IOANE 4:1-32

¹Lohiabada vada e diba Farisea taudia vada e kamonai Iesu ese hutuma e abidia, ena hahediba ai e halaodia bona e bapatisodia, a Ioane be gadoidia mo e abidia.

²(Ḡau tamona Iesu ese se bapatisodia, lo ena hahediba hari.)

³Taunabunai, ia ese Iudea e rakatania, Galilea e lou lao.

⁴Ena dala be Samaria tanona amo e raka hanai.

⁵Bena Samaria hanuana ta ai e lasi, ladana na Sukara; una hanua na Iakob ese natuna Iosef e henia tanona badibadinai.

⁶Iakob ena ranu gurina be unuseni ai. Iesu na tauna e heboera, laolao dainai, bena dina tubua ai ranu gurina badibadinai e helai diho.

⁷Samaria hahinena ta ranu utu ela; bena Iesu ese e noia, eto, Ranu kuri ta ame henigu.

⁸Badina be ena hahediba na hanua vada ela, aniani bae hoia totona.

⁹Hari hane Samaria ese e haere henia, eto, Badina be dahaka oi na Iuda taumu, lau be Samaria hahinegu, ma egu ai ranu o gwauraiamu? Ia unu e gwau toma badina be Iuda taudia bona Samaria taudia asie hetura heheniva.

¹⁰Bena Iesu ese e haere henia, eto, Dirava ena harihari ḡauna boma diba, bona boma diba danu ranu kuri ta emu ai e noiamu tauna be daika, oi ese ia boma noia, bena ia ese mauri ranuna bema henimu.

¹¹Hahine na eto, Ḡauka e, asi emu tu-dobi ḡauna, guri danu dobu; hari mauri ranuna be ede amo bo abiamu?

¹²Oi ese senemai Iakob o hercaiamu a? Ia ese ina ranu gurina e henimai; ia ese e inuava, natuna verina bona ena boromakau seridia danu e inuva.

¹³Iesu ese Ina e haere henia, eto, Ina ranu bae inua taudia iboudiai na bae ranu mase lou;

¹⁴a lau ese baina henia ranuna baine inua tauna na basine ranu mase ela bona hanaihanai.

¹⁵Hari hahine ese e noia, eto, Ḡauka, e, ena ranu ame henigu, bena basina ranu mase lou, bona ranu utu danu ini basinama.

¹⁶Bena Iesu ese e hamaoroa, eto, Aola, adavamu a ha boiria, raruosi baoma.

¹⁷Hahine eto, Lau na asi adavagu.

¹⁸Iesu eto, Vada o hereva maoromu, o tomamu “Lau na asi adavagu”; badina be adavamu laima vada o abidia, bona harihari o abiamu tauna na dia oi adavamu. Emu hereva na momokani.

¹⁹Hari hahine eto, Ḡauka e, lalogu vada eme parara oi na peroveta tauna.

²⁰Tubumai tamamai na ina ororo ai e toma dihova, a umui Iuda taumui na o tomamu toma-diho gabuna korikori be Ierusalem ai mo.

²¹Iesu eto, Egu hereva avabia dae: nega ta be maimu ina ororo ai bona Ierusalem ai danu Tamada basio toma henia diho.

²²Umui Samaria taumui ese o toma henia dihomu Diravana na asi dibamui; ai be a toma henia dihomu Diravana na dibamai. Badina be hahemauri na Iuda taumai emai amo.

²³A nega ta be maimu, harihari vada be kaumu, toma-diho taudia korikori ese Tamada bae toma henia diho lauma ai bona momokani ai, badina be Tamada ese unu bae toma henia diho toma taudia na e tahudiamu.

²⁴Dirava na Lauma; bona bae toma henia diho taudia ese lauma ai bona momokani ai bae toma henia diho.

²⁵Hahine na eto, Lau na dibagu Mesia, Keriso e gwauraiamu, do bainema; bona bainema negana ai ia ese ḡau iboudiai baine gwaurai hedinarai.

²⁶Iesu ese e hamaoroa, eto, Tauna bina lau, vada na hereva henimumu.

²⁷Una negana ai ena hahediba vada e lou, ia dekenai e kau, bena e hoa, badina be ia na hahine ta ida e hereva-herevamu. A ta ese se nanadaia “Dahaka o tahuamu?” eiava “Dahaka dainai ia ida o hereva-herevamu?”

²⁸Bena una hahule ese ena hodu e rakatania, hanua ela. Ia ese hanua taudia e hamaorodia, eto,

²⁹Aoma, tau ta a itaia, egu kara iboudiai ia ese e hamaorolaigu. Dahaka o tomamu, ia na Keriso eiava?

³⁰Bena idia na hanua amo e aru lasi, ia dekena ela.

³¹Una negana ai ena hahediba ese e hamaoroa, eto, Rabi e, avaniani.

³²A ia ese e hamaorodia, eto, Lau na mai agu, umui asi dibamui gauna.