John 4:1-32

¹De Pharisee dem yeh say dat Jedus beena git mo ciple an bactize mo ciple den John.

²(Bot fa true, Jedus ain beena bactize people. E ciple dem beena bactize um.)

³Wen Jedus yeh wa dey beena say, e lef Judea an gone back gin ta Galilee.

⁴Wen e beena gwine, e haffa go shru Samaria fa git dey.

⁵Een Samaria, e come ta a town name Sychar, wa stan close ta de fiel wa Jacob gii ta e son Joseph.

⁶De well wa nyuse fa blongst ta Jacob been dey dey. Wen Jedus been weary fom de journey, e seddown close ta de well. E been bout noontime.

⁷One ooman fom Samaria come fa git wata fom de well, an Jedus aks um say, “Please gii me some wata fa drink.”

⁸(E ciple dem done been gone ta town fa buy ting fa nyam.)

⁹De Samaria ooman aks Jedus say, “Ya a Jew an A a ooman fom Samaria. Hoccome ya da aks me fa wata fa drink?” (De ooman say dat cause de Jew dem ain neba nyam needa drink fom de same dish dat de people fom Samaria nyuse, an dey ain neba sociate wid one noda.)

¹⁰Jedus say, “Ef ya been know wa God kin gii, an who dis yah wa da aks fa wata, ya been gwine aks um an e been gwine gii ya dat wata wa da mek people lib fa true.”

¹¹De ooman tell um, “Sah, ya ain got no bucket, an de well too deep. Weh ya git dat wata wa da mek people lib fa true?

¹²We fada Jacob gii we dis well. Jacob an e son dem an e flock beena come yah ta dis well fa drink wata. Ya da tell me dat ya mo greata den Jacob?”

¹³Jedus say, “Ebrybody wa da drink de wata wa dey een dis well gwine tosty gin.

¹⁴Bot ebrybody wa da drink de wata A gwine gim ain neba gwine git tosty no mo. Fa true, de wata A gwine gim gwine be een um like a spring ob wata wa keep on da gim true life wa ain neba gwine end.”

¹⁵De ooman say, “Please sah, gii me dat wata! Den A ain gwine neba git tosty no mo, an A ain gwine haffa come yah ta dis well gin fa git wata.”

¹⁶Jedus tell de ooman say, “Go git ya husban an come back yah.”

¹⁷De ooman say, “A ain got no husban.” Jedus say, “Ya da tell me de trute wen ya say ya ain got no husban.

¹⁸Fibe diffunt man dem done marry ya. An de man ya da lib wid now ain ya husban. Ya da tell me de trute.”

¹⁹De ooman say, “Sah, A see ya a prophet wa God sen.

²⁰We fada beena woshup God ta dis mountain, bot oona Jew people say we mus go ta Jerusalem fa woshup God.”

²¹Jedus tell de ooman say, “Ya mus bleebe wa A da tell ya. De time gwine come wen oona ain gwine woshup we Fada God pon dis mountain, needa een Jerusalem.

²²Oona Samaria people ain know de God wa oona da woshup. Bot we Jew people know de God we da woshup, cause shru de Jew people, God da sabe oda people.

²³Stillyet, de time da come, an e done come now, wen people wa da woshup fa true gwine woshup we Fada God een dey haat. An dey gwine woshup um een de right way, jes like e stan fa true. Cause we Fada God da look fa people like dat fa woshup um.

²⁴God a Sperit, an dem wa woshup um mus woshup um een dey haat an een de right way, jes like e stan fa true.”

²⁵De ooman tell Jedus say, “A know dat de Messiah, wa dey call Christ, gwine come. Wen e come, e gwine splain all ting ta we.”

²⁶Jedus tell um say, “A de one ya da taak bout.”

²⁷Same time Jedus ciple dem come back, an dey been stonish fa see Jedus da taak ta a ooman. Bot ain none ob dem aks de ooman say, “Wa ya wahn?” Needa none ob um aks Jedus say, “Hoccome ya da taak ta de ooman?”

²⁸Den de ooman lef e wata jug an gone back ta town, an e tell all de people dey fa come.

²⁹E tell um say, “Oona mus come see a man wa tell me ebryting A done done. Oona tink e de Messiah?”

³⁰So de people lef town an come ta Jedus.

³¹Same time, Jedus ciple dem beena try fa git Jedus fa nyam sompin. Dey say, “Teacha, please, tek sompin fa nyam.”

³²Bot Jedus say, “A got food fa nyam wa oona ain know nottin bout.”