani Goi sari na qua binalabala.
3Be tavetavete, ba be zokoro si rau, ba dogoro au Goi, meke gilana betoi Goi sari doduru qua rinizu.
4Sipu lopu ele zama rau, ba ele gilania tu Goi gua sapu kote zama nia rau.
5Koa pa vari likohaequ rau si Goi, meke lavelave hukata nau Goi pa Mua ṉiniraṉira.
6Sa Mua ginilanaqu rau, si lohi sisigiti, lopu boka tumae nia rau si asa.
7Pavei si kaqu la rau pude govete Nigo si Goi? Pavei si kaqu va ilolo la si rau pude paere koa Goi?
8Be sage la si rau pa maṉauru, ba koa Mua vasina si Goi! Be eko puta si rau pa popoa tadi na tie matedi koa Mua tugo vasina si Goi.
9Be tapuru la si rau pa kalina la sa gasa rimata, babe koa si rau pa kalina la sa lodu rimata,
10ba koa Mua vasina si Goi pude turaṉau, meke koa Mua vasina si Goi pude toka nau.
11Be zama si rau, “Kaqu va paere au sa hinuporo, meke mani ta evaṉae huporo sa kalalasa pa vari likohaequ,” gua.
12Ba sa hinuporo si lopu huporo koa Goi. Meke sa boṉi meke sa rane si kalalasa beto mo koa Goi.
13Ele va tana va toṉoti Goi sari doduru kukuru tiniqu, ele varihodae valeana au Goi pa korapa tiana sa tinaqu.
14Vahesi Igo rau, sina garo pude ta pamaṉae si Goi. Sari doduru Mua tinavete si votikaedi hola, meke variva magasa. Gilana valeana au Goi si rau pa doduruna sa qua tinoa.
15Sipu ta varihodae valeana sari na susuriqu pa tiana sa tinaqu, meke sipu noma sage si rau pa vasina tomena, si ele gilanau tu Goi sapu koa si rau vasina.
16Sipu lopu ele podo rau, si ele dogorau tu Goi. Sari na ranena sa qua tinoa sapu poni nau Goi, si ele kubere betoi tu Goi pa Mua buka sipu lopu ele kamo si keke arini.
17Kei Tamasa, lopu boka tuma ni rau sari na Mua binalabala arilaedi, soku hola, lopu boka ta nae si arini.
18Be naei rau si arini, si soku hola ni rini sari na onone. Sipu vaṉunu rau, si korapa koa koa Goi si rau.
19Kei Tamasa, hiva hola nia rau si pude va mate pani Goi sari na tie kaleadi, meke sari na tie variva mate si madi taloa koa rau!
20Soku tiṉitoṉa kaleadi si zama ni rini koasa guguamu Agoi; zama va kaleania rini sa Pozamu Goi.
21Kei Zihova, kukiti hola ni rau saripu kukiti Nigo! Etulu pani rau saripu varipera atu koa Goi!

Read Sam 139Sam 139
Compare Sam 139:1-21Sam 139:1-21