Yoane 10:18-40

¹⁸Ambo naŋa ma asâu papa tia, ande tamâta toŋge ma ikura tu ipu naŋa pâta amâte, ande tia ndo. Naŋa warakâŋgu iloŋgu patea tu ma asâu panzi tu sipu naŋa pâta amâte. Naŋa akura tu aveta mine, aku akura tu amandi amo viâŋgu kilo. Naŋa Mama muŋga itu ŋgua kaika pa naŋa tu ma aveta mine.”

¹⁹Kinzi Juda tamâta nde siloŋo Yesu ne ŋgua ŋine lâ, ŋineŋga sipwa pwataki simo ŋgu rua kilo.

²⁰Kinzi pinde rârâ siporo tu, “Koroani saka ipakâe kuku i, aku iveta ipâŋga kapa lâ. Mine nde ŋana sâ kâ ŋga miki katambira taŋami ŋana i ne ŋgua kâ, a?”

²¹Aŋga pinde nde siporo tu, “Ambo koroani saka ipakâe kuku i, ande i ma ikura tu iporo ŋgua kie mine tia ndo. I muŋga iveta tamâta mata leva-leva imora pwataki, aku koroani saka ikura tu iveta mine tia ndo!”

²²Ŋinde ilâ lâ, ŋineŋga Juda nenzi kumbwa ŋalae toŋge nde ipâŋga lâ Jerusalem lawea. Lâ kumbwa ŋinde, kinzi uru siveta kâŋa-nuŋa ku sindeka ŋana zo muŋgâŋa kinzi timbunzi sikai nzâla piti ŋana Maro Kindeni ne luma sapâŋa kâ. Kumbwa ŋinde uru ipâŋga lâ pisi ne zoni.

²³Aku Yesu nde imo Jerusalem, ku ipete ilâ Maro Kindeni ne luma sapâŋa ne ŋgumbi ilo, lâ nia toŋge sipatu ŋa tu Solomon ne Pâpâta.

²⁴Ŋineŋga kinzi Juda tamâta pinde simâ simandi siŋge Yesu, aku sikasoŋa tu, “Noko ma kuveta iloma paŋgereŋa ikura zo ŋapia kilo, a? Noko nde ea. Ambo noko nde Kirisi, ande kuporo ŋgua mao pwataki pa maka kaloŋo.”

²⁵Andeta Yesu itu lâ kawanzi tu, “Naŋa muŋga aporo ŋine pwataki pami kaloŋo lâ, andeta miki kalomi tawana tia. Naŋa akai Mama ndamwa, kala uru aveta mâsi kaika pinde. Aku naneŋgu vetâŋa ŋinde itula kilalâŋgu pwataki.

²⁶Andeta miki nde naneŋgu lama tia. Mine kala miki ŋandai kalomi tawana naŋa ŋga.

²⁷Naneŋgu lama uru sipono muli pa kawâŋgu ŋgua. Naŋa asama kinzi kilalanzi lâ, aku kinzi uru soka muliŋgu.

²⁸Naŋa via mao alanzi, ŋana ma simo vianzi ku simo nâ. Aku kinzi ŋana naonzi tia kâ, ande tia ndo. Tamâta toŋge ikura tu itapanzi piti lâ naŋa mbauŋgu ilo, ande tia ndo kanaŋo.

²⁹Ŋana tu naŋa Mama ionzi lama ŋinde simâ pa naŋa lâ, aku i tamwata ikai maro pa kelekele ndoni. Mine kala tamâta toŋge ikura tu itapanzi piti lâ Mama mbau ilo, ande tia ndo.

³⁰Maka rua Mama rua nde taituni.”

³¹Kinzi Juda tamâta siloŋo ŋgua ŋine, ŋineŋga mbaunzi ilâ sikai mira kilo ŋana sisia Yesu pâta imâte kâ.

³²Andeta Yesu ipainzi tu, “Naŋa muŋga aveta vetâŋa ara rârâ lâ miki naomi, ikura Mama ipatea pa naŋa mine. Ayo, miki kalomi ŋgere ŋana vetâŋa ara ndia kala kakai mira tu kasia naŋa, a?”

³³Andeta kinzi siporo taulo tu, “Maka kaloma ŋgere ŋana noko ne vetâŋa ara toŋge tia. Taitu noko muŋga nâ kuporo ŋgua sakamao ndo lâ Maro Kindeni nao. Noko nde tamâta kaa nâ, andeta kuporo tu noko tamwata nde Maro Kindeni. Ŋana ŋgua ŋine kâ maka kakai mira ŋana kasiano.”

³⁴Ŋineŋga Yesu ipainzi tu, “Maro Kindeni kawa ŋgua ikeno nemi ŋgua tukuŋa ne pepa tini mine tu, ‘Nanayoni naŋa aporo mine tu miki nde maro ŋalaŋala’.

³⁵Muŋga, Maro Kindeni itula ŋgua ŋine pwataki panzi tamâta pinde, aku ipainzi tu, ‘Miki nde maro ŋalaŋala’. Aku Maro Kindeni kawa ŋgua rârâni ikeno lâ pepa tini nde mao kanaŋo, ma ikeno mine ku imo nâ.

³⁶Aku nia ndoyo, Mama tamwata ipatea naŋa ku isupwana amâ amo tâno kulu. Mine kala lâ zo ŋana naŋa aporo tu, ‘Naŋa nde Maro Kindeni Natu’, ande ŋana sâ kâ ŋga miki kaporo tu, ‘Noko kuporo ŋgua sakamao ndo lâ Maro Kindeni nao’, a?

³⁷Ambo naŋa aveta Mama ne wurâta tia, ande ara, miki ma kalomi tawana naneŋgu ŋgua ndimo.

³⁸Andeta mao nâ, naŋa uru aveta Mama ne wurâta. Ambo miki tinimi pwâka tu kalomi tawana naneŋgu ŋgua, ande ikeno pami; andeta miki ma tinimi pwâka tu kalomi tawana mâsi kaika naŋa uru aveta ŋinde, mine ndimo. Ambo miki ma kalomi tawana mâsi kaika ŋinde, ande ma kasama sondo tu Mama ipaipa kuku naŋa, aku naŋa kala apaipa kuku Mama mine nâ.”

³⁹Yesu iporo ŋgua ŋine lâ, ŋineŋga kinzi siveta kilo ŋana sikale i kaika kâ. Andeta Yesu iŋgeŋgeana ŋananzi, aku ilâ lâ.

⁴⁰Ŋineŋga Yesu imbwaliu pa Jodan Lââ tini pinde, aku itaulo ilâ nia ŋinde muŋga Yoane Lââ-Liliŋa Tamwata ililinzi tamâta. Aku imo niani ndaina ikura zo pinde.