يَبُرَ 119:42-176

⁴²نَ تّمُي، ﭑ نْمَ نّ ﭑ مَبٍرٍ مَ يَابِدٍ، بَرِ مَ ﭑ تَن لَشِ عِ شَ مَسٍنيِ رَ.

⁴³عِ نَشَ نْندِ مَسٍنيِ بَ ﭑ دّ عِ، بَرِ مَ ﭑ شَشِلِ تِشِ عِ شَ كِيتِ رَ.

⁴⁴ﭑ عِ شَ سّرِيّ رَبَتُمَ نّ عَبَدَن.

⁴⁵ﭑ لُمَ شْرّيَ نَن كُي، بَرِ مَ ﭑ نَ عِ سَفٌ نَن قٍنقٍ.

⁴⁶ﭑ عِ شَ مَسٍنيِ قَلَمَ نّ مَنفّيٍ بّ، ﭑ مُ قَمَ لُدٍ يَافِ كُي.

⁴⁷بِرَقٍ عِ شَ يَامَرِيٍ قْشْ رَ، نَ رَقَن ﭑ مَ.

⁴⁸ﭑ نَ ﭑ بّلّشّيٍ عِتٍمَ تَنتُي رَ عِ شَ يَامَرِيٍ شَ قٍ رَ، نَشٍيٍ رَقَن ﭑ مَ. ﭑ وَ مَ ﭑ حْشْ سَقٍ عِ شَ سّرِيّيٍ شْن مَ.

⁴⁹عِ شَ رَتُ عِ شَ مَسٍنيِ مَ، عِ نَشَن مَسٍن عِ شَ كٌنيِ دِ بّ، نَشَن شَشِلِ سَ قِمَ ﭑ مَ يَرٍ.

⁵⁰ﭑ مَدُندُ مَ ﭑ مَ تْورّ كُي عِ شَ لَايِدِ نَن سَابُي رَ.

⁵¹يّتّ عِفبٌي ﭑ مَيٍلٍمَ نّ، كْنْ ﭑ مُ عِ شَ سّرِيّ كِرَ بّحِنمَ.

⁵²عَلَتَلَ، ﭑ تٌ ﭑ نَتُ عِ شَ كِيتِ تِنشِنشِيٍ مَ عِ نَشَن سَشِ تّمُي دَنفِشِ، ﭑ بْحّ لِمَنِيَمَ نّ.

⁵³ﭑ بْحّ تٍشِ عَ حَاشِ رَ تِنشِنتَرٍيٍ شِلِ مَ نَشٍيٍ عِ شَ سّرِيّ رَبٌلٌمَ.

⁵⁴ﭑ سَبَتِ دّدّ، ﭑ بّيتِ بَمَ نّ عِ شَ يَامَرِيٍ شَ قٍ رَ.

⁵⁵كْي رَ ﭑ نَ ﭑ نَتُمَ نّ عِ شِلِ مَ. عَلَتَلَ، ﭑ قَمَ نّ عِ شَ سّرِيّيٍ رَتِنمّدٍ.

⁵⁶ﭑ دَرِشِ عِ سَفٌ رَبَتُقٍ نَن نَ.

⁵⁷عَلَتَلَ، عِ تِدٍ فبٌ ﭑ بّ. ﭑ بَرَ لَايِدِ تٌنفٌ عِ شَ مَسٍنيِ رَبَتُقٍ رَ.

⁵⁸ﭑ وَ مَ لُقٍ عِ سّيتِ مَ ﭑ بْحّ بِرِن نَ. هِننّ ﭑ نَ عَلْ عِ عَ مَسٍن كِ نَشّ.

⁵⁹ﭑ تٌ ﭑ حّرّ كِ مَتٌ، ﭑ بَرَ فبِلٍن عِ شَ مَسٍنيِ مَ.

⁶⁰ﭑ فبَتَمَ نّ، ﭑ مُ دُفُندِ مَ عِ شَ يَامَرِيٍ رَبَتُقٍ رَ.

⁶¹هَلِ مِشِ حَاشِيٍ كَنكَن ﭑ مَ، ﭑ مُ نّيمُمَ عِ شَ سّرِيّيٍ مَ.

⁶²كْي تَفِ، ﭑ كٍلِمَ نّ، ﭑ عِ مَتْشْ عِ شَ كِيتِ تِنشِنشِ شَ قٍ رَ.

⁶³عِ يَرَفَاشُي بِرِن قِندِشِ ﭑ حّرّبٌورٍ نَن نَ، نُن نَشٍيٍ عِ سَفٌ رَبَتُمَ.

⁶⁴عَلَتَلَ عِ شَ شَنُنتٍيَ نَ دُنِحَ بِرِن مَ، ﭑ شَرَن عِ شَ يَامَرِيٍ رَ.

⁶⁵عَلَتَلَ، عِ بَرَ قٍ قَنيِ رَبَ ﭑ تَن عِ شَ كٌنيِ بّ، عَلْ عِ عَ لَايِدِشِ كِ نَشّ.

⁶⁶ﭑ شَرَن قٍ تَفِ رَ سَدٍ نُن قٍ كٌلٌنيِ رَ، بَرِ مَ ﭑ لَشِ عِ شَ يَامَرِيٍ رَ.

⁶⁷ﭑ نُ بَرَ لْي بٍيمَنُ عِ شَ ﭑ مَ قٍ مَفٌرٌ، كْنْ يَكْسِ قَ ﭑ نَ عِ شَ مَسٍنيِ نَن نَبَتُقٍ.

⁶⁸عِ قَن، عِ قٍ قَنيِ رَبَمَ، ﭑ شَرَن عِ شَ يَامَرِيٍ رَ.

⁶⁹هَلِ يّتّ عِفبٌي وُلٍ سَمَ ﭑ شُن، ﭑ عِ شَ يَامَرِيٍ رَبَتُمَ نّ ﭑ بْحّ بِرِن نَ.

⁷⁰عٍ بْحّ شْرْشْ عَلْ فّمّ، كْنْ عِ شَ سّرِيّ حْشُن ﭑ بّ.

⁷¹ﭑ مَ تْورّ بَرَ ﭑ مَلِ عِ شَ يَامَرِيٍ كٌلٌنقٍ رَ.

⁷²عِ شَ مَسٍنيِ قَن ﭑ بّ شّيمَ نُن فبٍتِ رَ.

⁷³عِ تَن نَن ﭑ دَاشِ، عِ تَن نَن ﭑ نَقَلَشِ عِ شْنيّ رَ. قَهَامُي قِ ﭑ مَ عِ شَ يَامَرِيٍ كٌلٌنقٍ رَ.

⁷⁴عِ يَرَفَاشُييٍ شَ سّيوَ ﭑ تٌقٍ رَ، بَرِ مَ ﭑ شَشِلِ تِشِ عِ شَ مَسٍنيِ رَ.

⁷⁵عَلَتَلَ، ﭑ عَ كٌلٌن عِ شَ كِيتِ تِنشِنشِ رَ، ﭑ عَ كٌلٌن عِ ﭑ مَ قٍ مَفٌرٌشِ شَنُنتٍيَ نَن مَ.

⁷⁶يَندِ، عِ شَ شَنُنتٍيَ شَ ﭑ مَدُندُ، عَلْ عِ عَ لَايِدِ ﭑ تَن، عِ شَ كٌنيِ بّ كِ نَشّ.

⁷⁷عِ شَ كِنِكِنِ ﭑ مَ عَلَكٌ ﭑ شَ كِسِ، بَرِ مَ عِ شَ سّرِيّ رَقَن ﭑ مَ.

⁷⁸يّتّ عِفبٌي شَ يَافِ سْتْ، بَرِ مَ ﭑ مُ قٍ يٌ رَبَشِ عٍ رَ عٍ ﭑ تْورْ مَ نَشَن مَ. ﭑ تَن حْشْ سَمَ عِ سَفٌ نَن شْن مَ.

⁷⁹عِ يَرَفَاشُييٍ شَ فبِلٍن ﭑ مَ، عَ نُن نَشٍيٍ عِ شَ مَسٍنيِ كٌلٌن.

⁸⁰ﭑ بْحّ شَ عِ شَ يَامَرِيٍ سُشُ، عَلَكٌ يَافِ نَشَ قَ دُ سُ ﭑ شُن نَ.

⁸¹عَ شْلِ ﭑ مَ ﭑ شَ عِ شَ كِسِ سْتْ، كْنْ ﭑ شَشِلِ تِشِ عِ شَ مَسٍنيِ نَن نَ.

⁸²ﭑ عِ شَ لَايِدِ رَكَمَلِشِ مَمّقٍ. ﭑ عَ قَلَمَ ﭑ بْحّ كُي، «عِ ﭑ مَدُندُ مَ مُن تّمُي؟»

⁸³ﭑ لُشِ عَلْ كُندِ نَشَن نَ رَشَرَقٍ، كْنْ ﭑ مُ نّيمُمَ عِ شَ يَامَرِيٍ رَ.

⁸⁴ﭑ شَ مَمّ تِ هَن مُن تّمُي، بٍينُن عِ شَ ﭑ يَشُييٍ حَشَنكَتَ؟

⁸⁵يّتّ عِفبٌي فَنتَنيِ تِمَ ﭑ يَ رَ. سّرِيّ مُ نَ كِ.

⁸⁶عِ شَ يَامَرِ بِرِن تِنشِن. ﭑ نَتَنفَ تْوحّفّ مَ.

⁸⁷عَ فبٍ مُ لُشِ عٍ شَ ﭑ مَ قٍ كَنَ، كْنْ ﭑ تٌندِ نّ عِ شَ يَامَرِيٍ رَبٌلٌدٍ.

⁸⁸ﭑ نَكِسِ عِ شَ شَنُنتٍيَ رَ، عَلَكٌ ﭑ شَ عِ شَ مَسٍنيِ سُشُ.

⁸⁹عَلَتَلَ، عِ شَ مَسٍنيِ نَ كٌورٍ مَ عَبَدَن.

⁹⁰عِ شَ شَنُنتٍيَ بُمَ نّ كٍلِقٍ تٌ بْنسْي مَ هَن بْنسْي نَشٍيٍ سَ قَمَ. عِ دُنِحَ شَنشِ نَن دَا.

⁹¹عِ شَ سّرِيّ بُمَ هَن تٌ، بِرِن نَ عِ شَ مَنفّيَ نَن بُن مَ.

⁹²شَ ﭑ مُ سّيوَ عِ شَ سّرِيّ رَ نُ، ﭑ بَرَ بْنْ ﭑ مَ تْورّ كُي نُ.

⁹³ﭑ مُ نّيمُمَ عِ شَ مَسٍنيِ رَ قٍوٌ، بَرِ مَ عِ ﭑ كِسِشِ عٍ تَن نَن سَابُي رَ.

⁹⁴ﭑ بَرَ ﭑ يّتّ قِ عِ مَ، ﭑ نَكِسِ. ﭑ تِنمَ عِ سَفٌ سُشُقٍ رَ.

⁹⁵مِشِ حَاشِيٍ وَ مَ ﭑ قَشَقٍ، كْنْ ﭑ تَن حْشْ سَشِ عِ شَ مَسٍنيِ شْن مَ.

⁹⁶ﭑ عَ كٌلٌن دُنِحَ قٍ بِرِن حْنمَ نّ، كْنْ عِ شَ سّرِيّ مُ كَنَمَ عَبَدَن.

⁹⁷عِ شَ سّرِيّ رَقَن ﭑ مَ. ﭑ نَ ﭑ حْشْ سَشِ عَ شْن مَ كُدّ.

⁹⁸عِ شَ يَامَرِيٍ ﭑ قِندِ مَ قَهَامُلَ نَن نَ دَنفِ ﭑ يَشُييٍ رَ، بَرِ مَ عٍ نَ ﭑ بْحّ كُي تّمُي بِرِن.

⁹⁹ﭑ شَشِلِ قَن ﭑ كَرَ مْشْيٍ شَشِلِ بّ، بَرِ مَ ﭑ نَ ﭑ حْشْ سَشِ عِ شَ مَسٍنيِ نَن شْن مَ.

¹⁰⁰ﭑ قٍ كٌلٌن دَنفِقٍ قٌرِيٍ رَ، بَرِ مَ ﭑ عِ سَفٌ رَبَتُشِ.

¹⁰¹ﭑ بَرَ ﭑ سَنيِ بَ كِرَ حَاشِيٍ شْن مَ، ﭑ شَ بِرَ عِ شَ مَسٍنيِ قْشْ رَ.

¹⁰²ﭑ مُ عِ شَ سّرِيّ بّحِن، بَرِ مَ عِ تَن نَن يَتِ ﭑ شَرَن نَ رَ.

¹⁰³عِ شَ مَسٍنيِ حْشُن ﭑ دّ كُي دَنفِ كُمِ رَ.

¹⁰⁴ﭑ شَشِلِ قَنيِ سْتْ عِ سَفٌ نَن نَ. نَ كُي ﭑ بَرَ كِرَ حَاشِيٍ تَن شْن.

¹⁰⁵عِ شَ مَسٍنيِ قِندِشِ لَنثُي نَن نَ ﭑ سَن تِدٍ، عَ قِندِ نَءِيَلَنيِ رَ ﭑ مَ كِرَ شْن مَ.

¹⁰⁶ﭑ بَرَ لَايِدِ تٌنفٌ نَشَن مُ كَنَمَ، ﭑ قَمَ نّ بِرَدٍ عِ شَ سّرِيّ تِنشِنشِ قْشْ رَ.

¹⁰⁷ﭑ بَرَ تْورْ عَ فبٍ رَ. عَلَتَلَ، ﭑ نَكِسِ عِ شَ مَسٍنيِ رَ.

¹⁰⁸عَلَتَلَ، ﭑ بَرَ عِ مَشَندِ، عِ شَ ﭑ مَ مَتْشْي سُشُ سّرّشّ رَ، عِ شَ ﭑ شَرَن عِ سَفٌ رَ.

¹⁰⁹ﭑ نِي نَ قَشّ يَ عِ تّمُي بِرِن، كْنْ ﭑ مُ نّيمُمَ عِ شَ سّرِيّ مَ.

¹¹⁰مِشِ حَاشِيٍ فَنتَنيِ تٍمَ ﭑ بّ، كْنْ ﭑ مُ ﭑ مَكُيَمَ عِ سَفٌ رَ.

¹¹¹عِ شَ مَسٍنيِ قِندِشِ ﭑ كّ نَن نَ عَبَدَن، عَ ﭑ بْحّ رَ سّيوَ مَ نّ.

¹¹²ﭑ بْحّ بِرَ مَ نّ عِ شَ يَامَرِيٍ قْشْ رَ عَبَدَن.

¹¹³ﭑ قِلَنكَقُي شْنمَ، كْنْ عِ شَ سّرِيّ رَقَن ﭑ مَ.

¹¹⁴ﭑ كَنتَرِ نُن ﭑ مَكَنتَمَ نَ عِ تَن نَن نَ، ﭑ شَشِلِ تِشِ عِ شَ مَسٍنيِ رَ.

¹¹⁵وٌ وٌ مَسِفَ ﭑ نَ، وٌ تَن مِشِ كٌبِيٍ، عَلَكٌ ﭑ شَ عَلَ شَ يَامَرِيٍ رَتِنمّ.

¹¹⁶ﭑ دّ مّن عَلْ عِ عَ لَايِدِ كِ نَشّ، عَلَكٌ ﭑ شَ كِسِ. عِ نَشَ قٍ كَنَ ﭑ شَشِلِ تِشِ نَشَن نَ.

¹¹⁷عِ شَ تِ ﭑ قَنفَ رَ، عَلَكٌ ﭑ شَ كِسِ. ﭑ يَ تِشِ عِ شَ يَامَرِيٍ رَ.

¹¹⁸عِ شَ تٌندِ مِشِيٍ رَ نَشٍيٍ عٍ مَكُيَمَ عِ شَ سّرِيّ رَ، بَرِ مَ مَدَشُحَ نُن وُلٍ نَ عٍ شَ قٍ بِرِن كُي.

¹¹⁹عِ مِشِ كٌبِيٍ حْنمَ نّ يِ دُنِحَ مَ، عَلْ شَبُي فبٍتِ فبِ بَمَ كِ نَشّ. نَ نَن عَ رَ عِ شَ مَسٍنيِ رَقَن ﭑ مَ.

¹²⁰ﭑ قَتٍ سّرّنمَ عِ شَ مَفَاشُي رَ، ﭑ هَنمّشِ عِ شَ كِيتِ رَ.

¹²¹ﭑ وَلِمَ نْندِ نُن تِنشِنيِ نَن نَ. عِ نَشَ ﭑ لُ ﭑ يَشُييٍ يِ رَ.

¹²²عِ شَ ﭑ مَ قٍ سْونّيَ عِ سّنبّ رَ، عِ نَشَ لُ يّتّ عِفبٌي شَ نْ ﭑ نَ.

¹²³ﭑ يَ تِشِ عِ شَ كِسِ رَ تّمُي بِرِن، عَ نُن عِ شَ مَسٍنيِ تِنشِنشِ.

¹²⁴هِننّ عِ شَ كٌنيِ رَ عِ شَ شَنُنتٍيَ كُي. ﭑ شَرَن عِ شَ يَامَرِيٍ رَ.

¹²⁵قَهَامُي قِ ﭑ تَن، عِ شَ كٌنيِ مَ، عَلَكٌ ﭑ شَ عِ شَ مَسٍنيِ كُي كٌلٌن.

¹²⁶مِشِيٍ نَ عِ شَ سّرِيّ مَتَندِقٍ. عَلَتَلَ، عَ لَنمَ عِ شَ تِ عٍ يَ رَ يَكْسِ.

¹²⁷عِ شَ يَامَرِيٍ رَقَنشِ ﭑ مَ دَنفِقٍ شّيمَ قَنيِ رَ،

¹²⁸ﭑ تٌ عَ مَحْشُن عِ سَفٌ تِنشِن، ﭑ كِرَ بِرِن شْنمَ نّ نَشَن مُ قِندِ نْندِ رَ.

¹²⁹عِ شَ مَسٍنيِ ﭑ دّ عِشَرَ مَ، ﭑ عَ رَبَتُمَ نَ نَن مَ.

¹³⁰عِ شَ مَسٍنيِ كُي مَتٌقٍ، عَ شَشِلِ قِمَ نّ شَشِلِتَرٍيٍ مَ.

¹³¹عَ نَ ﭑ نِي رَ ﭑ شَ عِ سَفٌ كٌلٌن.

¹³²عِ يَ رَقِندِ ﭑ مَ، عِ شَ هِننّ ﭑ نَ، عَلْ عِ دَرِشِ عَ رَبَ رَ كِ نَشّ عِ شَنُنتٍنيِيٍ بّ.

¹³³عِ شَ ﭑ تِ عِ شَ مَسٍنيِ قَرِ، عِ نَشَ لُ قٍ حَاشِ يٌ شَ نْ ﭑ نَ.

¹³⁴ﭑ بَ عَدَ مَدِيٍ شَ نْي بُن مَ، عَلَكٌ ﭑ شَ عِ شَ يَامَرِيٍ رَتِنمّ.

¹³⁵عِ يَتَفِ نْرّ رَيَنبَ عِ شَ كٌنيِ مَ، عِ شَ ﭑ شَرَن عِ شَ يَامَرِيٍ رَ.

¹³⁶ﭑ لُمَ وَ رَ عَ فبٍ رَ، بَرِ مَ ﭑ عَ كٌلٌن مِشِيٍ مُ عِ شَ سّرِيّ رَتِنمّمَ.

¹³⁷عَلَتَلَ عِ تِنشِن، عِ شَ كِيتِيٍ قَن تِنشِن.

¹³⁸عِ شَ مَسٍنيِ تِنشِن، عَ مَن قِندِشِ نْندِ يَتِ نَن نَ.

¹³⁹ﭑ بْحّ رَحَاشُمَ نّ ﭑ مَ، بَرِ مَ ﭑ يَشُييٍ مُ عٍ تُلِ مَتِمَ عِ شَ مَسٍنيِ رَ.

¹⁴⁰عِ شَ مَسٍنيِ بَرَ عَ يّتّ شَ نْندِ مَسٍن، عَ رَقَن ﭑ تَن عِ شَ كٌنيِ مَ.

¹⁴¹هَلِ ﭑ شُرُن، مِشِيٍ يٌمَ ﭑ مَ، ﭑ مُ نّيمُمَ عِ سَفٌ مَ.

¹⁴²عِ شَ تِنشِنيِ بُمَ عَبَدَن. عِ شَ سّرِيّ نْندِ نَ عَ رَ.

¹⁴³سُننُنيِ نُن تْورّ ﭑ سُشُشِ، كْنْ عِ شَ يَامَرِيٍ نْشُن ﭑ بّ.

¹⁴⁴عِ شَ سّرِيّيٍ تِنشِن عَبَدَن. قَهَامُي قِ ﭑ مَ عَلَكٌ ﭑ شَ كِسِ.

¹⁴⁵عَلَتَلَ، ﭑ نَ ﭑ دّ رَوَقٍ عِ بّ ﭑ بْحّ بِرِن نَ. ﭑ يَابِ، عَلَكٌ ﭑ شَ نْ عِ شَ يَامَرِيٍ رَتِنمّدٍ.

¹⁴⁶ﭑ نَ ﭑ دّ رَوَقٍ عِ بّ. ﭑ نَكِسِ، عَلَكٌ ﭑ شَ نْ عِ سَفٌ رَبَدٍ.

¹⁴⁷ﭑ كٍلِمَ بٍيمَنُ سُبَشّ شَ عَ لِ، ﭑ عِ مَشَندِ عِ شَ ﭑ دّ مّن. ﭑ شَشِلِ تِشِ عِ شَ مَسٍنيِ نَن نَ.

¹⁴⁸ﭑ مُ شِمَ كْي رَ، ﭑ نَ ﭑ مَحْشُنمَ عِ شَ مَسٍنيِ نَن تُن مَ.

¹⁴⁹عِ عِ تُلِ مَتِ ﭑ شُي رَ عِ شَ شَنُنتٍيَ شَ قٍ رَ. عَلَتَلَ، ﭑ نَكِسِ عِ شَ كِيتِ بّرّ رَ.

¹⁵⁰مِشِيٍ بَرَ مَسٌ ﭑ نَ، نَشٍيٍ وَ مَ قٍ حَاشِيٍ شْن. عٍ مَكُيَ عِ شَ سّرِيّ رَ.

¹⁵¹كْنْ عِ تَن عَلَتَلَ، عِ مَكْرّ ﭑ نَ، عِ شَ يَامَرِيٍ قِندِشِ نْندِ نَن نَ.

¹⁵²ﭑ عَ كٌلٌن كَبِ عَ رَكُيَ، عِ بَرَ عِ شَ مَسٍنيِ مَبَنبَن عَلَكٌ عَ شَ بُ عَبَدَن.

¹⁵³ﭑ مَ تْورّ مَتٌ، عِ شَ ﭑ نَكِسِ، بَرِ مَ ﭑ مُ نّيمُشِ عِ شَ سّرِيّ مَ.

¹⁵⁴عِ شَ ﭑ شُن مَقَلَ، عِ شَ ﭑ شُن سَرَ. ﭑ نَكِسِ عَلْ عِ عَ لَايِدِ كِ نَشّ.

¹⁵⁵كِسِ مَكُيَ مِشِ حَاشِيٍ رَ، بَرِ مَ عٍ مُ بِرَ مَ عِ شَ يَامَرِيٍ قْشْ رَ.

¹⁵⁶عَلَتَلَ، عِ شَ كِنِكِنِ فبٌ. ﭑ نَكِسِ عِ شَ كِيتِ بّرّ رَ.

¹⁵⁷ﭑ فٍرٍقَيٍ وُيَ، كْنْ ﭑ مُ فبِلٍن عِ سَفٌ قْشْ رَ.

¹⁵⁸عِ يَنقَمَيٍ تٌقٍ رَحَاشُ ﭑ مَ، بَرِ مَ عٍ مُ عِ شَ مَسٍنيِ سُشُمَ.

¹⁵⁹عَ مَتٌ، عِ شَ يَامَرِيٍ رَقَن ﭑ مَ. عَلَتَلَ، ﭑ نَكِسِ عِ شَ شَنُنتٍيَ شَ قٍ رَ.

¹⁶⁰عِ شَ مَسٍنيِ نْندِ نَ عَ رَ، عِ شَ كِيتِ تِنشِنشِ بُمَ نّ عَبَدَن.

¹⁶¹مَنفّيٍ ﭑ تْورْ مَ هَلِ ﭑ مُ قٍ حَاشِ يٌ رَبَشِ عٍ رَ، كْنْ ﭑ فَاشُمَ عِ شَ مَسٍنيِ يَ رَ ﭑ بْحّ بِرِن نَ.

¹⁶²ﭑ سّيوَشِ عِ شَ لَايِدِ رَ، عَلْ مِشِ نَشَن فٍينِ شُنفبٍ سْتْشِ.

¹⁶³ﭑ وُلٍ شْنشِ، عَ رَحَاشُ ﭑ مَ، كْنْ عِ شَ سّرِيّ ﭑ شَنُنتٍنيِ نَ عَ رَ.

¹⁶⁴ﭑ عِ مَتْشْمَ سَنمَيَ سٌلٌقٍرٍ لْشْ يٌ لْشْ عِ شَ كِيتِ تِنشِنشِ شَ قٍ رَ.

¹⁶⁵بْحّسَ فبٍفبٍ نَن نَ مِشِيٍ بّ، عِ شَ سّرِيّ رَقَنشِ نَشٍيٍ مَ. قٍقٍ مُ عٍ رَبِرَ مَ.

¹⁶⁶عَلَتَلَ، ﭑ شَشِلِ تِشِ عِ شَ كِسِ رَ، ﭑ بِرَ مَ نّ عِ شَ يَامَرِيٍ قْشْ رَ.

¹⁶⁷ﭑ عِ شَ مَسٍنيِ سُشُمَ نّ، بَرِ مَ عٍ رَقَن ﭑ مَ كِ قَنيِ رَ.

¹⁶⁸ﭑ بِرَ مَ نّ عِ سَفٌ نُن عِ شَ مَسٍنيِ قْشْ رَ. عِ ﭑ حّرّ كِ بِرِن كٌلٌن.

¹⁶⁹عَلَتَلَ، عِ شَ ﭑ مَ دُبَ سُشُ. قَهَامُي قِ ﭑ مَ عِ شَ مَسٍنيِ سَابُي رَ.

¹⁷⁰ﭑ مَ مَشَندِ شَ عِ لِ. ﭑ نَكِسِ عَلْ عِ عَ لَايِدِ كِ نَشّ.

¹⁷¹عِ مَتْشْي شَ مِنِ ﭑ دّ عِ، بَرِ مَ عِ ﭑ شَرَنقٍ عِ شَ يَامَرِيٍ نَن نَ.

¹⁷²ﭑ دّ شَ بّيتِ ندٍ بَ عِ شَ مَسٍنيِ شَ قٍ رَ، بَرِ مَ عِ شَ يَامَرِيٍ بِرِن تِنشِن.

¹⁷³عِ شَ قَ ﭑ دّ مّن، بَرِ مَ ﭑ عِ سَفٌ نَن سُفَندِشِ.

¹⁷⁴عَلَتَلَ، ﭑ نِي نَ عِ شَ كِسِ مَ، عِ شَ سّرِيّ ﭑ نَسّيوَ مَ نّ.

¹⁷⁵عِ شَ ﭑ نَكِسِ عَلَكٌ ﭑ شَ نْ عِ مَتْشْدٍ. عِ شَ كِيتِيٍ شَ ﭑ دّ مّن.

¹⁷⁶ﭑ نَبّحِنشِ نّ عَلْ يّشّ لْيشِ. عِ شَ ﭑ تَن عِ شَ كٌنيِ قٍن، بَرِ مَ ﭑ مُ نّيمُشِ عِ شَ يَامَرِيٍ مَ.