Aposel 28:4-26

⁴Ning a taraila miting na lolo la oroi mang a soi i kulam kes ana kuna e Pol, la awara artalai la mange, “Ngandek a barsan ne, a tena umkol a tarai. Pa i laun ot miting latasi, ika a god na arkeles bel i malmaling sur ir laun.”

⁵Ika e Pol i lakran sen a soi kusun a kuna usaot na iah, pa bel i alaulau i.

⁶La nuki mang a palaona ir surung, o ir punga purum pa aiap ka ir mat. Ika, ning la harnanai kol pa bel ta laulau a utna i han tar ono, la lingir ulak a nuknukinla, pa la atongi mang e Pol ning a god.

⁷E Publius, a leklek a ningnigo tagun a lolo ne, anuna kabalapiula i kes milau. I ben pas mila uting na nuna rumai, pa i agasgas mila. Pa mila kes pas natola pukakiar ting na nuna rumai.

⁸E tamana e Publius i kurah ana laplapang pa balsal, pa i borbor. Pa e Pol i kas teteki, pa i nunung, pa i suah naur a kuna saot ono, pa i alangolango pasi.

⁹Ning i toli larne, la rop ning la kurah ting na lolo la hanot pa di alangolango la.

¹⁰Pa la asangan anunla hanrawai tetek mila ana galis a wakak a titol. Ning mila kas ulak ana sip sur milar han ma, la tabar mila ana ututnala rop ning mila kapan suri.

¹¹Lamur ana natol a kalang, mila kas ana ning a sip ning i nanan sen a kalang a wuwu ting na lolo. A sip ning, mitimo e Aleksandria pa salanigo ono di ka kot tar a manar ana naur a kasang, a naur a nat a god Sus.

¹²Mila sot pas ting e Sirakus, pa mila kes pas natola pukakiar.

¹³Mila han mitingia pa mila sot tumo e Regium. Pa ana pukakiar lamur, a tobar i hanot. Pa ana ning a pukakiar ulak lamur tana, mila sot ting e Puteoli.

¹⁴Mila pastetek pas dingla na tastasimila ana tortorot tingia, pa la ben mila sur milar kes pas ta wik napirin la. Lamur, mila han utumo e Rom.

¹⁵La ning la tas ana tortorot tingia, la longor a warwara omila, pa la han barat mila tumo na hanua na sisiurai di atongi e Apius, pa tumo ana hanua di atongi Natol a Rumai a Borbor. Ning e Pol i oroi pas la, i atong wakak tetek e God, pa a ututnala ning i arakrakai anuna lalaun.

¹⁶Ning mila hanot uto e Rom, di malmaling tar e Pol sur i ot masik ir kes ana ta rumai, pa ta tena harum ir tai alari.

¹⁷Lamur ana natola pukakiar, e Pol i kabah taum a ningnigola anuna tarai Juda. Pa ning la hanot taum, i atai la mange, “Na tastasikla, bel a alaulau anundala na tarai, pa a toltol anuna tumtubundala tagun nating. Ika la tong akes pas iau, pa la saran tar iau tana tarai Rom saot e Jerusalem.

¹⁸Pa ning a tarai Rom la ka longor tar a warwara ning a alar iau ono, la mang sur lar pak sen iau, anasa bel la pastek ta utna ning ar hirua ono.

¹⁹A tarai Juda bel la malmaling, pa bel a pastek pas ta ngas ning ar langolango onoi, pa a nunung sur e Sisar ir warkurai iau. Ika bel ta laulau a utna ning ar arup anuka tarai ono.

²⁰A kamkamna ne ning a arsune sur mulo sur ar oroi mulo, pa dalar warwara taum. Di sen akes tar iau anasa a harnanai ana tortorot sur esaning a tarai Israel otleng la harnanai suri.”

²¹Pa la kelesi mange, “Bel ta pas mitimo e Judia i hanot tetek mila hom, pa bel ta tasimila mitimo ning i hanot te i ususrai hom pa i warwara talapor hom anal laulauna ning u tol tari.

²²Mila mang sur milar longor anumal warwara, anasa mila ka longor tari mang, di atong laulau a tona lotu ne ting na hananuala.”

²³La kubus pas ning a pukakiar sur lar warwara taum o e Pol. A kumun a tarai kol la hanot teteki ting na rumai ning i kes ono. Turpasi ana kobot tuk ana rah, i papak tetek la ana matanitu ane God, pa i atai talapor la o e Iesu, tagun a Warkuraila ane Moses pa a buk anuna propetla sur lar tortorot.

²⁴Dingla na tarai tagun la, la tortorot ana sa ning e Pol i atongi, ika dingla bel la tortorot.

²⁵La arlak na arpotor in la. Ning la tur sur lar han, e Pol i atong a ararop na warwara tetek la mange, “A momolna ot ning a Talngan Tabu i atongi ana pahana propet Aisaia, tetek na tumtubumulo tagun nating mange,

²⁶‘Ur han tetek a taraila ne pa ur atai la mange, Mulor longori pa mulor longori, ika bel mulor longor lalani, mulor oroi pa mulor oroi, ika bel mulor oroi lalani.