Kawandila 3:1-20

¹Tɛmui na fe birin ma, fe birin duniɲa ma, a xa waxati na na.

²Waxati nde na di barife ma, waxati nde na faxafe ma. Waxati nde na sansi sife ma, waxati nde na sansi xabafe ma.

³Waxati nde na faxɛ tife ma, waxati nde na dandan tife ma. Waxati nde na se kanafe ma, waxati nde na se yailanfe ma.

⁴Waxati nde na wafe ma, waxati nde na yelefe ma. Waxati nde na yaye raminife ma, waxati nde na fare boronfe ma.

⁵Waxati nde na gɛmɛe rayensenfe ma, waxati nde na gɛmɛe malanfe ma. Waxati nde na sunbu tife ma, waxati nde na a titareya ma.

⁶Waxati nde na se fenfe ma, waxati nde na a lufe ma. Waxati nde na se ragatafe ma, waxati nde na a wɔlɛfe ma.

⁷Waxati nde na se ibɔɔfe ma, waxati nde na a dɛgɛfe ma. Waxati nde na wɔyɛnfe ma, waxati nde na dundufe ma.

⁸Waxati nde na xanu tife ma, waxati nde na xɔn tife ma. Waxati nde na geresofe ma, waxati nde na saatafe ma.

⁹Walikɛ geeni mundun sɔtɔma a xa katɛ kui?

¹⁰N bara kote to Ala naxan dɔxɔxi adamadie xun.

¹¹A bara se birin natofan a waxati ma. A bara a niya adamadi xaxili xa siga abadan fe ma, hali a mu nɔ Ala xa walie kolonde keli a fɔlɛ ma han a raɲɔnyi.

¹²N a kolon fefe mu na naxan fan adamadi bɛ, fo a sɛɛwa, a fe fanyi raba a xa duniɲɛigiri kui.

¹³Mixi a dɛgefe, a a min, a sɛɛwa a xa wali kui, na nan findixi Ala xa ki ra adamadi bɛ.

¹⁴N a kolon Ala xa wali birin buma nɛ abadan. Sese mu sama a xun ma, sese mu bama a ra. Ala fe rabama nɛ alako adamadi xa gaaxu a ya ra.

¹⁵Naxan na na, na ɲan nu na nu. Naxan fama rabade, na ɲan nu na nu. Adamadi naxan nabaxi, Ala fama nɛ na makiitide.

¹⁶N bara fe gbɛtɛ fan to yi duniɲa ma: Nɔndi mafindima wule ra, tinxinyi mafindima tinxintareya ra.

¹⁷N naxa a maɲɔxun n xaxili kui, Ala tinxintɔɛ nun tinxintare makiitima nɛ, barima fe birin a waxati na na.

¹⁸N man naxa a maɲɔxun n xaxili kui, Ala na mixie matofe nɛ, alako e xa a kolon daalise nan lanxi e ma alɔ wulai subee.

¹⁹E firin birin fama nɛ raɲɔnde yire keren, e firin birin faxama nɛ. E firin birin ɲɛngima ki keren, adama yo sube yo, e birin lan. Fe fufafu na na birin na.

²⁰E birin sigade keren. E kelixi bɛndɛ nɛ, e man gbilenma bɛndɛ nɛ.