Ioanes 10:18-40

¹⁸Sota me ki sang ia, pwe pein ngai kidi. I manaman ong kidi maur i, I pil manaman ong kapure dong ia. Kusoned pot et I aleer sang ren Sam ai.

¹⁹Iei me Sus oko ap pil liak toror pasang pweki masan pukat.

²⁰Me toto re ’rail indada: A tanwar en tewil o iakalar. Menda komail rong i?

²¹Akai me indada: Kaidik padak en tanwar en tewil pukat, da, tewil pan kak kapad pasang mas en me maskun amen?

²²A ran en isimas en im en kaudok wiaui nan Ierusalem, i ansaun kapau.

²³A Iesus kotikot sili nan im en kaudok, nan palang en Salomo.

²⁴Sus oko kapili pena i indang i: Arai da komui pan okioki sang kit? Ma komui Kristus, en kadede ong kit sansal!

²⁵Iesus kotin masani ong irail: I indai ong komail er, a komail sota poson dodok kan, me I wiadar ni mar en Sam ai, iei me kin kadede ia.

²⁶A komail sota poson, pwe komail kaidik kisan nai sip, duen me I indai ong komail er.

²⁷Nai sip oko kin rong ngil ai, a I asa irail a re kin idauen ia.

²⁸A I ki ong irail maur soutuk, a re sota pan salongala kokolata, o sota, me pan ki sang irail nan pa i.

²⁹Sam ai, me ki ong ia irail, me lapa sang meakaros, o sota me pan kak ki sang irail ni lim en Sam ai.

³⁰Ngai o Sam me ta men.

³¹Sus oko ap pil rik takai, pwen kasuk i.

³²Iesus kotin sapeng irail: Dodok mau toto, me I kasale ong komail er sang ren Sam o, a menia dodok ren mepukat, me komail kate kin ia?

³³Sus oko ap sapeng i: Kaidik dodok mau eu, me se kate kin komui, a pweki lalaue, o pweki aramas amen koe, me wia kin pein uk Kot,

³⁴Iesus kotin sapeng irail: A so intingidier nan omail kapung: I indada, komail kot akan,

³⁵Ari, ma a kin wia kin ir kot, me aleer masan en Kot, pwe kisin likau kan sota kak sapungala;

³⁶A komail kin inda kin i, me Sam a kasarauialar, o kadara dong sappa, koe lalaue, pweki ai indada: Sapwilim en Kot ngai?

³⁷Ma I so wiawia dodok kan en Sam ai, komail der kamelele ia.

³⁸A ma I kin wiawia, komail en posonki dodok kan, ma komail sota poson ia, pwe komail en asa o poson, me Sam ai podidi ong ia, o ngai podidi ong i.

³⁹Irail ap pil song saikidi i. I ari piti sang ni pa ’rail.

⁴⁰O kotin purelang palilan Iordan, wasa Ioanes kin wia paptais ia mas; I ari kotikot wasa o.