Menge Ininang 4:4-28

⁴Meneng nemenal se medita otaw nenenalan ki Pedro aw si Juan. Menge lima melalan se kedita te otaw nemenal, sipat sìyan otaw tapay nemenal.

⁵Keeldawan niyan, netipon se kedita te egpengibing aw obanen te simbahan te Jerusalem aw menenoladà te punù ingkeliwat i Moises, so se kedita dan, yan se menge otaw eglowan te menge Judiyo.

⁶Netipon se ontò pengolo te simbahan si Anas, aw si Caifas, aw si Juan, aw si Alejandro, aw menge doma gaked i Anas eleg netipon kidoen.

⁷Impeangay dan si Pedro aw si Juan aw mig-insà dan kandan, kagi dan, “Sinu lay se nemegay kenyo te tolos? Sinu lay ngadan se inikagi niyo te nekeinang kaw kani?”

⁸Penga niyan, tinebangan te Espiritu Santo si Pedro aw yan minikagi, “Menge egpengibing aw obanen te simbahan,

⁹mig-insà kaw kenami tepad te mèpiya ininang day diyà te otaw kapig. Mig-insà kaw aw nemeno se pegkegolì din.

¹⁰Indanan ko den sikiyo aw kedita te doma niyo bowad-bowad i Israel. Negolian se otaw kindoen pineokit te ngadan i Jesu Cristo tege Nasarit. Si Jesus se inimetayan niyo, meneng inantay te Timanem lekat te nematay.

¹¹Si Jesus se ketomanan te kagi te Timanem insolat, ‘Doen bato in-agbel te menge otaw mig-inang te balay, so eden dan aw wedad kekemowan niyan. Meneng yan se bato ontò salig te balay.’

¹²Wedad doma mekepelowà kenitadon lekat te salà. Pengkey dini te kebelad te keneyonan, wedad doma insogò te Timanem dini te keneyonan amon megpelowà te otaw lekat te salà.”

¹³Penga niyan, ontò nepela se kedita te obanen te simbahan netipon, so wedà pegketalaw si Pedro aw si Juan te pegtaba dan, pengkey wedà dan ontò pekeiskwila. Meneng mig-aneng-aneng den dan te timaking si Pedro aw si Juan ki Jesus kedengan.

¹⁴Meneng wedad neinang te menge obanen te simbahan kandan ki Pedro so kidoen se otaw negolian.

¹⁵Penga niyan, impelowà dan si Pedro aw si Juan te wedà kenamay. Te iyogan dan, migpeinsaay se menge obanen,

¹⁶“Megmeno kidon? Eked kidon pekeikagi te wedà iyan keinang. Netegahan te kedita te otaw dini te Jerusalem te neinang dan se kepelahan.

¹⁷Meneng mèpiya aw lemiten tadon dan amon eked dan ebey ikagi te ngadan te egtekingan dan sìyan, amon eked iyan ketegahi te menge otaw kidoen te doma lonsod.”

¹⁸Pegtawal dan ki Pedro aw si Juan, migpunù dan te eked dan ebey ikagi te ngadan i Jesus, aw eked dan heman pegtoladà tepad kandin.

¹⁹Meneng timaba si Pedro aw si Juan, kagi dan, “Peg-aneng-aneng kaw aw eden se ibeg te Timanem inangen day, aw sikiyo se toloen day, aw kenà sikandin.

²⁰Eked kay lengà te peg-indan te benal kinità aw dinineg day.”

²¹Meneng labi pa miglamit se menge obanen te simbahan kandan aw migpelowà dan kandan, so wedà dan ketegahi aw eden se ipelumun dan kandan, so dimuyun se kedita te otaw te Timanem te pegkegolì te otaw kapig.

²²Lampas te kepatan se omay te otaw negolian.

²³Pegkelowà i Pedro aw si Juan, dimoton dan te menge doma otaw egpemenal. In-indan dan se kedita te inikagi te menge pengolo aw obanen te simbahan.

²⁴Pegdineg dan kenyan, migtawal-tawal se kedita dan diyà te Timanem, kagi dan, “E Pengolo, sikona se Timanem mig-inang te langit, aw tanà, aw dagat, aw kedita heman niyan.

²⁵Sikona heman se minikagi pineokit te kemonaan day si David egtolò kamno gebii, so pineokit te Espiritu Santo, minikagi sikandin, ‘Meopal se menge otaw kenà Judiyo, aw meglalang se menge Judiyo te medaet, meneng wedad detengan niyan.

²⁶Megsebad se pedowan te menge otaw eglowan dini te keneyonan amon mato dan te Pengolo aw isogò din.’

²⁷Netoman den iyan, so dini te Jerusalem, migsebad se pedowan i Herod, aw si Poncio Pilato, aw menge bowad-bowad i Israel, aw menge doma otaw kenà Judiyo, amon imetayan dan se insogò no si Jesus, pengkey wedad kandin salà. Sikandin se ininang no Misiyas.

²⁸Pengkey inimetayan dan sikandin, meneng se pegketoman niyan, yan se tapay lekat te kamno ibeg.