ZĨRINƆ 28:4-26

⁴Kɛ̀ bɛdeenↄ mlɛ̃̀ pì è dↄ à ↄↄa, aↄ̃ bèkↄ̃nɛ: Gbɛ̃ beee nɛ́ gbɛ̃dɛrimɛ yãpura. Baa kɛ̀ à bikũ̀ íla aafia, yãpuraa e wenɛ àgↄ̃ kuuro.

⁵Mↄde Pↄlu mlɛ̃̀ pì gbã̀kɛ à dà tɛ́n, èe pↄ́ke kɛnɛro.

⁶Gbɛ̃nↄ wɛ́ɛ dↄzi kɛ̀ à ↄↄ é ká à lɛ́ɛ à ga gwe gↄ̃ↄmɛ. Kɛ̀ à gì kɛ̀, aↄ̃ↄ è pↄ́kee e à lero, ben aↄ̃ lɛ́ lìɛ aↄ̃ bè, gbɛ̃ pì nɛ́ tãa ìsi kemɛ.

⁷Guu pì saɛn luan gbɛ̃nsi kɛ̀ wè benɛ Publiu bɛɛ kún. À wa diɛ gurↄ aagↄ̃ à nibↄkɛɛ kɛ̀we kↄ̃n yenzio.

⁸Publiu dee daɛna kↄ̃n mɛ̀wãao èe bãndubãndu kɛɛ. Ben Pↄlu gɛ̃̀ à kiia à adua kɛ̀nɛ, à ↄ kɛ̀a à à kɛ̃̀kↄ̃a.

⁹Kɛ̀ à kɛ̀ lɛ, luan pì gyãre kpaaanↄ mↄ̀ à kiia, ben aↄ̃ kɛ̃̀kↄ̃a se.

¹⁰Aↄ̃ wa kpe dà maamaa. Kɛ̀ wée taa, aↄ̃ kũsãɛ kɛ̀we dↄ.

¹¹Wa kuuna luan pì guu mↄ aagↄ̃ↄ gbɛra wa gɛ̃ góro'itɛ kɛ̀ buusiɛ blè gween wa da zɛ́n. Góro pì bↄ̀ Alɛsandaria wà sìka tãanↄ sèeda kɛ̀a.

¹²Kɛ̀ wa ka Sirakusi, wa gurↄ aagↄ̃ↄ kɛ̀ gwe.

¹³Bↄna gwe wa dↄ ígɛɛzi ai wa gaa káo Rɛgiumu. Kɛ̀ guu dↄ̀ ĩa bↄ̀ sↄↄmɛtɛ kpa, à gurↄ plaadeen wa ka Putɛↄli.

¹⁴Wɛ́tɛ pì guun wa Yesudeenↄ lèn. Aↄ̃ bè wà sùu kɛ wà azuma doo kɛńyo. Wá kɛ̀ lɛ, ben wa da Romu zɛ́n.

¹⁵Romu Yesudeenↄ wa baaru mà, ben aↄ̃ mↄ̀ dawalɛ. Gbɛ̃kenↄ wa le Apiu Yàran, gbɛ̃kenↄ sↄ̃ guu kɛ̀ wè be Pitakimɛn'aagↄ̃n. Kɛ̀ Pↄlu ń é, à Luda sáabu kpà à a làakari kpàɛ.

¹⁶Kɛ̀ wa ka Romu, wà Pↄlu gbà zɛ́ àgↄ̃ kuu adona kↄ̃n soza kɛ̀ eégↄ̃ à dãkpaao.

¹⁷Gurↄ aagↄ̃ↄ gbɛra Pↄlu Yuda gbɛ̃nsinↄ sìsi. Kɛ̀ aↄ̃ kàkↄ̃a, à bèńnɛ: Ma gbɛ̃nↄ, mɛ́ɛ zã Yudanↄnɛ yãkearo. Mɛ́ɛ bↄ wa dezinↄ fɛɛakaarayãke kpɛɛro, ben wà ma kũ Yerusalɛmu wà ma kpa Romudeenↄa.

¹⁸Aↄ̃ ma lala yãzi aↄ̃ↄe yãke e ma musu kɛ̀ kà wà ma dɛro, ben aↄ̃ↄ yezi wà ma gbarɛ.

¹⁹Ben Yudanↄ bↄ̀ ma kpɛɛ. Tiasi ma zɛ kↄ̃n gana Siza kiiao, èe kɛ má yã vĩ kↄ̃n ma bùsu gbɛ̃nↄonlo.

²⁰Beee yãnzi ma a gbeka, lɛ wà kↄ̃ e mà yã oao, zaakɛ gbɛ̃ kɛ̀ Isarailinↄ wɛ́ɛ dↄzi yãnzin wà mↄ̀ kɛ̀ kàmazi.

²¹Ben aↄ̃ bènɛ: Wée takada ke e à bↄ̀ Yudea bùsun n yã musuro. Wa gbɛ̃ke sↄ̃ↄ e bↄ gwe à sùwe kↄ̃n n baaru zaaaoro.

²²Wá è à maa wà yã kɛ̀ ń vĩi ma n lɛ́zĩ, zaakɛ wá mà kɛ̀ wè dↄnzizɛ pì zaa bo gu píngiamɛ.

²³Aↄ̃ gurↄↄ dìɛkↄ̃nɛ kↄ̃n Pↄluo, ben aↄ̃ mↄ̀ à kiia ua kɛ̀ à pìtan paripari. À yezi aↄ̃ↄ a yãzɛ dↄ̃ Yesu yã musu, ben à nà Musa dokaa kↄ̃n annabinↄ yãnↄ, à kpata kɛ̀ bↄ̀ Luda kiia yã òńnɛ à bↄ̀kↄ̃tɛńnɛ zaa kↄngↄ ai uusiɛ.

²⁴Gbɛ̃kenↄ yã kɛ̀ èe oonↄ zɛ́ è, mↄde gbɛ̃kenↄ gìzi.

²⁵Kɛ̀ aↄ̃ↄe kɛ̃ɛkↄ̃a kↄ̃n lɛokpakↄ̃ao, Pↄlu yã mɛ̀n doo kàarańnɛ à bè: Yã kɛ̀ Luda Ninii dà annabi Isayanɛ à ò a dezinↄnɛ nɛ́ yãpuraamɛ, kɛ̀ à bè:

²⁶Ǹ gá ǹ o gbɛ̃ mↄ̀nↄnɛ, aↄ̃égↄ̃ swã kpaa yãkemana sai, aↄ̃égↄ̃ guu gwaa yãke'ena sai.