YAKUUB 1:4-22

⁴Dhali dhalki mo jin ṯelu sho’k mo ’tu’da/ mo jin pucuru mo ki um mini ta kum ’borgaŋ gana/ mo dhali ta kun thimin mo mmo’koki har toŋ kamu/ mo.

⁵Waḵki/ jan ṯal ’deŋ kamu/ ’peni bwam um hara moyuḵ mo tani dhalki a’di doṯo’da Arumgimis mo a’di jin c̱iki’da ris ’kwani ka duŋ gana/ mo ki dar gi ŋadhum mo dhali a’di minu c̱i a’di mo be.

⁶Hili dhalki a’di doṯ a’di ki moŋgam gwo is mo ki dar gi bwa jin shinu ’kup̱ mo haali/ a’di jin shina bwa ’kup̱ mo tani wana e ki yi’deŋ ḵumma/ jin bir bakal mo jin boru mo dhali jin ’dasha ’tham mo be.

⁷Haali/ wathi/ c̱aan midi mii diki mii ṯosh ki a’di midi bu’th toŋ kamu/ ’peni Tap̱a mo.

⁸A’di jin ’kona bwa isu/ mo dhali a’di jin gwakalki ya mo e bway piti ’baar mo.

⁹Hili dhalka kana ha’th’ko’d ki kar mo mmokar ’bam piti ki ca mo e mo jin karu a’di ki ca mo

¹⁰dhali a’di jin ta pa ki pa mo e mo jin karu a’di ki gwa’d mo haali/ me’d jandi/ ma sho mo tani a’di midi la p̱e mo be.

¹¹Haala tente/ sulu’d mo ki mom’ba’th piti jin shi’bili to mo dhali a’di ki ḵutha sho mo dhali jandim piti raskin mo dhali jarom piti ’ce’dkunu sho’k mo. Wakan si’da/ wathi/ jin ta pa ki pa mo midi us mo ki jog e bway piti jin ura a’di to isho’k mo be.

¹²Mom’bor mii gom wathi/ jin ’dimki ’kup̱ mo e mompal mo haali/ ki a’di mishki mompal mo tani a’di midi bu’th toŋ’kup̱ gi mondiki/e mo a’di jin on ma Arumgimis gwo is gom uni gwansan kun eni a’di mo be.

¹³Dhalku/ wathiŋ kamu/ ki dhal bway mo ki a’di palu mo mmo/o gwo mo ki: Aha/ pal ma Arumgimis mo. Haali/ Arumgimis molu pal ki tonthus mo dhali a’di ki is piti si’da/ diki pal jan ṯal ’de/ mo be.

¹⁴Hila ris ’kwani ka ’deṯe/ ’deṯe/ palkunu mo ki a’di jin diri’da dir mo dhali cesha bwa en’dap̱ buni mo be.

¹⁵Dhali yan’ko’d mon’dap̱ e ki a’di bwaakunu mo tani a’di dho’thki miinthus mo dhali miinthus ki a’di caki’d mo tani ḵalki mowu mo be.

¹⁶Dhalku/ ki ta uni gun hegu e mo ma, iwaḵ pem kun enka/ mo.

¹⁷Aris tom ’boron gun c̱inu ki me’d mo kun ta kum ’borgaŋ gana/ mo tani uni ’peni momis mo mmothulu/ mo ’pena Baba gi moŋkush mo. E a’di mo tani mo jin aḵuwa aḵ yisa di’da walla ala p̱iyi’d si’da/ ’peni mo jin ṯukuwa ṯu’k mo.

¹⁸’Peni bwam pitiŋ gana/ mo tani a’di ki dho’th ana mo ki gwoŋ gana/ mo ki ana mina ta maman kun ṯwa/a/ ’peni mo/uḵ piti mo be.

¹⁹Mishi gwo yan mo ma, um iwaḵ pem kun enka/ mo. Dhalka ris ’kwani ’baar ka ’deṯe/ ’deṯe/ mer is mo ki jahanne/ mmociḵ gwo mo dhali c̱ori naskina/ mo dhali o gwo mo dhali c̱ori naskina/ mo dhali miiya nyor mo.

²⁰Haala nyor jin miina wathi/ mo tani a’di diki ta to jin mii mo ma ḵar/e goma Arumgimis mo.

²¹Dhali ki mii gi wakan mo tani dhuyi aris tony nyogga/ ’pen ka pije/ mo dhali mii kun ’coḵa’coḵ kun ishin ka enthus mo dhali bu’thki mo jin dhunu is ki gwa’d mo gwo jin sinu mo a’di jin mishki’da ḵashiram bum woṯẖ mo.

²²Hili tayi imanmii gwo mo ma dhali dhalku/ ki ciḵ gwo jasi ’te/ mo mmohe’k is bum e mo.