تَرُشُي 7:2-31

²عٍتِيّن نَشَ عٍ يَابِ، «ﭑ نفَشَكٍرٍنيِيٍ نُن ﭑ بَبَيٍ، وٌ وٌ تُلِ مَتِ ﭑ نَ. عَلَ دَرِيّ كَنيِ مِنِ نّ وٌن بَبَ عِبُرَهِمَ مَ عَ نُ نَ مٍسٌثٌتَمِيَ بْشِ مَ تّمُي نَشّ، بٍينُن عَ شَ سَبَتِ شَرَنِ.

³عَلَ نَشَ عَ قَلَ عَ بّ، ‹كٍلِ عِ شَ بْشِ نُن عِ شَبِلّ شُن، سِفَ بْشِ مَ ﭑ دّننَشّ مَسٍنمَ عِ بّ.›

⁴عَوَ، عَ نَشَ مِنِ كَلِدِ بْشِ رَ، عَ سَ سَبَتِ شَرَنِ. مّننِ، عَ بَبَ قَشَ شَنبِ، عَلَ نَشَ عَ رَدَنفِ يِ بْشِ مَ وٌ سَبَتِشِ دّننَشّ يِ كِ تٌ.

⁵عَ مُ لِنفِرَ يٌ قِ عَ مَ يِ بْشِ كُي هَلِ سَنتِدٍ. كْنْ عَ نَشَ لَايِدِ تٌنفٌ عَ بّ، عَ قَمَ يِ بْشِ قِدٍ عَ تَن نُن عَ بْنسْي نَن مَ، هَلِ عَ قَشَ شَنبِ. نَ وَشَتِ دِ يٌ مُ نُ نَ عَ بّ سِندٍن.»

⁶«عَلَ نَشَ عَ قَلَ عَ بّ، ‹عِ بْنسْي سَبَتِمَ بْشِ فبّتّ نَن مَ. مّننِ عٍ قِندِ مَ نّ كٌنيِيٍ رَ. عٍ عٍ حَشَنكَتَ حّ كّمّ نَانِ بُن.›

⁷عَلَ مَن نَشَ عَ قَلَ، ‹ﭑ قَمَ نَ سِ مَكِيتِدٍ نَشَن عٍ رَ سٌمَ كٌنيِيَ كُي. نَ دَنفِ شَنبِ، عٍ كٍلِمَ نّ نَا، عٍ قَ ﭑ بَتُ بٍ.›»

⁸«عَوَ، عَلَ نَشَ سُننَ سَاتّ قِ عِبُرَهِمَ مَ. عِبُرَهِمَ تٌ عِسِيَفَ بَرِ، عَ نَشَ عَ سُننَ عَ شِ سٌلٌمَسَشَن ندٍ مَ. عِسِيَفَ تٌ يَشُبَ بَرِ، عَ نَشَ عَ قَن سُننَ. يَشُبَ قَن نَشَ وٌن بٍنبَ قُ نُن قِرِنيِيٍ سُننَ.»

⁹«وٌن بٍنبَيٍ نَشَ يُسُقُ تْونّ، عٍ نَشَ عَ مَتِ، عَ نَشَ قِندِ كٌنيِ رَ مِسِرَ بْشِ مَ.

¹⁰كْنْ عَلَ نَشَ لُ عَ قْشْ رَ. عَ نَشَ عَ رَ مِنِ عَ شَ كْنتْقِلِ بِرِن كُي. عَ نَشَ هِننّ نُن شَشِلِمَيَ قِ عَ مَ، عَلَكٌ عَ شَ رَقَن مِسِرَ مَنفّ مَ، نَشَن عَ قِندِ مِسِرَ فٌمِنَ نُن عَ شَ بَنشِ بِرِن شُنمَتِ رَ.»

¹¹«كَامّ شُنفبٍ نَشَ سٌ مِسِرَ بْشِ مَ عَ نُن كَنَان بْشِ. وٌن بَبَيٍ مُ نُ بَلٌي سْتْمَ، تْورّ نَشَ فبٌ.

¹²يَشُبَ نَشَ عَ مّ عَ مّنفِ نَ مِسِرَ بْشِ مَ. عَ نَشَ وٌن بَبَيٍ شّي نَا عَ سِنفٍ.

¹³عٍ شَ سِفّ قِرِن ندٍ، يُسُقُ نَشَ عَ يّتّ مَسٍن عَ قَقَشَكٍرٍنيِيٍ بّ، مِسِرَ مَنفّ قَن نَشَ يُسُقُ شَبِلّ رَكٌلٌن.

¹⁴عَوَ، يُسُقُ نَشَ عٍ شّي عَ بَبَ يَشُبَ تٌنفٌدٍ نُن عَ شَ دٍنبَيَ بِرِن. عٍ كْنتِ نُ سِفَشِ هَن مِشِ تٌنفٌ سٌلٌقٍرٍ عَ نُن سُولِ.

¹⁵يَشُبَ نَشَ فٌرٌ مِسِرَ، عَ قَشَ دّننَشّ عَ نُن وٌن بَبَيٍ.

¹⁶عٍ قُرٍيٍ نَشَ رَفبِلٍن سِكٍمِ، عٍ عٍ رَفَتَ فَبُرِ نَن كُي، عِبُرَهِمَ نَشَن سَرَ كْبِرِ رَ شَمٌرِ شَ دِيٍ مَ.»

¹⁷«عَلَ شَ لَايِدِ رَكَمَلِ وَشَتِ تٌ مَكْرّ، لَايِدِ نَشَن تٌنفٌشِ عِبُرَهِمَ بّ، وٌن مَ حَمَ شُن نَشَ مَسَ مِسِرَ بْشِ مَ.

¹⁸كْنْ نَ شَنبِ مَنفّ فبّتّ نَشَ تِ نَشَن مُ نُ يُسُقُ شَ قٍ كٌلٌن.

¹⁹نَ مَنفّ نَشَ وٌن مَ حَمَ يَنقَ. عَ نَشَ وٌن بٍنبَيٍ حَشَنكَتَ، هَن عَ نَشَ عٍ يَامَرِ عٍ شَ عٍ شَ دِيْرّيٍ وْلّ، عَلَكٌ عٍ شَ قَشَ.

²⁰نَ تّمُي عَننَبِ مُنسَ نَشَ بَرِ، عَلَ هِننّ نَشَن نَ. كِكٍ سَشَن عَ رَبَلٌقٍ عَ بَبَ شَ بَنشِ كُي.

²¹نَ شَنبِ عَ نَشَ عَ بّلّشّ بَ عَ مَ. مِسِرَ مَنفّ شَ دِ فِنّ قَ عَ تٌنفٌ، عَ نَشَ عَ رَ مْ عَلْ عَ شَ دِ.

²²عَننَبِ مُنسَ نَشَ كٌلٌن سْتْ مِسِرَ شَ قٍ بِرِن مَ. عَ وْيّن كِ نُن عَ حّرّ كِ نَشَ سّنبّ سْتْ.»

²³«عَ تٌ حّ تٌنفٌ نَانِ سْتْ، عَ نَشَ وَ عَ نفَشَكٍرٍنيِيٍ كٌلٌنقٍ. عَ نَشَ سِفَ عَ بٌورٍ عِسِرَيِلَكَيٍ يِرٍ مَتٌدٍ.

²⁴عَ تٌ مِسِرَكَ تٌ عَ قٍ حَاشِ نِيَقٍ عِسِرَيِلَكَ ندٍ رَ، عَننَبِ مُنسَ نَشَ عَ نفَشَكٍرٍنيِ شَ فٍرٍ سٌ، عَ نَشَ مِسِرَكَ قَشَ.

²⁵عَ نَشَ عَ مَحْشُن عَ عَ نفَشَكٍرٍنيِيٍ عَ كٌلٌنمَ نّ عَلَ شْرّيَ قِمَ عٍ مَ عَ سَابُي نَن نَ، كْنْ عٍ مُ كٌلٌن سْتْ نَ مَ.

²⁶نَ كُيٍ عِبَ، عَننَبِ مُنسَ نَشَ عِسِرَيِلَكَ قِرِن تٌ، عٍ نَ فٍرٍقٍ. عَ نَشَ كَتَ عٍ شَ لَن عٍ بٌرٍ مَ، عَ نَشَ عَ قَلَ عٍ بّ، ‹نفَشَكٍرٍنمَيٍ نَن نَ وٌ رَ. مُنقٍ رَ وٌ قٍ حَاشِ نِيَمَ وٌ بٌرٍ رَ؟›

²⁷كْنْ نَشَن نُ قٍ حَاشِ رَبَقٍ عَ نفَشَكٍرٍنيِ رَ، عَ نَشَ عَننَبِ مُنسَ رَدِن يّ، عَ عَ قَلَ عَ بّ، ‹ندٍ عِ تِشِ مَنفّ نُن كِيتِسَ رَ مُشُ شُن مَ؟

²⁸عِ وَشِ ﭑ قَشَقٍ نّ عَلْ عِ مِسِرَكَ قَشَشِ كِ نَشّ شٌرٌ؟›

²⁹عَننَبِ مُنسَ تٌ نَ وْيّنيِ مّ، عَ نَشَ عَ فِ. عَ نَشَ سَبَتِ مَدِيَن بْشِ مَ، عَ نَشَ دِ قِرِن بَرِ مّننِ.»

³⁰«حّ تٌنفٌ نَانِ دَنفِ شَنبِ، مَلٍكّ نَشَ مِنِ عَ مَ تّ شْورَ نَشَن نُ سَنسِ بِلِ فَنقٍ فبٍنفبٍرٍنيِ مَ، سِنَيِ فٍيَ قَرِ.

³¹عَننَبِ مُنسَ تٌ نَ قٍ تٌ، عَ نَشَ كَابَ. عَ تٌ عَ مَسٌ عَ رَ، عَ شَ عَ عِفبّ، عَ نَشَ مَرِفِ شُي مّ.