Zone 4:1-32

¹Meke avoso nia rina Parese sapu sari na tie pu ta papitaiso koe Zisu meke lulia si Asa, si soku hola ni saripu te Zone, gua.

²Ba, e Zisu telena si lopu papitaiso tie, ba sari Nana disaepeli tu.

³Ke totoso avoso nia Zisu sa ginugua asa, si taluarae pa Ziudia meke pule la pa Qaleli si Asa.

⁴Meke koasa Nana inene la gua vasina si ene hola gua pa korapa Sameria si Asa.

⁵Meke mae pa keke vasileana nomana sapu Saeka pozana, sapu lopu seu koasa vasi pepeso sapu poni nia Zekopi koasa tuna sapu e Zosepa.

⁶Meke koa nana vasina sa berukehe te Zekopi. Mabo sisigiti ene se Zisu, ke habotu Nana pa kali berukehe; na korapa rane sa popoa.

⁷Meke totoso ele latu pa vasileana sari Nana disaepeli pude holu ginani gua, si mae utuvu vagi kolo gua si keke barikaleqe Sameria. Meke zama la koasa se Zisu, “Poni Au goi vasi kolo napo,” gua si Asa.

⁹Meke zama la koa Sa sa barikaleqe, “Ki, nake na tie Ziu tu si Goi meke arau si na tie Sameria, ba vegua ke boka tepa nau kolo napo tu Goi?” gua si asa. (Sina lopu hoke vari zamai na vari napoi kapa sari na tie Ziu meke Sameria.)

¹⁰Meke olaṉa la koasa se Zisu, “Be gilania goi sa vinariponi te Tamasa meke esei si Asa sapu tepa nigo kolo napo si boka tepa mo koa Sa si goi, meke boka poni nigo mo Sa sa kolo tinoa.”

¹¹Meke zama la koa Sa sa barikaleqe, “Palabatu, lohi hola sa berukehe, meke loke Mua toṉa pude utuvu nia, pavei kaqu boka vagia Goi sa kolo tinoa?

¹²Sa tamamami gami sapu e Zekopi, si ponini gami sa berukehe hie. Asa meke sari na tuna meke sari doduru nana pinausu kurukuru si hoke napo koasa kolo hie. Ke vegua, arilaemu hola nia Goi se Zekopi, gua si Goi?” gua si asa.

¹³Meke olaṉa la se Zisu, “Asa sapu napoa sa kolo koasa berukehe hie si kote memeha pule,

¹⁴ba asa sapu napoa sa kolo sapu kaqu poni nia Rau koa sa si lopu kaqu memeha pule. Sa kolo asa sapu kaqu poni nia Rau koa sa si kote ta evaṉae na bukaha pa korapa bulona sapu bukabukaha sage, meke ponia sa tinoa hola koa sa,” gua si Asa.

¹⁵“Palabatu,” gua sa barikaleqe, “Poni au sa kolo asa, maqu napoa, pude qu lopu memeha pule, meke pude lopu mae utuvu pule kolo tani si rau,” gua si asa.

¹⁶Meke zama la koasa se Zisu, “La mamu tiokia sa loamu, mamu turaṉa mae nia,” gua si Asa.

¹⁷Meke olaṉa sa barikaleqe, “Loke loaqu,” gua si asa, ke zama pule se Zisu, “Hinokaramu, sapu loke loamu gua si goi.

¹⁸Ba ari ka lima tie tu saripu ele habai goi, meke sa tie sapu korapa koa turaṉia goi kamahire si lopu na loamu. Hinokaramu si goi,” gua si Asa.

¹⁹“Palabatu, kamahire tu gilanigo rau sapu keke poropita si Goi.

²⁰Sari tiatamamami pukerane si vahesia sa Tamasa koasa toqere hoi, ba gamu na tie Ziu si zama sapu pa Zerusalema tu sa vasina sapu kaqu vahesia gita sa Tamasa,” gua sa barikaleqe.

²¹Meke zama la koasa se Zisu, “Va avoso mae. Korapa mae sa totoso sapu lopu kaqu vahesia rina tie sa Tamasa pa toqere hoi babe pa Zerusalema.

²²Gamu na tie Sameria si vahesia si Asa sapu lopu gilania gamu; ba gami na tie Ziu si gilana valeania mami si Asa sapu vahesia gami, sina sa tinaharupu si vura mae gua koa gami na tie Ziu.

²³Ba korapa mae sa rane, meke ele kamo mo hie sapu kaqu vahesi va hinokaria rina tie sa Tamasa pa maqomaqo dia meke pa hinokara. Ura asa sa vinahesi sapu hiva hola nia sa Tamasa.

²⁴Sina na maqomaqo sa Tamasa, ke arini pu vahesia si kaqu vahesia pa Maqomaqo meke pa hinokara si Asa.”

²⁵Meke zama sa barikaleqe, “Gilania rau sapu kaqu mae sa Mesaea” (sapu sa Karisito), “meke pana mae tu Sa, si kaqu tozi va hinokarani gita Sa sari doduru tiṉitoṉa,” gua si asa.

²⁶Meke olaṉa la ia Zisu si asa, “Arau mo si Asa sapu korapa zama atu koa goi kamahire,” gua si Asa.

²⁷Meke pa totoso tugo asa si pule mae mo sari Nana disaepeli meke magasa hola nia ri kasa si Asa, sipu dogoria rini, sapu korapa vivinei turaṉia Sa si keke barikaleqe. Ba loke tie ari kasa si odi hiva nanasa, “Nasa si hiva nia goi,” gua, babe nanasa la ia se Zisu, “Na vegua ke vivinei turaṉia tu Goi sa barikaleqe sana?” gua.

²⁸Meke veko pania sa barikaleqe sa nana vovoina kolo, meke pule la pa vasileana, meke tozi ni sa sari na tie vasina,

²⁹“Mae gamu, mamu dogoria si keke tie sapu tozi nau sari doduru ginugua saripu ele hoke evevaṉi rau. Hokara Asa beka sa Karisito?”

³⁰Ke taluarae koasa dia vasileana nomana sari na tie meke la koe Zisu.

³¹Ba sipu korapa mae gua sari na tie si tepa ososo nia rina disaepeli se Zisu, “Titisa, henahena paki,” gua si arini.

³²Ba olaṉa se Zisu, “Sa gequ ginani si koa nana sapu lopu hite gilania gamu,” gua si Asa.