Yaburina 78:45-65

⁴⁵A tugetuge xɔlɛne rasiga e ma naxanye e don. Xunɲɛne fan yi e bɔxɔn kala.

⁴⁶A e siseene so suɲɛne yii. A bogiseen birin so tuguminne yii.

⁴⁷A yi e wudi binle kala balabalan kɛsɛne ra. A yi e xɔdɛ binle kala xunbenla ra.

⁴⁸A yi e ɲingene faxa balabalan kɛsɛne ra. Galanna yi e xuruseene faxa.

⁴⁹A fitinaxin yi a xɔlɔ ɲaxin nun a bɔɲɛ teen nun a maraɲaxun nagodo e ma. Halagi ti ganla nan yi ne ra.

⁵⁰A mi xɛtɛ a xɔlɔn fɔxɔ ra, a mi tin e niine yi rakisi, a yi e faxa fitina furene ra.

⁵¹A yi dii sarane faxa Misiran denbayaan birin yi. Xami a denbayane dii singene birin naxanye singe e fangan mayita.

⁵²A yi fa a yamaan na keli Misiran yi alo xuruse kuruna. A yi e kantan burunna ra.

⁵³A yi ti e yɛɛ ra, sese mi e sɔtɔ, nanara e mi gaxu. Koni fɔxɔ igen yi a ragali e yaxune ma.

⁵⁴A yi fa e ra a bɔxɔ sariɲanxini na geyaan ma a naxan sɔtɔ a sɛnbɛn xɔn.

⁵⁵A siya gbɛtɛne kedi nɛn a yamaan yɛɛ ra, a yi e bɔxɔne yitaxun e ra. A yi Isirayila bɔnsɔnne rasabati e konne yi.

⁵⁶Koni e yi murutɛ Kore Xɔnna Ala ma, e yi a bunba. E mi e xaxili lu a maxadi xuine xɔn,

⁵⁷e yi e masiga a ra, e yanfan ti alo e benbane. E mi fa tinxinxi alo xalimakuli yidɔxina.

⁵⁸E Ala raxɔlɔ nɛn e suxure batudene ra. E yi Ala raxɔxɔlɔn e ala sawurane xɔn.

⁵⁹Ala to na mɛ, a yi xɔlɔ han! Nanara, a yi a mɛ Isirayila ra feu!

⁶⁰A yi a banxin nabeɲin naxan Silo yi, a yi dɔxi adamadiine tagi dɛnaxan yi nun.

⁶¹A yi tin a sɛnbɛ kankiraan yi suxu. A nɔrɔn misaala yi so yaxune yii.

⁶²A yi tin a muxune yi faxa silanfanna ra, a yi a xɔlɔ gbeen nagodo a muxune ma.

⁶³Tɛɛn yi e banxulanne gan, han ɲaxalan dii ti sigine yi dan na fe ra.

⁶⁴Saraxaraline yi faxa silanfanna ra. Koni yɛngɛn mi tin kaɲa gilɛne yi e wuga.

⁶⁵Dɔnxɛn na, Marigin yi keli alo a yi xiin nɛn. A yɛngɛn so alo sofa sɛnbɛmaan na manpaan min.