Zozuwe 18:5-24

⁵Ta kɛɛzu su lɔfela, ti gaaɠwɛ ɓɔɠɔ ʋa. Zuda ɠa yɛsu ná-kwɛpelemaʋɛ, lɛkpɛmaʋɛ nu yeezazuʋɛ. Zozɛfe ná-pɛlɛyeɠei ɠa yɛsu ná-kwɛpelemaʋɛ, lɛkpɛmaʋɛ nu ɠɔʋɛzuʋɛ.

⁶Wa zooi ɠaaɠwɛɛzu su lɔfela, wo ʋa ʋɛ pɔ̀ ga ma zɛʋɛi. Nà kpakutoomai ɠɛɛzu wo ʋɛ, ʋɛ nɔ Ɠɔoɠɔ GALAGI da-ƓALAGI ɠaazu.

⁷Kɛlɛ Leevi mavofodai la zou nɔpɛ sɔlɔɔga ga nɔnɔ wo zaama, mazɔlɔɔ Ɠɔoɠɔ GALAGI ná-zalaɠa ɠula vai ɠa é ga tɔnɔi. Nii é ga Gade ná-bolodai, ta Luɓɛn ná-bolodai, ta Manasee ná-bolodai ɠilazuʋɛ, naati ti tɔnɔi zɔlɔɔgɛ na, Zuludɛn ʋolu ʋelei, folo ɠulazu ʋelei, nii Moize, Ɠɔoɠɔ GALAGI ná-botiɠɛ nui feeni ti ya.»

⁸Zunuiti ti yeeloni ti ʋa ga ti zooi ɠaaɠwɛ, naati ti pele zoni. Aisa ti ʋa li, Zozuwe niima leveiti feeni ti ya, é ɠɛ ti ma: «À li, wo ziɛ zooi zu, wo gaaɠwɛ sɛʋɛi zu, naa ʋolu wo ɠale ma pɔ̀ bɛ. Silo ʋɛ nɔ ɠa, gè kpakutoomai ɠɛɛzu ná wo ʋɛ, Ɠɔoɠɔ GALAGI ɠaazu.»

⁹Zunui naati ti liini, ti ziɛ zooi zu, ti gaaɠwɛ sɛʋɛi zu, ti kɛ su lɔfela, eɠɛʋelei taa wolaiti ti la. Ti ɠaleni ma Zozuwe ʋɔ bɛ, ti-ʋuuzuʋɛ Silo.

¹⁰Zozuwe zooi ɠaaɠwɛɛni Izelayɛle nuiti ba ga kpakutoomai Silo, Ɠɔoɠɔ GALAGI ɠaazu, é bolodai ɠilagilagi nɔnɔi ve zea.

¹¹Zooi ma mɔungi kpakui looni ma, naa ɠɛni ga Ɓɛnzamɛn mavofodaiti ta-wolodai nɔnɔi, eɠɛʋelei ta-ʋɛlɛyeɠeiti ti la. Ná-zooi ɠwɛgi ɠɛni Zuda ná-bolodai ta Zozɛfe mavofodaiti ta-wolodaiti zɔɠɔzuʋɛ.

¹²Lɛkpɛmaʋɛ nu ɠɔʋɛzuʋɛ, ti ɠwɛgi zoni Zuludɛn ʋa, é lɛ Zeeliko ɠobaʋɛ, lɛkpɛmaʋɛ nu ɠɔʋɛzuʋɛ, é lɛ gize yooi zu folo liizu ʋelei, é li, é ʋilɛ Ɓɛte-Avɛn leʋebai ʋa.

¹³Kwɛpelemaʋɛ leʋeni ga Luze ʋele, nii daa ga Ɓeetɛle, lɛkpɛmaʋɛ nu yeezazuʋɛ, naa ʋolu é yeini ga Atalɔte-Adaal ʋele gize maazuʋɛ, nii é Ɓɛte-Ɠɔlon ná ɠɔɠɔwu ʋelei, lɛkpɛmaʋɛ nu yeezazuʋɛ.

¹⁴Folo ɠulazu ʋelei, kwɛpelemaʋɛ liini, é lati kpoloɗɛi ʋɔ pelei, é zo gizei ʋa, nii é Ɓɛte-Ɠɔlon letemaʋɛ, lɛkpɛmaʋɛ nu yeezazuʋɛ, é li, é lo Kiliyate-Ɓaale ʋa, nii é ga Kiliyate-Yeyalime, Zuda mavofodaiti ta-laa wolai. Folo liizu ʋele ɠwɛpelegi ɠana.

¹⁵Lɛkpɛmaʋɛ nu yeezazu ʋelei ma ɠwɛgi zoni Kiliyate-Yeyalime ʋa, é liini folo liizu ʋelei Nɛfetoa ɗɛungiti pɔ bɛ,

¹⁶miná ɠa é yeini ná gize ɠɔɠɔaʋɛ, nii é zɛlɛni Ɓɛne-Ɠinɔme ʋɛtugi maazu, Lefayime ʋɛtugi zu, lɛkpɛmaʋɛ nu ɠɔʋɛzuʋɛ. É yeini Ɠinɔme ʋɛtugi zu, Yeeɓuse nuiti ta-ɠize ɠobuʋɛ, lɛkpɛmaʋɛ nu yeezazuʋɛ, eyɛsu é zeeli En-Lɔgɛle.

¹⁷É latini lɛkpɛma ʋelei nu ɠɔʋɛzuʋɛ, é lo En-Seemɛse ʋa, naa ʋolu é lo Gelilɔte ʋa, gize yɔɠɔzuʋɛ Adumime letemaʋɛ. É zo miná, é yeini kɔtui naa ʋɔ bɛ, nii daa ga Ɓɔɠan, Luɓɛn ná-doun zunui taɠila daasei kana.

¹⁸É leʋeni gizei ɠobuʋɛ lɛkpɛmaʋɛ nu ɠɔʋɛzuʋɛ, nii sɛlɛgai Zuludɛn ma ʋɛtu nɛmɛi maazu, é yeini pɛtu nɛmɛi zu.

¹⁹É liini Ɓɛte-Ɠɔgela ɠoba, lɛkpɛmaʋɛ nu ɠɔʋɛzuʋɛ, é li, é lo Kpoloɗɛ Wanai ʋa ga nu ɠɔʋɛzu ʋelei tosuʋɛ Zuludɛn ʋa. Lɛkpɛmaʋɛ nu yeezazuʋɛ ʋele ɠwɛpelegi ɠana.

²⁰Folo ɠulazu ʋelei, Zuludɛn ɠa é ɠɛni ga kwɛmaʋɛ. Ɓɛnzamɛn mavofodaiti ta-wolodai nɔnɔi ɠana, eɠɛʋelei ta-ʋɛlɛyeɠeiti ti la, ta ta-ɠwɛpelemaʋɛti é lati ti ma.

²¹Ɓɛnzamɛn mavofodaiti ta-laa wolaiti ti ɠɛni ga niiti, eɠɛʋelei ta-ʋɛlɛyeɠeiti ti la: Zeeliko, Ɓɛte-Ɠɔgela, Emɛke-Kesise,

²²Ɓɛte-Alaɓa, Semalayime, Ɓeetɛle,

²³Avime, Pala, Wɔfela,

²⁴Kefaal-Amɔnayi, Wɔfeni, ta Geeɓa. Taa wolai liegɔi ɠɛni ga puugɔ maazu felegɔ (12), ta ma laa goiti.