Föför 4:4-28

⁴Nge chomong aramas mi rongorong ngeni ar afalafal ra lükü. Iwe, iteiter fengen meinisin ina epwe ükükün limungeröü mwän.

⁵Iwe, sorotän ewe rän ekewe souemwenin chon Juta, ekewe souakom me ekewe Sensen Allük ra chufengen lon Jerusalem.

⁶Anas, ewe Souasor mi Lap, Kaifas, Johannes, Aleksanter me pwal ekoch mwän seni familien ewe Souasor mi Lap ra pwal nom lon ewe mwich.

⁷Iwe, ra emwenato Petrus me Johannes me mwer o popuetä le kapas ais ngeniir, “Fän meni manaman ika fän meni it ämi oua föri ei?”

⁸Mürin Petrus mi ur ren Ngünmifel a pölüeniir, “Ämi souemwenin ekewe aramas me souakom:

⁹Are ämi oua atittinakem usun ewe föför mi mürina aia föri ngeni ewe mwän mi pechemä o ifa usun an küna pöchökül,

¹⁰mürin ämi meinisin oupwe silei, pwal ekewe chon Israel meinisin repwe silei, pwe ei mwän mi ütä mwemi ikei a wesewesen pöchökül ren manamanen iten Jesus Kraist seni Nasaret, ätewe oua iräpengesi, nge Kot a amanauasefäli seni mäla.

¹¹Iwe, Jesus i ätewe ekewe Toropwe mi Pin ra kapas usun, ‘Ewe fau ekewe chon kaü imw ra pöütala a wiliti eföü fau mi fokun aüchea seni meinisin.’

¹²Aramas repwe küna manau ren Jesus chök. Pun esap fokun wor pwal eu it won fanüfan Kot a ngeni aramas, pwe sipwe küna manau ren.”

¹³Iwe, chon ewe mwichen soupwüng ra mairü lupwen ra küna än Petrus me Johannes pworacho, ra pwal silei pwe ir aramas resap fiti sukul. Iwe, ra mefi pwe ir fen chiechien Jesus.

¹⁴Nge esap wor och mine repwe tongeni apasa, pun ra küna ewe mwän mi pöchökületä o ü ikenan ren Petrus me Johannes.

¹⁵Iei mine ra üreniir, pwe repwe towu seni ewe ruum ia chon ewe mwichen soupwüng ra mwich ie. Mürin ra pwüngüpwüngfengen lefiler.

¹⁶Iwe, ra ais, “Met sipwe föri ngeni ekei mwän? Aramas meinisin lon Jerusalem ra silei pwe ei manaman mi fokun amwarar a fis rer, nge sisap tongeni aopala.

¹⁷Nge iei met sipwe föri, pwe ei pworaus esap chöfetal lein aramas. Sipwe fönöü ngeni ekei aramas, pwe resap fokun chüen kapas ngeni eman aramas usun ewe it Jesus.”

¹⁸Mürin ra körisefäliirelong o allük ngeniir, pwe resap fokun kapas ika afalafal usun ewe it Jesus.

¹⁹Nge Petrus me Johannes ra pölüeniir, “Oupwe püsin apwüngü are a pwüng mwen mesen Kot ach sipwe aleasochis ngenikemi mwen ach aleasochisi Kot.

²⁰Pun äm aisap tongeni ükütiu le kapas won met aia püsin küna o rongorong.”

²¹Iwe, chon ewe mwichen soupwüng ra fokun pöchökül le eniwer, pwe resap chüen afalafal, mürin ra amuserela. Resap küna och popun mine repwe ariaföüür ren, pun ekewe aramas ra mwareiti Kot ren mine a fis.

²²Pun ierin ewe mwän mi pöchökületä ren ewe manaman a fen lap seni faik ier.

²³Lon ewe chök otun Petrus me Johannes ra ngasala, ra liwiniti ar we mwich o apworausa ngeniir meinisin mine ekewe souasor mi lap me ekewe souakom ra üreniir.

²⁴Iwe, lupwen ekewe chon lükü ra rong ei pworaus, ir meinisin ra tipeeufengen le iotek ngeni Kot: “Äm Samol, en ka föri läng me fanüfan me matau o meinisin mine a nom lor!

²⁵Fän emwenien Ngünmifel en ka kapas ren äm we lewo Tafit, noumw chon angang lupwen a apasa, ‘Pwota ekewe chon lükün Israel ra fokun lingeringer? Pwota chon ekewe mwü ra föri ar raw mi lomotongau?

²⁶Ekewe kingen fanüfan ra amoleeretä, nge ekewe samol ra chufengen pwe repwe ü ngeni ewe Samol me nöün we Kraist.’

²⁷Pun iei usun mine a fis: Herotes me Pontius Pilatus ra mwichfengen me ekewe chon lükün Israel me ekewe aramasen Israel lon ei telinimw ar repwe ü ngeni Jesus noumw Chon Angang mi pin, ätewe en ka epiti.

²⁸Ra chufengen ar repwe föri meinisin mine en ka fen akota fän om manaman me letipom an epwe pwönüetä.