San Juan 10:18-40

¹⁸Ni ɨɨn ñayiu ña kida xa kuú‑r. Kaꞌni ñaꞌa koio‑s, ko duꞌa koo xaxeꞌe xa duꞌa koo. Xiꞌin xa taxnuni mee‑r kuú‑r, te xiꞌin xa taxnuni mee‑r nandoto‑r. Duꞌa n‑taꞌu tniu Taa‑r, te duꞌa koo.

¹⁹Xaxeꞌe tnuꞌu yaꞌa, te ɨnka vuelta ña n‑ka xani ini ɨɨn nuu se Israel.

²⁰Kueꞌe‑s n‑ka jaꞌan: —Tachi uꞌu ñuꞌu anu‑s, n‑nduloko‑s. ¿Nakuenda ka chinuu‑n tnuꞌu jaꞌan‑s?

²¹Ko dava ka‑s n‑ka jaꞌan: —Vaꞌa jaꞌan‑s, ñatu ñuꞌu tachi uꞌu anu‑s. Chi ña kuaꞌa tachi uꞌu kada‑i xa kundeꞌa ñayiu n‑xo kukuaa nde na n‑kaku‑i.

²²Te n‑xio ɨɨn viko ñayiu Israel. Ñuu nani Jerusalén n‑ka xo najaꞌan ñayiu nanda n‑ka kida ii taxaꞌnu tnetnu‑ro veñuꞌu ñayiu Israel. Te yoo vixi kuu daa.

²³N‑xikonuu Jesús xiti veñuꞌu Jerusalén. N‑xikonuu‑ia nuu nani Portal Salomón.

²⁴Ijan n‑ka dukunduu se Israel Jesús, te n‑ka jaꞌan‑s: —Io xa jaꞌan kaxi‑n. Nux mee‑n kuu Cristu, Ia n‑tundaꞌa ñaꞌa Ianyuux, kachitnuñaꞌa‑n.

²⁵N‑jaꞌan Jesús: —Xá n‑jaꞌan‑r, te ñayo‑n ka jandixa. N‑tundaꞌa ñaꞌa Taa‑r, te kida‑r tniu n‑taxi‑ia, te tniu kida‑r jaꞌan ndaa xaxeꞌe‑r.

²⁶Ko ñayo‑n ka jandixa, chi ña ka kuu‑n tkachi mee‑r. Nani n‑jaꞌan‑r nuu‑n, duꞌa kuu.

²⁷Tkachi mee‑r ka chinuu tnuꞌu‑r. Xini‑r mee‑i, te xndijun ñaꞌa‑i mee‑r.

²⁸Te kada‑r xa kutuu vaꞌa koio‑i, xiꞌin Ianyuux kuia ma jɨn ndɨꞌɨ. Ni ɨɨn‑i, nuncas ma kuú‑i xiꞌin kuechi‑i. Te ni ɨɨn ñayiu ma kuaꞌa xa tnɨɨ‑i tkachi‑r yɨndaꞌa‑r.

²⁹Taa‑r n‑taxi tkachi‑r, te kunxaꞌnu ka mee‑ia dada ntdaa xa io. Mayo ñayiu kuaꞌa, te ni kuiꞌna ma kuaꞌa, xa dita‑i tkachi mee‑r nevaꞌa Taa‑r ndaꞌa‑ia.

³⁰Te ɨɨn nuu kuu mee‑r xiꞌin Taa‑r, idini ka kuu‑r.

³¹Te ɨnka vuelta n‑ka tnɨɨ se Israel yuú xa kaꞌni‑s‑ia.

³²N‑jaꞌan Jesús: —N‑taxi Taa‑r kueꞌe tniu vaꞌa, te n‑dandeꞌa ñaꞌa‑r tniu jan nuu mee‑n. ¿Xaxeꞌe ndeda ɨɨn tniu n‑kida‑r, ka juini‑n xa kaꞌni ñaꞌa‑n yuú?

³³N‑ka jaꞌan‑s: —Ñayo‑r ka janñaꞌa xaxeꞌe tniu vaꞌa kida‑n. Kaꞌni ñaꞌa koio‑r xaxeꞌe xa kuiꞌa jaꞌan‑n Taa‑ro Ianyuux. Seyɨɨ kuu‑n, ko jaꞌan‑n xa Ianyuux kuu‑n.

³⁴N‑jaꞌan Jesús: —¿Nax jaꞌan tnuꞌu n‑chidotnuni Moisés? Yodotnuni xa n‑jaꞌan Ianyuux: “Mee‑n ka kuu ianyuux.”

³⁵N‑danani‑ia se ijan ianyuux, chi n‑ka tnɨɨ‑s tnuꞌu Ianyuux. Tnuꞌu Ianyuux n‑chidotnuni Moisés kuu, te io xa chinuu‑ro tnuꞌu jan.

³⁶Xijan kuu xa, ¿nax kuu xa ka jaꞌan‑n xa kuiꞌa jaꞌan mee‑r nuu Ianyuux, hora n‑jaꞌan‑r xa kuu‑r Daꞌya Yɨɨ Ianyuux? Kuu‑r Ia n‑kaxí ñaꞌa‑ia, kuu‑r Ia n‑tundaꞌa ñaꞌa‑ia vaxi‑r ñuñayiu.

³⁷Nux ña kida‑r tniu Taa‑r, te maxku jandixa ñaꞌa koio‑n.

³⁸Ko nux kida‑r tniu Taa‑r, te io xa jandixa koio‑n tniu‑r. Juini ma jandixa ñaꞌa koio‑n mee‑r, ko io xa jandixa koio‑n tniu kida‑r. Xijan jini koio‑n xa kunduu Taa‑r xiꞌin mee‑r te kunduu mee‑r xiꞌin Taa‑r. Xijan kutnuni ini koio‑n xa Taa‑r xiꞌin mee‑r, idini xa kuu‑r nduu‑r.

³⁹Xijan kuu xa ɨnka vuelta n‑ka kixeꞌe‑s xa tnɨɨ presu koio‑s‑ia, ko n‑kaku‑ia ndaꞌa‑s.

⁴⁰Te juaꞌan Jesús ɨnka vuelta, n‑yaꞌa‑ia deꞌva Jordán, nde nuu kiꞌna nuu n‑dajuendute Sua ñayiu. Ijan n‑xo tuu Jesús.