Juan 10:18-40

¹⁸Buna cue abɨ báɨroñeite, mei íadɨ dama cue comecɨ izói fécaitɨcue. Cue áfena fecáredɨcue, ie mei meine áfena llɨ́ɨnoredɨcue. Afe bie cue Moo cue ocuilla dɨeze, —daɨde.

¹⁹Judíuaɨ afe uaina cacáillano bócoɨzitiaɨoɨ.

²⁰Afémacɨmona aillo daɨdíaɨoɨ: —¿Nɨbái mei uai jeire otɨ́omoɨ? Afémɨemo fɨénide jóriaɨ íllaza, íemo uáɨritaide, —daɨdíaɨoɨ.

²¹Mei íadɨ jɨáɨmacɨ daɨdíaɨoɨ: —Fɨénidena jóriaɨredɨmɨe jaca afe izói úrinide, —daɨdíaɨoɨ. Fɨénide joreño uina cɨ́oiñedɨmɨe uina cɨ́oitanide.

²²Jae rozíruillaruillaɨ. Afe llezica Jerusalemo ɨráɨzillafue fɨnódiaɨoɨ, gaɨríraco Juzíñamuimo oni íficaillarui uibíñoicaillena.

²³Jesús Salomón macáranodo gaɨríracomo macade.

²⁴Judíuaɨ Jesumo ífoɨna gaɨríllano daɨdíaɨoɨ: —¿Nɨe dɨnó caɨna fɨgo onótañeitɨo? O Crístodɨo raɨre uáfodo caɨmo llone, —daɨdíaɨoɨ.

²⁵Jira Jesús uai ote: —Jae llotɨcue íadɨ cuena ɨ́ɨnoñedɨomoɨ. Cue fɨnócafuiaɨ cue Moo rɨ́inodo fɨnódɨcue. Afedo ñue jino ácatagacue.

²⁶Mei íadɨ cuena ɨ́ɨnoñedɨomoɨ, cue ovéjaɨaɨñedɨomoɨza. Afena naui ómoɨna daɨdɨcue.

²⁷Cue ovéjaɨaɨ cue uaina onode. Iaɨoɨna onódɨcue, jira cuedo bitíaɨoɨ.

²⁸Zíiñona cáaillɨno íaɨoɨmo fecádɨcue. Jaca afémacɨmona dáamɨe nɨné báɨizaiñeite. Buna cúemona íaɨoɨmona daa báɨroñeite.

²⁹Afémacɨ cue Moo cuemo iga. Afémɨe jamánomoidɨmɨe. Nana baɨmo jáidɨmɨe. Buna cue Moo Juzíñamuimona afémacɨna baɨrónide.

³⁰Cue, cue Moo dɨga dáamɨedɨcoco, —daɨde.

³¹Iemona judíuaɨ meine íena nofɨ́cɨaɨna nitáacadiaɨoɨ.

³²Jira Jesús daɨde: —Omoɨ eróicana dɨga ñúefuiaɨna cue Moo rɨ́inodo fɨnódɨcue. ¿Nɨfue ɨ́coɨnia nofɨ́cɨaɨdo cue níjɨitɨomoɨ? —daɨde.

³³Jira judíuaɨ uai otíaɨoɨ: —Ñúefuiaɨ o fɨ́nuamona ona níjɨiñeitɨcaɨ; mei íadɨ o uáillaɨdo Juzíñamuina báiñotɨo. Fia ɨímadɨo, mei íadɨ Juzíñamuina o abɨ́ maméacadɨo, —daɨdíaɨoɨ.

³⁴Jira Jesús daɨde: —Omoɨ ocuínafuiaɨmo Juzíñamui daɨna jae cuega. Be nɨ́uai: “Omoɨ juzíñamuillaɨdɨomoɨ.”

³⁵Cuegáuai dáɨnana jaca jáanonide, onódɨcaɨza. Juzíñamui, ie uaillaɨ llɨ́ɨnotɨmɨiaɨna juzíñamuillaɨna mameide.

³⁶Juzíñamui jae cuena oni íficaitajano bie énɨemo cuena orede. Ua ie orécamɨedɨcue. Jira ¿nɨe izói dáɨitɨo “Juzíñamuina báiñotɨo” cue daɨíadɨ “Juzíñamui Jitódɨcue”?

³⁷Cue Moo fɨnoca izói cue fɨnóñenia, mai cuena omoɨ ɨ́ɨnoñeno.

³⁸Mei íadɨ ie fɨnócafue izói cue fɨnóadɨ, mai aféfuiaɨna ɨɨno, omoɨ naɨ cuena ɨ́ɨnoñenia. Afemona cue Moo cuemo íllana, jabe ónoitɨomoɨ. Daje izói cue, cue Moomo itɨ́cueza, ónoitɨomoɨ, —daɨde.

³⁹Meine maɨáno íena uíacadiaɨoɨ, mei íadɨ Jesús oni fɨ́nocaide.

⁴⁰Ie mei Jesús Jordán ruicáfellemo meine jaide. Dɨnomo fɨébide. Ua naui Juan báutizanomo ite.