1Zozɛfe la mɔ ɠɛni ziɛni ná wu, é ʋa ɓɔɠɔ zuzo naati kpein gaazu, ti ɠɛni loni maaɠoolii zu. É wooɠulani, é ɠɛ ma: «À nuiti kpein kula!» Nu nɔpɛ ge la ɠɛni yɛni Zozɛfe ɠoba, siɛgi zu é ɠɛni ɓɔɠɔ lɛɛzu la ga kɛɛɠɛleaiti.
2É wola wooɠulani ga gɔlɔi, eyɛsu Ezipete nuiti ti mɛni, ma wooi zeelini Falaɠɔn ná-pɛlɛyeɠei ma.
3Zozɛfe ɠɛni kɛɛɠɛleaiti ma: «Nà ga Zozɛfe! Kɛ̀ɛ ɠa nɛi dɛ vulua?» Kɛlɛ kɛɛɠɛleaiti ti la ɠɛni zooni ti ʋa tɔun gooɠaaʋote, mazɔlɔɔ ti ɠɛni luazu ba, ti zasu ɗa ɓali gaazu.
4Zozɛfe ɠɛni kɛɛɠɛleaiti ma: «Nà wo maanɛɛnɛzu, à maaɓuɠa bà.» Ti maaɓuɠani ba. É ɠɛni ti ma: «Nà ɠa gè ga Zozɛfe, wo-ɠɛɛloin, nii wo pɔdini, ti ʋaa la Ezipete yooi zu.
5Niizu, naa mina ɠɛ wo ʋɛ ga ziiɓɔlɔ vaa, naa mina wo yiiɠaawana ga tɛi wo pɔ̀dini. Pàaʋɛ ʋɛ, nu yɛnvui makɛ vai ɠa é kɛa GALA ge tèʋe ʋɛ wo luɠɔ.
6Mazɔlɔɔ kona felegɔ ɠaa na, pului loai zooi zu, kona dɔɔlugɔ ɠa dɛ ná ʋolu, wozawoli la ɠɛa, ɓaa molo leʋe vaa.
7GALA ge tèʋegɛ wɔun wo luɠɔ, nii a kɛ wo yɛ vulua zooi ɠa, wo-yɛnvui makɛ, naa ɠɛ ga kpɔba vaa wola.
8Naa ɠa é ba, wa laade, wo ʋa tèʋe ʋɛ, kɛlɛ GALA be. É sèiʋɛ ga Falaɠɔn kɛɛɠɛ, é kɛ̀ ga ná-pɛlɛi maliɠii, é kɛ̀ɛʋɛ ga Ezipete yooi kpein ma ɠundiɠi wolai.
9«À ɠale ma fala, wo li kɛ̀ɛ ɠoba. Wa ɠɛ ma: ‹È-loun zunui Zozɛfe ɠa é niima wooi laazeelizu è ma: ‹GALA ge sèiɗa ga Ezipete yooi kpein maliɠii. Suvilɛ, è ʋa pɔ̀ bɛ!
10Ɗa ʋaazu zeizu Gɔsɛn yooi zu, è ɠɛ kòbaʋɛ, ɗa-o, è-loun zunuiti-yo, è lounlointi-yo, wa ɗa-ʋaalagiti, ta ɗa-nikɛiti, é ʋɛɛ nii kpein ba, é ga è-ɠɔligiti.
11Miná ɠa nà è-maavai pɛ kɛ ná, naa ɠa a kɛ è la ʋala ga ani nɔpɛ ma, ɗa-o, ɗa-ʋɛlɛyeɠei-yo, ta nii kpein é ga ɗɔnɔi, mazɔlɔɔ kona dɔɔlugɔ ʋului ɠa dɛ ʋaazu.›
12«Wa ɓɔɠɔi wo kaa ga ɠaazuʋɛ, dèɠei Ɓɛnzamɛn ɓalaa kaa ga ɠaazuʋɛ, ga nà ɓɔɠɔgoi ɠa gè ɓɔɛzu wo ʋɔ.
13Ɠaazu unfegi kpein é bɛ̀ Ezipete yooi zu, à li, wo naa zuɠula kɛ̀ɛ ma, nii kpein wo kaa ga ɠaazu, wo naa wo ma. À suvilɛ, wo ʋaa ga kɛ̀ɛ ʋɛ.»
14Naa ʋolu, é yeeʋilini deɠe zunui Ɓɛnzamɛn ɠɔgi zu, é wɔlɔ. Ɓɛnzamɛn yee yɛni kɔgi ʋa, é ɗa wɔlɔ.
15É kɛɛɠɛleaiti kpein nɛɛnɛni ɓalaa, é ɗa wɔlɔ. Naa ʋoluma, kɛɛɠɛleaiti ti yɛpɛni tɔun pɔ.
16Zozɛfe kɛɛɠɛleaiti paa vai ma wooi vazani Falaɠɔn ná-pɛlɛi wu. Naa nɛɛni Falaɠɔn ʋɛ ta ná-botiɠɛ nu wolaiti.
17Falaɠɔn ɠɛni Zozɛfe ma: «Ɠɛ è-ɠɛɛleaiti ma: ‹À wa-loganiiti kasɔɠili, wo li Kanaan yooi zu,
18wo wo-ɠɛɛ zeɠe ta wa-ʋɛlɛyeɠe wu nuɓusɛiti, naa ʋolu wo ɠale ma, wo ʋa pɔ̀ bɛ. Nà zooi ʋasuʋɛti fe wo ya Ezipete yooi zu. Wa zooi ná-kulanuma ʋagɔiti sɔlɔɔ, wo mi.›
19Ɗa devei nii ve ti ya, è ɠɛ ti ma: ‹À wotoloiti seɠe Ezipete yooi zu, wo-lointi bɛ ta wo-anzaiti. Wa wo-ɠɛɛ ɓalaa seɠe, wo ʋa.
20Wo-yii mina ɠoloɠolo wo-ɠɔligiti faa zu, mazɔlɔɔ anii ʋagɔiti ti Ezipete yooi zu, naati ta ɠɛ ga wɔnɔ.› »
21Izelayɛle ná-dointi ti kɛɛni ɠana nɔ. Zozɛfe wotoloiti feeni ti ya, eɠɛʋelei Falaɠɔn ná-devei ɠɛni la. É daamianigiti feeni ti ya ɓalaa, nii ta mi pelei zu.
22É seɠe niinɛi veeni ti ɠilagilagi ya. É wali ɠae unsaʋagɔ (300) veeni Ɓɛnzamɛn ya, ta seɠe niinɛ lɔɔlugɔ.
23É soovale sinɛ puugɔ leʋeni kɛɛɠɛ ma, ti ɠasɔɠiliai ga Ezipete anii ʋapagiti, ta soovale saa puugɔ ti ɠasɔɠiliai ga moloi, ta ɓului, ta daamianigiti kɛɛɠɛ ná-siɛ vai zu.
24Naa ʋolu, é yeeɓeni kɛɛɠɛleaiti ba, ti li, é ɠɛ ti ma: «À mina ɓɔɛ pelei zu.»
25Ti ɠaleni ma, ti zeɠe Ezipete yooi zu, ti lɛ Kanaan yooi zu ti-ɠɛɛ Zakɔɓe ʋɔ bɛ.
26Ti ɠɛni ma: «Zozɛfe ɠa dɛ vulua, toɠa é Ezipete yooi kpein unda.» Kɛlɛ Zakɔɓe ɠaalɛini nɔ tɔɔn, mazɔlɔɔ é la ɠɛni laani ti la.
27Ti wooiti kpein daazeelini ma, niiti Zozɛfe ti woni ti ma. Zakɔɓe wotoloiti kaani, niiti Zozɛfe ti leʋeni seɠe vai zu. Názu ɠa ti-ɠɛɛ Zakɔɓe yiilɛini la ɓɔɠɔ ma.
28Izelayɛle ɠɛni ma: «É zolooga! Dòun zunui Zozɛfe ɠa dɛ vulua! Nà liizu, gè pɛtɛ, aisa gè ʋa za.»
