Oweziwa wa Yinsa 4:4-28

⁴Ila atthu asiiliyeeyo hapari epile aari olupaaye enkeene eyiye omwamini Yinsa. Khwa etthiipo mamuuni khusala avira eekezeleyaka khufiya etthu ya alufu thaanu.

⁵Siikhu yaphiiri khuthukumana afwalume, mashawuriya na anamwaatikha nti wa Yerusaleemu.

⁶Atthu aarivo pi apa: Anaasi, nttunkhulu wa mahaakhimu a tiini, Khayiifwa, Yaahaya, Alishantere na atthu ooshi apale aari oojama wa nttunkhulu wa mahaakhimu a tiini.

⁷Yo khuruma okhuweliwa maaswihaapa apale awiri Pheeturu na Yaahaya. Khusala owoozela araka: “Mwirettaniyeeyo vitthu epi owahi-ni wala nzina-ni?”

⁸Pheeturu aari wa wiitaazaniwa Rooho Ttakatthiifu, khusala alupa awoozaka: “Afwalume na mashawuriya,

⁹yoori mweeyo mwanikhuwela leelo yoori mwinuuzele vitthu zooshaphe ninretteliyeezo ntthu otule woorakala na nanna ovonisiweezo.

¹⁰Ila apho mwijuwe saana mweeyo mooshi mpakha na atthu a nti wa Ezirayeele yooshi yoori khwa nzina la Yinsa Al-Masiihu wa Nazareeti, othuutule mweeyo ena mwankhomeliyeeyo na othuuto Nnyizinku ansisimuliyeeyo muufwa, nzina lawe tthi linvoniyeeyo namarakala otu mwinimoonaaye apha.

¹¹Yinsa othuuto ‘liwe lookatthaliwa ti mweeyo anamajeka manyupa, ila khurettiwa wiiya ti liwe linkhomaazaaye nyupa.’

¹²Khaavo ntthu nkina ariina owahi wa owoosuru atthu: vathi apha wooshivo khahiivo nzina la ntthu nkina linuusurwaaye.”

¹³Attunkhulu apale ooshi khwiiya onshankela Pheeturu na Yaahaya mwaasa wa ominyala aarinaaye, yo khuhaakikhi yoori khweele apa Yinsa ori vamote na-yo.

¹⁴Mwaasa yoori aari oretta omoonaka ntthu otule woorakala aavonisiweeyo, yo khuhisala oona hatha paatuli khwa Yaahaya na Pheeturu.

¹⁵Khuwooza yoori asaruliwemo nnyupa mphule aathukumaneliweemo. Aphano atthunkhulu apale khwaaza onyakulisana atthaaporu,

¹⁶oozelanaka yoori: “Nkahayani niwaarettele niini? Atthu ooshi Yeruzaleemu eti ajuwa yoori yo aretta minjuza zawooneya zihinikheeteyaazo.

¹⁷Apho yoori vitthu epo zihitepe omwajeyela mmuti wooshimo, nlaweni na atthu ooshi asiila, nlaweni niwoopopisa niwoozaka yoori ahirutele owooja atthu vitthu monkoni wa nzina la Yinsa.”

¹⁸Aphano khukhuweliwa Pheeturu na Yaahaya khurutela nnyupa nttumpule aasaruliyeemo, khuriwa yoori ahittakhule hatha etthu na ahisomise monkoni wa Yinsa.

¹⁹Pheeturu na Yaahaya khuwaajipu araka: “Mwinoona yoori etthu ya eto ti yoohaakhi mmakhono wa Nnyizinku wuushututelani mweeyo khunlikha Nnyizinku.

²⁰Fweeyo khaninwahi olikha olupa epile nooniyeezo na nisiiliyeezo.”

²¹Khuwaatutushu khuwoojela khuwaalikha, maana khaari woona etthu woowaahukhumwela na atthu ooshi aari onsifwu Nnyizinku mwaasa wa minjuza epile zarettikhiyeeyo.

²²Mwinyi otule aavonisiweeyo wa minjuzavo aarina hirimu yooziti nyaakha arupayiini.

²³Wakathi Pheeturu na Yaahaya aleviweevo, n'oofiya vahali aarivo ashirikhaaya, khusala awaathatelela zooshi epile aari wuuziwaaye phi attunkhulu a mahaakhimu na anamalokozela a tiini.

²⁴Paata ya ashirikhaaaya apale osiila mattakhuzi apale, ooshi aya khusala alompa araka: “Mbwana, ti weyo wumpiyeeyo pinku na vathi, pahari na vitthu zooshi ziriye voolumwenku.

²⁵Weeyo wattakhula khwa Rooho Ttakatthiifu vakatthi wa papeetthu Daawuuda nrumeya awo oraka: ‘Makaafiri ankatipukhaka-ni wala atthu anaakanyerelaka-ni vitthu zoohiiyi etthiipo?

²⁶Attunkhulu a vathi ajilokottela na afwalume akhusanyeya yoori anlupatthe Mbwana na alupatthe Al-Masiihu otule Ye anthawuliyeeyo.’

²⁷Ekhweele-khweele, Herooti na Pontiyu Pilaatu akusanyeya na makaafiri na atthu akina a Ezirayeele, ooshi ari sitati ethiiti na niiya yonlupattha Yinsa nrumeya awo othuutu onthawaziyeeyo.

²⁸Na theenya amarisela maana aretta zooshi epile weeyo walakeliyeeyo oretta khwa owahi orinaaye.