Yohanis 4:1-9

¹Mete ma nakasasama Yohanis no Yesus, na, Yesus ana mana tungga nala mulai salani hataholi noꞌun lena heni hataholi fo Yohanis salani sala. Yesus mesa kana taa salani hataholi, kada Ndia ana mana tungga nala salani hataholi. Boe ma faik fo Yesus bubuluk nae, hataholi maleme partei anggama Farisi lamanene lae, ala salani hataholi noꞌuk lena so,

³boe ma Ndia no Ndia ana mana tungga nala laꞌo ela propinsi Yudea, fo ala fali leni propinsi Galelea leu.

⁴Tehuu ala musi laꞌok lesik propinsi Samaria, fo lakandoo leni propinsi Galelea leu.

⁵Ala laꞌok, de ala losa kota esa nai propinsi Samaria, nade Sikar, deka-deka no dae fo baꞌi Yakob feen neu ndia anan Yusuf.

⁶Nai ndia hambu oedolu esa nade, ‘oedolu Yakob’. Ledo namatetu boe ma Yesus asa losa ndia. Ana nameda manggu neme sila lalaꞌon mai, de Ana nanggatuuk hahae aok nai oedolu ndia. Boe ma Ndia ana mana tungga nala laꞌo ela Ndia mesa kana nai ndia, fo leu hasa nanaꞌak nai kota. Boe ma inak esa neme kota ndia mai, fo neu lemba oe nai oedolu ndia. Yesus noke ndia nae, “Kaꞌa aa. Au bisa oke oe nininuk fa do?”

⁹Tehuu inak ndia nggengge, huu hataholi Yahudi la taa lateme lakabubua lo hataholi Samaria. Boe ma ana natane nasafali Yesus nae, “Wei! Ama hataholi Yahudi do? Au ia hataholi Samaria. Taa sala ia do? Ama moke au oe fo minu do?”