KOHELETE 3:1-20

¹Ḡau iboudiai na mai edia nega korikori, bona ḡaukara iboudiai guba henunai e karamu be mai negadia:

²vara mai negana, mase mai negana; hadohado mai negana, ḡeiḡei mai negana;

³ala-ala mai negana, hahemauri mai negana; ruma irohona mai negana, ruma ihadaina mai negana;

⁴taitai mai negana, kiri mai negana; lalo-hisihisi mai negana, mavaru mai negana;

⁵nadi inegedia mai negana, nadi ihaboudia mai negana; haherahu mai negana, basie haherahu na mai negana;

⁶itahuna mai negana, ihaboiona mai negana; ikahu-taona mai negana, ikahu-negena mai negana;

⁷dabua idarena mai negana, dabua iturina mai negana; asi reḡereḡeda baita noho na mai negana, baita herevahereva na mai negana;

⁸heura-heheni mai negana, heinai-heheni mai negana; tuari mai negana, maino mai negana.

⁹Ḡaukara tauna ena hekwarahi anina be dahaka baine abia?

¹⁰Dirava ese taunimanima natudia vada e henidia bae hekwarahilai ḡaukaradia vada na itadia.

¹¹Ia ese ḡau iboudiai vada e hahairaidia, ta ta ena nega ena nega ai; a taunimanima lalodia vada e haduhudia, idia ese Dirava ena ḡaukara, matamana ela bona dokona, basie davaria diba.

¹²Lau dibagu taunimanima edia dala namona tamona binai: bae moale, edia mauri dinadia iboudiai lalodiai bae hahemoale.

¹³Ina danu, iboudiai bae aniani bona bae inuinu, bona edia hekwarahi idoinai bae moalelaia; una na Dirava ena harihari ḡauna taunimanima ediai.

¹⁴Lau dibagu Dirava ena kara Iboudiai na bae mia hanaihanai; ḡau ta ma basie atoa kau eiava basie abia oho; Dirava ese unu vada e karaia toma, taunimanima na ia vairanai bae gari helaoreana.

¹⁵Harihari e miamu ḡaudia na gunaguna e miava, bona do bae vara ḡaudia danu gunaguna e miava; bona Dirava ese vada e heabi oho ḡaudia na e tahudiamu.

¹⁶Dina henunai ma na itaia, hahemaoro ḡoevaḡoeva gabuna ai kara dika e miava, bona kara maoromaoro gabuna ai kara gageva-gagevadia danu e miava.

¹⁷Lalogu ai nato: Dirava ese kara maoromaoro taudia bona kara dika taudia baine hahemaoro henidia; badina be ia ese bae vara ḡaudia iboudiai bona ḡaukara iboudiai edia nega vada e gwaurai.

¹⁸Lalogu ai ma nato: Dirava ese taunimanima natudia e tohodiamu, baine hahedinarai henidia idia na boroma mo.

¹⁹Badina be taunimanima natudia ediai e varamu bona boroma ediai e varamu dalana be tamona; ta e masemu heḡereḡerena, ma ta danu e masemu. Iboudiai laḡadia na heḡereḡere, taunimanima ese boroma asie hereadiamu; badina be iboudiai na asi anidia.

²⁰Iboudiai na gabu tamona e laomu; iboudiai na ḡahu amo, bona iboudiai na ḡahu ai ma baela.