Än Salomon Afalafal 3:8-22

⁸A wor fansoun tong pwal fansoun oput, a wor fansoun maun pwal fansoun kinamwe.

⁹Met sokun feiöch eman epwe angei seni an angang weires?

¹⁰Iwe, üa küna ewe angang weires Kot a awisa ngeni aramas.

¹¹Meinisin mine Kot a föri a unusen mürina lon ar fansoun. Iwe, a pwal atolonga ekiekin fansoun esemwüch lon letipen aramas, nge resap tongeni weweiti mine Kot a föri seni lepopun tori lesopolan.

¹²Iwe, üa silei pwe esap wor och a mürina lap seni än eman epwe pwapwa o föri mine a mürina lon fansoun manauan.

¹³Nge üa pwal silei pwe aramas meinisin repwe mongö o ün, repwe pwal pwapwa lon ar angang weires. Pwal iei eu lifang me ren Kot.

¹⁴Iwe, üa silei pwe meinisin mine Kot a föri epwe nonom tori feilfeilachök. Esap wor eman a tongeni apacha och ngeniir, esap pwal wor eman a tongeni aimwü och seniir. Iwe, Kot a föri iei usun pwe aramas repwe meniniti.

¹⁵Mine a wor ikenai a fen wor me lom, nge mine epwe wor me mürin a fen pwal wor me lom. Iwe, mine Kot a föri me lom, a pwal förisefäli.

¹⁶Iwe, üa pwal küna pwe won fanüfan a wor pwüngingau lon lenien apwüng, a pwal wor pwüngingau lon lenien pwüngüöch.

¹⁷Iei mine üa ekieki lon letipei, “Kot epwe apwüngü chon pwüng me chon pwüngingau, pun epwe wor fansoun fisin mettoch meinisin me sokun föför meinisin.”

¹⁸Iwe, üa pwal ekieki lon letipei, “Kot a sotuni aramas pwe epwe aiti ngeniir pwe ra chök wewe ngeni man.

¹⁹Pun sopolan manauen aramas me sopolan manauen man a wewe chök. Usun aramas ra mäla, ina usun man ra pwal mäla. Ir meinisin ra eäni eu chök ngasangas, pun aramas resap feiöch seni man. Iwe, meinisin pön chök.

²⁰Iwe, ir meinisin ra feila lon eu chök leni. Ir meinisin ra för seni pwül, repwe pwal liwiniti pwül.

²¹Iö a silei ika ngünün aramas ra feitä läng, nge ngünün man ra feitiu fän pwül?”

²²Iei mine üa küna pwe a fokun mürina pwe eman aramas epwe pwapwa lon an angang, pun iei wisan. Nge iö a tongeni aiti ngeni aramas mine epwe fis me mürin?