ВЫСЛОЎІ 8:6-34

⁶Слухайце, бо я буду казаць важнае, і моўленьне вуснаў маіх - праўда;

⁷Бо ісьціну вымавіць язык мой, а бязбожнасьць - гідота для вуснаў маіх;

⁸усе словы вуснаў маіх слушныя; няма ў іх хітрыны і ашуканства;

⁹усе яны простыя разумнаму і справядлівыя тым, хто здабыў веды.

¹⁰Прымеце навуку маю, а ня срэбра; лепей веды, чым чыстае золата;

¹¹бо мудрасьць лепшая за перлы, і ўсё, чаго пажадаеш, не дараўнаецца зь ёю.

¹²Я, мудрасьць, жыву з розумам, і шукаю спазнаньня ў разважлівага.

¹³Страх Гасподні - ненавідзець зло; гонар і пыху і ліхія шляхі і падступныя вусны я ненавіджу.

¹⁴У мяне рада і праўда: я розум, у мяне сіла.

¹⁵Мною цары валадараць, і праўнікі ўзаконьваюць праўду.

¹⁶Мною кіруюць уладыкі і вяльможы, і ўсе судзьдзі праведныя.

¹⁷Хто любіць мяне, тых я люблю, і хто шукае мяне, знойдуць мяне;

¹⁸багацьце і слава са мною - скарб нятленны, і праўда;

¹⁹плады мае лепшыя за золата, і золата самага чыстага, і карысьці ад мяне болей, чым ад чыстага срэбра.

²⁰Я хаджу дарогаю праўды, сьцежкамі правасудзьдзя,

²¹каб даць тым, хто мяне любіць, спадчыну дабра, і скарбніцы іхнія я напаўняю.

²²Гасподзь меў мяне ад пачатку дарогі Сваёй, раней дзеяў Сваіх, спрадвеку:

²³адвеку была я памазаная, ад пачатку, ад правеку зямлі.

²⁴Я нарадзілася, калі ня было яшчэ бездані, калі яшчэ ня было крыніц, багатых вадою.

²⁵Я нарадзілася перш, чым былі пастаўлены горы, раней за пагоркі,

²⁶калі яшчэ Ён не стварыў ні зямлі, ні палёў, ні пачатковых пылінак сусьвету.

²⁷Ён рыхтаваў нябёсы, я была там. Калі ён крэсьліў скляпеньне над паверхняю бездані,

²⁸калі сталяваў наверсе аблокі, калі мацаваў крыніцы бездані,

²⁹калі даваў мору статут, каб воды не заступалі межаў яго, калі закладваў асновы зямлі:

³⁰тады я была пры Ім за майстра, і была кожны дзень радасьцю, весялосьцю была перад абліччам Ягоным заўсёды,

³¹радуючыся на зямным коле Яго, і радасьць мая была з сынамі чалавечымі.

³²Цяпер, дзеці, паслухайце мяне; і шчасныя тыя, што будуць ахоўваць шляхі мае!

³³Паслухайце настаўленьня, і мудрымі станьце, і не адступайцеся ад яго.

³⁴Шчасны той чалавек, які слухае мяне, чуваючы дзень у дзень каля варотаў маіх і вартуючы дзьверы мае!