Yuhaana 4:43-54

⁴³No Yeesu waɗi ton balɗe ɗiɗi, o witti Galili.

⁴⁴Kanko e hoore makko o seedike, o wi'i: «Annabiijo teddintaake der leydi mum.»

⁴⁵No o yottii Galili, Galilinkeeɓe jaɓɓorii mo juuɗe ɗiɗi, gam kamɓe bo ɓe jahiino juulɗe Urusaliima, ɓe ji'iino ko o waɗi ton fu.

⁴⁶Den Yeesu warti Kana, der leydi Galili to o waylitinnoo diyam laatii jaram. Tawi ɓii gorko semmenteejo gom, yanɗaa, e fukkii Kafarnahum.

⁴⁷Semmenteejo on nani Yeesu ƴiwii Yahudiya, warii Galili. O yahi to makko, o eeli mo o yaha o nyawtaa ɓiyiiko ɓadiiɗo maayugo.

⁴⁸Yeesu wi'i mo: «Abada on goonɗintaa, to on ji'ay kaayeefiiji e haaynaareeji.»

⁴⁹Semmenteejo on wi'i mo: «Moodibbo, en jahu diga ɓiyam maayay.»

⁵⁰Yeesu wi'i mo: «Hootu, ɓiya e wuuri.» Gorko on goonɗini ko Yeesu bati ɗum, witti.

⁵¹E laawol, gollooɓe makko fotti e makko, wi'i mo ɓiyiiko yoofike.

⁵²O ƴami ɓe: «Wakkati dey o yoofii?» Ɓe toontii mo, ɓe bi'i: «Keenya juura jonte ɗen yoofi mo.»

⁵³Baabiiko anniti wakkati oo ɗon nun lalley Yeesu wi'i mo: «Ɓiya yoofike!» Kanko e getti makko fu, ɓe goonɗini Yeesu.

⁵⁴Ɗum ɗon woni kaayeefi ɗiɗaɓi ki Yeesu waɗi Galili, no ƴiwunoo Yahudiya.