ᤕᤠᤁᤢᤒ 1:4-22

⁴ᤜᤧᤰᤁᤩᤠᤱ ᤏᤠᤛᤡ ᤌ᤺ᤵᤔᤠᤴ ᤁᤢᤗᤡᤱᤎᤥ ᤁᤧᤳᤗ ᤌᤠᤖᤡᤰ ᤐᤥ᤺ᤖ ᤐᤥ᤺ᤱᤗᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤎᤢᤶᤒᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ᤀᤥ ᤁᤢᤗᤡᤱᤎᤥ ᤔᤧᤱᤃᤧᤵᤔᤏᤠᤒᤠ ᤐᤠ᤺ᤴ ᤌᤣᤀᤠᤱ ᤔᤧᤒᤥ᤺ᤱᤏᤧᤸᤗᤥ॥

⁵ᤁᤖ ᤂᤡᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤁᤧᤈᤥᤃᤡᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤒᤡᤖᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤢᤕᤠ᤺ᤰ ᤔᤧᤸᤗᤧ᤹ᤀᤣ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤁᤧᤏᤠ᤺ᤰᤐᤠᤜᤠ᤹ ᤁᤧᤖᤧᤰ ᤐᤡᤖᤢᤛᤡ᤹ᤖᤥ॥

⁶ᤁᤖ ᤁᤧᤏᤠ᤺ᤰᤐᤠᤸᤗᤧ ᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤂᤥ᤺ᤛᤢᤱ ᤑᤠ᤹ᤀᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤏᤠ᤺ᤰᤋᤢᤖ ᤐᤥ᤺ᤱᤗᤥ॥ ᤆᤵᤆᤡ ᤁᤧᤈᤥ᤺ᤰᤐᤠᤱᤃ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤔᤢ᤺ᤳᤋᤢᤸᤗᤧ ᤘᤠᤜᤱᤅᤥ ᤁᤧᤒᤥ᤺ᤰᤐᤠ ᤘᤠᤓᤧᤸᤗᤧᤱᤅᤡᤴ ᤁᤢᤀᤡᤛᤡ᤺ᤰ ᤕᤥ ᤏᤠ ᤌᤥᤒᤠ ᤐᤥ᤺ᤱᤗᤥ॥

⁷ᤜᤧᤰᤁᤣᤗ᤹ᤖᤡᤰ ᤆᤵᤆᤡ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥᤗᤠᤶ ᤌᤣ ᤐᤠ᤺ᤴᤏᤠᤱ ᤂᤥ᤺ᤛᤢᤱ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤴᤗᤖᤥ॥

⁸ᤂᤧᤱᤃ ᤁᤢᤏᤡᤱᤘᤠ᤹ ᤁᤧᤗᤠᤶᤒᤠ ᤔᤏᤠᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤠᤰ ᤆᤥᤃᤢᤒᤠ ᤕᤠ᤺ᤶᤒᤰᤁᤥ ᤆᤥᤃᤢᤱᤒᤡ ᤔᤧᤈᤥ᤺ᤰᤁᤠᤴᤒᤡ ᤗ᤹ᤖᤥ॥

⁹ᤕᤠᤱᤃᤧᤛᤠ᤹ᤒᤠ ᤏᤛᤠᤏᤡᤒᤠᤴ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤡᤱᤛᤥ ᤀᤡᤱᤎᤠ᤺ᤱ ᤂᤥ᤺ᤛᤢᤸᤗᤧ ᤛ᤺ᤳᤗ ᤐᤥ᤺ᤱᤗᤥ॥

¹⁰ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏ᤺ᤶᤏ᤺ᤶᤒᤠ ᤐᤥ᤺ᤱᤅᤡᤸᤗᤧ ᤛ᤺ᤳᤗ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤃᤧᤗᤧᤶᤒᤠᤀᤠᤱ ᤔᤰᤁᤧᤎᤠ ᤁᤧᤒᤣ᤺ᤰᤐᤠ ᤋᤠᤶᤓᤢᤱ ᤑᤢᤱ ᤁᤢᤀᤡᤛᤡ᤺ᤰ ᤀᤡᤗᤧᤶᤒᤣ᤺ᤰᤗᤥ॥

¹¹ᤌᤣᤀᤠᤱᤓᤧᤸᤗᤧ ᤏᤠᤶᤛᤧᤀᤠᤱ ᤏᤠᤶᤗᤠ᤺ᤱᤔᤠᤸᤗᤧ ᤕᤠ᤺ᤴᤛᤢᤱᤅᤡᤴ ᤜᤣ᤺ᤛᤢ᤹ ᤜᤧᤰᤁᤩᤠᤱ ᤑᤢᤱᤅᤡᤴᤏᤠᤱ ᤔᤰᤌᤠᤀᤠᤱ ᤏᤢ᤺ᤒᤠ ᤁᤢᤎᤠ᤺ᤵᤔᤧᤴ ᤐᤣ᤺ᤰᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤕᤠᤱᤛᤠᤁᤢᤴᤎᤣᤛᤠᤒᤠᤴᤏᤠᤱ ᤂᤢᤏᤧ᤹ ᤕᤠ᤺ᤶᤒᤰ ᤆᤥᤃᤢᤖ ᤐᤳᤋᤡᤸᤗᤧᤀᤣ ᤛᤡ᤺ ᤐᤣ᤺ᤰᤗᤥ॥

¹²ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤏᤠᤛᤡ ᤁᤧᤎ᤺ᤵᤐᤧᤱᤃ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤡᤱᤘᤠ᤹ ᤛᤠ᤹ᤔᤠᤀᤥ ᤌᤠ᤺ᤸᤗᤧ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤋᤡᤆ᤺ᤴ ᤂᤧᤸᤗᤧ ᤂᤥ᤺ᤛᤢ᤹ᤖᤥ॥

¹³ᤜᤧᤰᤁᤩᤠᤱ ᤜᤱᤛᤠ᤹ᤔᤥ ᤁᤧᤎᤠ᤺ᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤱᤛᤠ᤹ᤖᤠᤱᤗᤥ ᤑᤠ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤒᤠ᤺ᤳᤋᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤑᤧᤴ ᤐᤠ᤺ᤴᤗᤠᤶᤒᤠ ᤜᤱᤔᤧᤛᤠ᤹ᤏᤧᤴᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤜᤱᤔᤧᤛᤠ᤹ᤖᤢᤴᤇᤡᤴᤗᤥ॥

¹⁴ᤁᤖ ᤁᤠᤰ ᤔᤏᤠᤜᤠ᤹ ᤀᤠᤒᤠᤅᤣ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤜᤱᤛᤠ᤹ᤔᤥ ᤔᤧᤎᤠ᤺ᤖᤥ॥

¹⁵ᤁᤴ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤀᤠᤏᤡ᤹ ᤀᤠᤕᤢᤰᤁᤠᤱ ᤗᤠᤕᤥ ᤆᤥ᤺ᤰᤔᤠ ᤀᤠᤒᤠᤱᤗᤥ. ᤜᤧᤰᤁᤩᤠᤱ ᤗᤠᤕᤥ᤺ᤸᤗᤧ ᤀᤠᤏᤡ᤹ ᤛᤡ᤺ᤔᤧᤴᤏᤥ ᤀᤠᤍᤣ᤹ᤖᤥ॥

¹⁶ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤡᤱᤗᤧᤰᤁᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥

¹⁷ᤁᤠᤰ ᤏᤢ᤺ᤒᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤐᤷᤎᤠ᤺ᤶᤔᤡᤱᤃ ᤌᤠ᤺ᤱ ᤋᤠᤱᤛᤠᤰᤐᤥ ᤁᤧᤀᤥ᤺ᤵᤐᤠ ᤀᤥ᤺ᤳᤋᤡᤜᤠ᤹ ᤁᤧᤈᤥ᤺ᤰᤐᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤕᤢ᤺ᤖᤥ॥ ᤂᤧᤴ ᤀᤥ᤺ᤳᤋᤡᤜᤠ᤹ᤃ ᤛᤠᤶᤒᤪᤡ᤺ᤵᤐᤠ ᤁᤢᤀᤡᤛᤡ᤺ᤰ ᤗᤧᤱᤒᤣ᤺ᤰ. ᤁᤖ ᤂᤢᤏᤧ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤱᤏᤧᤴᤗᤥ॥

¹⁸ᤂᤢᤏᤧ᤹ ᤆᤥᤃᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤁᤠᤰᤏᤢ ᤋᤃᤡ ᤁᤧᤍᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤆᤠᤛᤥ᤺ᤰ ᤁᤢᤀᤡᤛᤡ᤺ᤰ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤀᤡᤸᤗᤧ ᤛᤧᤰᤂᤠᤒᤠ ᤁᤢᤒᤠ᤺ᤴᤈᤠᤰᤗᤠᤶ ᤁᤢᤛ᤻ᤛᤠ᤺ ᤀᤠᤈᤥᤃᤧᤀᤠᤱ ᤘᤠ᤹॥

¹⁹ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤠᤄᤧᤶᤔᤠᤀᤥ ᤁᤧᤖᤧᤰ ᤆᤠᤳᤋᤧᤶᤔᤧ᤹ᤀᤥ. ᤁᤖ ᤐᤠ᤺ᤵᤔᤠᤀᤥ ᤏᤢ ᤛᤡᤰ ᤐᤥ᤺ᤰᤔᤠᤀᤥ ᤛᤢ᤺ᤛᤧᤶᤔᤧ᤹ᤀᤥ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥

²⁰ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤡᤰᤁᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥

²¹ᤂᤧᤸᤗᤧ ᤆᤥᤃᤢᤸᤗᤧ ᤋᤠᤵᤑᤧ᤺ᤶᤒᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤜᤠ᤹ ᤗᤧᤖᤧᤶᤍᤣ᤺ᤛᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥ ᤗᤣ᤺ᤳᤋᤢᤒᤠ ᤂᤡᤏᤡ᤹ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤐᤠ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤏ᤺ᤶᤏ᤺ᤶᤔᤠᤱ ᤋᤠ᤺ᤰᤋᤧᤶᤔᤧ᤹ᤀᤥ॥

²²ᤁᤖ ᤐᤠ᤺ᤴᤈᤠᤰᤁᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤶᤔᤧ᤹ᤀᤥ॥ ᤐᤠ᤺ᤴᤈᤠᤰ ᤁᤧᤄᤧᤶᤒᤠᤖᤰ ᤁᤧᤒᤥ᤺ᤰᤂᤡ᤹ᤏᤧ ᤑᤠ᤹ᤃᤪ ᤀᤠᤒᤠᤅᤣ ᤀᤡᤱᤃᤧᤗᤧᤰᤁᤠᤛᤡ᤹ᤖᤥ॥