Zatù 20:1-12

¹Is langun he menge Israilihanen puun te Dan pehendiyà te Beersheba, wey puun te Gilead, midtiǥum diyà te Mizpa, diyà te etuvangan te Nengazen.

²Dutun is menge pengulu te kada tribu te Israel te kedtiǥum te menge etew te Megbevayà. 400,000 sikandan is langun he menge sundaru he neǥumeenan te ispada.

³Nezineg te menge kevuwazan ni Benjamin he is menge Israilihanen midtiǥum diyà te Mizpa. Migkaǥi is menge Israilihanen te, “Nemenumenu is kegkeul-ulaha kayi te utew mezaat?”

⁴Ne midtudtul zuen te Levihanen is neulaula: “Nekehendiyè key te esawa ku te Gibea, he sakup te Benjamin su zutun key edhizeǥà.

⁵Ne hein mezukilem en, is baley he nepemenehikan dey midliǥuyan te menge maama he tig-Gibea. Egkesuatan dan he mekuwa e zan su edhimetayan e zan pezem; piru iyan, midsinembeyaanan dan te edlayug is esawa ku taman te minatey.

⁶Umbe, mid-uwit ku te ked-ulì ku is lawa zin ne mibpenamped ku te 12 he vahin ne impeuwit ku ziyà te 12 he tribu te Israel, su utew mezaat wey mekeeled-eled heini is mibeelan dan kayi te Israel.

⁷Ne sikitew is langun he menge Israilihanen hengkey is ed-ul-ulahan tew?”

⁸Nesevaha is menge etew zutun te kegkaǥi te, “Wazà med-ulì kenitew minsan sevaha.

⁹Iyan ebeelan tew is edripa kiw ke hentei kenitew is edsurung diyà te Gibea.

¹⁰Is ikesepulù he vahin te langun he menge maama te kada tribu iyan ed-atur te egkekaan te menge sundaru, ne is egkesamà iyan ebales te menge tig-Gibea tenged kayi te utew mezaat he mibeelan dan kayi te Israel.”

¹¹Umbe, midsevaha is menge maama te Israel te kedsurung diyà te Gibea.

¹²Duen menge menunudtulà he midsuǥù te menge tribu te Israel ziyà te tivuuk he tribu ni Benjamin he ibpekaǥi te, “Hengkey heini is utew mezaat he nehitavù kayi te keniyu?