Juan 4:43-54

⁴³Hua sötiepa de inu ume tunale, oquixoac de ompa, hua biloac ca estado de Galilea.

⁴⁴Pos sie yejuatzi Jesús oquejtojque que sente tlayulepante ipa ipuieblo amo öque ipa quejta.

⁴⁵Hua cuöc oaxihuaco pan Galilea, inu giente de Galilea tieselejque, ipampa oquejtaque noche sösantle tli oquechijque ipa ciudad de Jerusalén ipa inu tunale de yelfetl. Pues yejua nuyejque ompa oyejyeya ipa yelfetl.

⁴⁶Ohualiloac ocsajpa ipa Caná de Galilea, cöne inu ötzintle oquecuejque vino. Hua oyeya ipa inu puieblo de Capernaum sente tlatequepano de rey. Iconie mococoöya.

⁴⁷Ini nönca, cuöc oquecac que Jesús hualiloac de Judea para Galilea, ohuöla tietlac, hua tietlötlajtiöya ma biloa ichö, hua ma quepajticö iconie, ipampa ye oyeya para meques.

⁴⁸Yecuöquenu oquelfejque Jesús: ―Nemejua de porsi amo nenqueneque nemoneltocasque tlö amo nenquejta sieñas de tietzöbetl hua bieye tlachihualestle.

⁴⁹Itlatequepano rey oquejto: ―Tlöcatzintle, xemaxetite nochö antes meques noconie.

⁵⁰Hua oquelfejque Jesús: ―Xebeya, moconie neme. Hua inu nieca tlöcatl omoneltocac ica tietlajtul tli Jesús oquelfejque, hua uya.

⁵¹Cuöc yaja ohualiehuaya itlatequepanojua oquenömequeto, hua quemachestejque que iconie neme.

⁵²Yecuöquenu yaja oquentlajtlane tlin ura opie omoyectlöle. Entunses oquelfejque: ―Iyöla pa sie ura oquecö totunealestle.

⁵³Yecuöquenu yaja ocasojcömat que omochi ipa nieca ura cuöc Jesús oquelfejque: “Moconie neme”. Omoneltocac yaja hua tli oyejyeya pa ichö nuyejque omoneltocaque.

⁵⁴Ejqueu por segunda vez Jesús oquechijque sente sieñas de tietzöbetl, sötiepa de que ohualiloac de Judea ca pa Galilea.