2Benun geyane xa da, benun bɔxɔ xɔnna nun dunuɲa yɛtɛɛn xa da, xabu a fɔlɔni, han to, han habadan i tan nan Ala ra.
3I tan nan muxune raxɛtɛma bɛndɛni, i yi a fala, i naxa, “Adamadiine, ɛ xɛtɛ ɛ kelideni.”
4Bayo ɲɛɛ wuli kedenna luxi nɛn i yɛɛ ra yi alo xii keden danguxina, alo kɔɛ kedenna.
5I tan nan muxun niin bama, a dangu alo xɔtɔn ma xixɔnla, alo sɛxɛn naxan solima.
6Xɔtɔnni, a ɲingi, a sabati, ɲinbanna na maso, a lisi a ra, a xara.
7I ya xɔlɔna nxu yigitɛgɛma nɛn, a yi nxu ɲan.
8I bata nxu hakɛne sa i yɛtagi. I bata nxɔ wundo yulubine birin sa kɛnɛnni.
9Nxu siin ɲanma nɛn i ya xɔlɔn bun ma. Nxu nxɔ siimayaan toon ɲanɲɛ alo kutunna.