ZĨRINƆ 4:4-28

⁴Mↄde gbɛ̃ pari kɛ̀ aↄ̃ ń yã mànↄ Yesu náanɛ kɛ̀ ai aↄ̃ gↄ̃gbɛ̃nↄ pari kũ̀ à kà gↄ̃ↄn bↄrↄ sↄↄro taka.

⁵Kɛ̀ guu dↄ̀, Yuda gbãadeenↄ kↄ̃n gbɛ̃nsinↄ kↄ̃n ludayãdannɛrinↄ kàkↄ̃a Yerusalɛmu.

⁶Sa'oriki Anasa kú gwe kↄ̃n Kayafao kↄ̃n Yohanao kↄ̃n Alɛsandao kↄ̃n gbɛ̃ kɛ̀ aↄ̃ↄ dɛ sa'oriki pì danɛ ũunↄ ń píngi.

⁷Wà mↄ̀ kↄ̃n Pitao kↄ̃n Yohanao gbãadee pìnↄ aɛ, ben wà ń lá wà bè: Bↄ́ gbãaa ke dé tↄ́n a beee kɛ̀o?

⁸Ben Luda Nini sù Pitaa à bèńnɛ: Gbãadeenↄ kↄ̃n gbɛ̃nsinↄ,

⁹lán ée wa lalaa gbã̀a nà yã maaa kɛ̀ wá kɛ̀ ɛrɛnɛ yãnzi, dian wá kɛ̀ à kɛ̃̀kↄ̃a nà,

¹⁰amↄanↄ kↄ̃n Isarailinↄ píngi àgↄ̃ dↄ̃ kɛ̀ gbɛ̃ kɛ̀ zɛna a aɛ kɛ̀ aafia è kↄ̃n Yesu Kirisi Nazarɛti kɛ̀ a à pà lía Luda à fɛ̀ɛ bↄna gaan tↄ́omɛ.

¹¹Lɛmɛ gbɛ̀ kɛ̀ amↄa kpɛ́borinↄ a pã kpàzi bé à gↄ̃̀ kpɛ́ gooda gbɛ̀ mìdee ũ.

¹²Gbɛ̃ pãnde kee kuu kɛ̀ eé gbɛ̃ mì síro, zaakɛ anduna guu píngi Ludaa e gbɛ̃ke diɛ gbɛ̃nteenↄnɛ à ń mì síro, séde àpi.

¹³Kɛ̀ aↄ̃ Pita kↄ̃n Yohanao kùgbãakɛɛ è, bensↄ̃ aↄ̃ↄ dↄ̃̀ kɛ̀ talaka wɛ́ɛsiadeenↄmɛ ń ũ, à bↄ̀ ń saɛ, ben aↄ̃ dↄ̃̀ sa kɛ̀ aↄ̃ gĩakɛ wà kú kↄ̃n Yesuomɛ yã.

¹⁴Lán aↄ̃ gbɛ̃ kɛ̀ kɛ̃kↄ̃ana pì è zɛ nà ń saɛ, aↄ̃ↄe fↄ̃ wà yãke ò dↄro.

¹⁵Aↄ̃ bèńnɛ aↄ̃ bↄɛ, ben aↄ̃ lɛ́ kpàkↄ̃sↄ̃

¹⁶wà bè: Wé kɛ dia kↄ̃n gbɛ̃ pìnↄo? Zaakɛ Yerusalɛmudeenↄↄ dↄ̃ píngi kɛ̀ aↄ̃ dabuyã bíta kɛ̀, wé fↄ̃ wà gí beeeziro.

¹⁷Lɛ yã pì tón dagula dɛ kɛ̀laro, wà kpã̀kɛ̃ńzi pãsĩpãsĩ aↄ̃ton yã o gbɛ̃kenɛ kↄ̃n tↄ́ pìo dↄro.

¹⁸Ben aↄ̃ ń sísi aↄ̃ yã dìɛńnɛ kɛ̀ aↄ̃ton yã o kesↄ̃ aↄ̃ yã dańnɛ kↄ̃n Yesu tↄ́oro pátipati.

¹⁹Ben Pita kↄ̃n Yohanao wèńla wà bè: À gwa a zĩndanɛ. A yãn wé maↄ́, ke Luda pↄ́? À kparee bé à maa Ludanɛ?

²⁰Zaakɛ wé fↄ̃ wà gí wà yã kɛ̀ wá mà bensↄ̃ wá è oziro.

²¹Gbãadee pìnↄ ɛ̀ara wà vĩa dàdańzi, ben aↄ̃ ń gbáɛ. Aↄ̃ↄe wɛ́ɛtãmmana zɛ́ ero, zaakɛ baade píngi e Luda sáabu kpaa yã kɛ̀ kɛ̀ pì yãnzi.

²²Gbɛ̃ kɛ̀ aↄ̃ kɛ̃kↄ̃ana dabuyã beee kɛ̀nɛ pì zii dɛ wɛ̃̀ baplaala.

²³Kɛ̀ wà ń gbáɛ, ben aↄ̃ tà ń gbɛ̃nↄ kiia, aↄ̃ↄ òńnɛ lán sa'orikinↄ kↄ̃n gbɛ̃nsinↄↄ òńnɛ nà.

²⁴Kɛ̀ aↄ̃ↄ mà, aↄ̃ wii pɛ̀ Ludazi lɛdolɛ wà bè: Dii, ḿbe n musu kɛ̀ kↄ̃n tↄↄtɛo kↄ̃n ísiaao kↄ̃n pↄ́ kɛ̀ kú ń guunↄ píngi.

²⁵Ń dà n zĩkɛri wa dezi Daudanɛ kↄ̃n n Ninii gbãaao, ben à bè: Bↄ́yãnzin boriinↄↄ e zↄka kaazi? À kɛ̀ dia wèe lɛ́ pãa kpaakↄ̃sↄ̃ↄ?

²⁶Anduna kínanↄↄ e zĩ̀ soru kɛɛ, kpatablerinↄↄ e kaakↄ̃a Diizi kↄ̃n Kí kɛ̀ à kào.

²⁷Yãpuraamɛ, Hɛrↄdu kↄ̃n Pↄntiu Pilatio kↄ̃ kàkↄ̃a wɛ́tɛ kɛ̀ guu kↄ̃n Isarailinↄ kↄ̃n bori pãndenↄ n zĩkɛri kɛ̀ kú adona Yesu kɛ̀ ń kà kí ũu pìzi.

²⁸Aↄ̃ↄ kɛ̀ lán n gĩakɛ n zɛo nà n gbãaa kↄ̃n n pↄyezinao guu.