Ŋacmêtê tau 3:1-20

¹Gêŋ samob ŋanoc gêc gêdêŋ-gêdêŋgeŋ. Ma kôm samob, taŋ sêjam sêmoa umboŋ ŋalabu naŋ, ŋanoc gêc amboac tonaŋgeŋ.

²Teneŋi sêkôc aêac ŋanoc gêc, ma tamac êndu ŋanoc gêc. Tasê gêŋ ŋatêm gêc ma tajoŋ ŋanô sa ŋatêm gêc.

³Sêjac ŋamalac êndu ŋanoc gêc ma sêgôm lau ôliŋ ŋajam êsa ŋanoc gêc. Danseŋ gêŋ suŋa ŋanoc gêc ma takwê sa ŋanoc gêc.

⁴Tataŋ taŋiboa ŋanoc gêc ma taômac ŋanoc gêc. Tanam abec ŋanoc gêc ma tatê wê ŋanoc gêc.

⁵Tasac poc êliŋ-êliŋ ŋanoc gêc ma tajoŋ poc sa ŋanoc gêc. Tamoa dawiŋ tauŋ ŋanoc gêc ma tatu mêtê tauŋ ŋanoc gêc.

⁶Dansom gêŋ ŋanoc gec ma tanam gêŋ sapu ŋanoc gêc. Tanac gêŋ sa ŋanôc gêc ma tajaiŋ gêŋ ŋanoc gêc.

⁷Takac gêŋ êŋgic ŋanoc gêc ma tasi gêŋ êpi tageŋ ŋanoc gêc. Tanam tauŋ tôŋ ŋanoc gêc ma tasôm biŋ ŋanoc gêc.

⁸Têntac êwiŋ tauŋ ŋanoc gêc ma têntac endec tauŋ ŋanoc gêc. Tanac siŋ ŋatêm gêc ma daê wama ŋatêm gêc.

⁹Koleŋwaga oc kêtap ŋanô ondoc sa gêjô nê koleŋ.

¹⁰Aê galic gêŋwapac, taŋ Anôtô gêu gêsac ŋamalac latuŋi gebe sim tauŋ suŋa.

¹¹Eŋ kêkêŋ gêŋ samob ŋajamanô gêdêŋ nê noc. Eŋ kêkêŋ kêsêp ŋamalac ŋalêlôm gebe sênam aweŋ su sêŋgôŋ mateŋ jaliŋa, mago ŋamalac kêtôm gebe êkip Anôtônê kôm, taŋ gêjam gêdêŋ taŋ gêjac m kôm tau e gêdêŋ gêŋ samob ŋatêku êsuŋa naŋ, ŋam sa atom.

¹²Aê kajala gebe ŋamalac nêŋ gêŋ ŋajam kêlêlêc gebe sêmoa totêntac ŋajamgeŋ ma têtu samuc moasiŋ tokaiŋ-tokaiŋ êtôm nêŋ bêc sêmoa nomŋa teŋ gêc atom.

¹³Ma kajala teŋ gebe Ŋamalac sêniŋ gêŋ to sênôm gêŋ ma sêôc gêŋwapac totêntac ŋajamgeŋ naŋ kêtu Anôtônê moasiŋ teŋ amboac tonaŋgeŋ.

¹⁴Ma aê kajala gebe gêŋ samob, taŋ Anôtô gêgôm naŋ, oc ênêc endeŋ tôŋgeŋ. Ŋamalac têtôm gebe sênac têku gêŋ teŋ atom ma têtôm gebe sêkôc gêŋ teŋ su atom amboac tonaŋgeŋ. Anôtô kêmasaŋ gêŋ tau amboac tonaŋ kêtu ŋamalac têtêc eŋŋa.

¹⁵Gêŋ taŋ kêsa galoc naŋ, gêdêŋ andaŋgeŋ kêsa sugac. Ma gêŋ taŋ oc mêŋêsa naŋ, gêdêŋ andaŋgeŋ kêsa su amboac tonaŋgeŋ. Ma Anôtô gesom gêŋ, taŋ gêjaŋa su naŋ kêtiam.

¹⁶Ma aê galic gêŋ teŋ aŋga oc ŋalabu amboac tonaŋ gebe Gêŋ alôb-alôb gêc gamêŋ, taŋ gêjac biŋgêdêŋ ŋawae naŋ, ma gêŋ alôb-alôb gêc gamêŋ, taŋ gêjac mêtôc gêdêŋ ŋawae naŋ.

¹⁷Tec aê kasôm gêc ŋoc ŋalêlôm gebe “Anôtô oc êmêtôc lau gêdêŋ to lau sec êtômgeŋ gebe gêŋ samob ŋanoc gêc ma kôm samob ŋanoc gêc amboac tonaŋgeŋ.”

¹⁸Aê kasôm gêc ŋoc ŋalêlôm gebe Anôtô gêgôm gêŋ tonaŋ gebe ênsaê to êtôc êndêŋ ŋamalac e sêjala gebe êsêac têtôm bôc.

¹⁹Gebe ŋamalacnê lêŋ kêtôm bôcnê. Lulugeŋ sêmac êndu kêtômgeŋ. Lulugeŋ sêwê kaiŋ aweŋjaô tageŋ. Ŋamalacnê gêŋ ŋajam kêlêlêc bôcnê teŋ gêc atom. Gêŋ samob gêŋ ŋaôma.

²⁰Samob sepeŋ gamêŋ tageŋ. Samob ŋam kêsêp kekop. Ma samob têtu kekop êtiam.