يٌسُوٍ 10:4-25

⁴«وٌ تٍ ﭑ يِرٍ، وٌ شَ قَ كَقُ ﭑ مَ عَلَكٌ وٌن شَ فَبَيٌن فٍرٍ، بَرِ مَ عٍ تَن نُن يٌسُوٍ نُن عِسِرَيِلَكَيٍ بَرَ لَنيِ شِرِ.»

⁵يِ عَمٌرِ مَنفّ سُولِيٍ؛ دَرِ سَلَمُ مَنفّ، شٍبِرٌن مَنفّ، يَرَ مُتِ مَنفّ، لَكِسِ مَنفّ، نُن عٍفِلٌن مَنفّ نَشَ تٍ نُن عٍ شَ سْورِيٍ رَ. عٍ نَشَ عٍ شَ يٌنكِندٍ يَءِلَن فَبَيٌن يَ رَ، عٍ قَ فٍرٍ تِ عٍ بّ.

⁶فَبَيٌنكَيٍ نَشَ شّيرَ شّي عِسِرَيِلَكَيٍ شَ يٌنكِندٍ فِلِفَلِ، عٍ شَ سَ عَ قَلَ يٌسُوٍ بّ، «عِ نَشَ عِ شَ كٌنيِيٍ رَبّحِن. عِ شَ تٍ مُشُ يِرٍ مَقُرٍن. عِ شَ مُشُ رَتَنفَ عَمٌرِ مَنفّيٍ مَ، نَشٍيٍ سَبَتِشِ فٍيَ يِرٍ، عٍ وَ مَ مُشُ فٍرٍقٍ.»

⁷يٌسُوٍ نُن عَ شَ سْورِ حَلَمَيٍ نَشَ كٍلِ فِلِفَلِ، عٍ سِفَ فَبَيٌن.

⁸عَلَتَلَ نَشَ عَ مَسٍن يٌسُوٍ بّ، «عِ نَشَ فَاشُ عٍ يَ رَ، بَرِ مَ ﭑ بَرَ فّ عٍ سَدٍ عِ بّلّشّ. مِشِ كٍرٍن مُ نْمَ تِدٍ عِ يَ رَ عٍ يَ مَ.»

⁹نَ كُي يٌسُوٍ نُن عَ شَ مِشِيٍ نَشَ كٍلِ فِلِفَلِ، عٍ حّرّ كْي رَ، عَلَكٌ عٍ شَ سِن عَمٌرِكَيٍ شُن مَ تّرّننَ رَ.

¹⁰عَلَتَلَ نَشَ عَمٌرِكَيٍ كٍرِ عِسِرَيِلَ يَ رَ، عَ قَ نْ عٍ رَ سّنبّ رَ فَبَيٌن. عِسِرَيِلَكَيٍ نَشَ بِرَ عٍ قْشْ رَ كِرَ شْن نَشَن تٍمَ بٍتِ شٌرٌن، عٍ نَشَ عٍ بْنبْ هَن عَسٍكَ نُن مَكٍدَ.

¹¹عٍ تٌ نُ عٍ فِمَ عِسِرَيِلَكَيٍ يَ رَ فٌرٌقٍ بٍتِ شٌرٌن كِرَ شْن، عَلَتَلَ نَشَ بَلَبَلَنيِ شْرِ بٍلٍبٍلٍ رَفٌرٌ عٍ مَ كٍلِ كٌورٍ مَ، هَن عٍ سَ عَسٍكَ لِ. نَ بَلَبَلَنيِ شَ مِشِ قَشَشِيٍ دَنفِ مِشِيٍ رَ، عِسِرَيِلَكَيٍ نَشٍيٍ قَشَ عٍ شَ سَنتِدّفّمَ رَ.

¹²عَلَتَلَ نُ عَمٌرِكَيٍ سَقٍ عِسِرَيِلَ بّلّشّ تّمُي نَشّ، يٌسُوٍ نُ بَرَ عَلَتَلَ مَشَندِ عِسِرَيِلَكَيٍ يَ شْرِ عَ شَ سٌفٍ رَشَرَ فَبَيٌن شُن، عَ شَ كِكٍ رَشَرَ عَيَلٌن فُلُنبَ شُن.

¹³سٌفٍ نُن كِكٍ نَشَ عٍ رَشَرَ، هَن عِسِرَيِلَ نَشَ فّ عٍ وَشْنيِ رَبَدٍ عٍ يَشُييٍ رَ. يِ قٍ سّبّشِ يَسَرِ شَ بُكِ كُي. سٌفٍ نَشَ عَ رَشَرَ كٌورٍ تَفِ، سٌفٍ مُ فبَتَ دُلَدٍ قّيحّن كٍرٍن كُي.

¹⁴هَن تٌ نَ قٍ مْولِ مُ تٌشِ دُنِحَ. عَلَتَلَ نُ بَرَ يٌسُوٍ شَ مَشَندِ سُشُ، عَ نُ نَ فٍرٍ سٌقٍ عِسِرَيِلَ بّ.

¹⁵نَ تّمُي يٌسُوٍ نُن عَ شَ سْورِيٍ نَشَ فبِلٍن عٍ شَ يٌنكِندٍ فِلِفَلِ.

¹⁶نَ مَنفّ سُولِيٍ عٍ فِ نّ، عٍ سَ عٍ نْشُن مَكٍدَ قْنمّ رَ.

¹⁷مِشِ ندٍ نَشَ عَ قَلَ يٌسُوٍ بّ، «نَ مَنفّ سُولِيٍ نَ عٍ نْشُنقٍ مَكٍدَ قْنمّ كُي.»

¹⁸يٌسُوٍ نَشَ يَامَرِ قِ، «وٌ فّمّ بٍلٍبٍلٍيٍ مَيِندِفِلِن نَ قْنمّ دّ مَ، وٌ سْورِ ندٍيٍ تِ نَا.

¹⁹وٌ تَن دْنشْييٍ، وٌ نَشَ دُفُندِ، وٌ شَ بِرَ وٌ يَشُييٍ قْشْ رَ، وٌ قَ كِرَ بٌلٌن عٍ يَ رَ، عَلَكٌ عٍ نَشَ نْ عٍ شْنيِ مَسْتْدٍ، بَرِ مَ وٌ مَرِفِ عَلَتَلَ بَرَ عٍ سَ وٌ بّلّشّ.»

²⁰نَ كُي يٌسُوٍ نُن عَ شَ سْورِيٍٍ نَشَ نْ عَمٌرِكَيٍ رَ، قٌ مِشِ كٍرٍن كٍرٍنيِ نَشٍيٍ عٍ فِ، عٍ سَ عٍ شَ تَا مَكَنتَشِيٍ مَسْتْ.

²¹عِسِرَيِلَ شَ سْورِيٍ بِرِن نَشَ فبِلٍن بْحّسَ كُي يٌسُوٍ يِرٍ مَكٍدَ يٌنكِندٍ كُي. مِشِ يٌ مُ نْ عٍ رَ.

²²نَ تّمُي يٌسُوٍ نَشَ عَ قَلَ، «وٌ يِ فّمّيٍ بَ قْنمّ دّ مَ، وٌ شَ يِ مَنفّ سُولِيٍ رَ مِنِ.»

²³عٍ نَشَ نَ مِشِ سُولِ رَ مِنِ؛ دَرِ سَلَمُ مَنفّ، شٍبِرٌن مَنفّ، يَرَ مُتِ مَنفّ، لَكِسِ مَنفّ، نُن عٍفِلٌن مَنفّ.

²⁴عٍ تٌ يِ مَنفّيٍ رَ مِنِ يٌسُوٍ مَ، يٌسُوٍ نَشَ عِسِرَيِلَ سْورِيٍ بِرِن شِلِ، عَ عَ قَلَ عٍ شَ يَرٍرَتِيٍ بّ، «وٌ وٌ مَسٌ، وٌ شَ وٌ سَنيِ تِ يِ مَنفّيٍ كْنيِيٍ مَ.» عٍ نَشَ عٍ مَسٌ، عٍ عٍ سَنيِ تِ عٍ كْنيِيٍ مَ.

²⁵يٌسُوٍ نَشَ عَ قَلَ عٍ بّ، «وٌ نَشَ فَاشُ، وٌ بْحّ نَشَ مِنِ عَ عِ. وٌ وٌ سّنبّ سٌ، وٌ مَن شَ لِمَنِيَ، بَرِ مَ عَلَتَلَ وٌ يَشُييٍ بِرِن مَ قٍ رَبَمَ يِ كِ نّ، وٌ نُن نَشٍيٍ نّ فٍرٍ مَ.»