Yaburina 74:2-20

²I xaxili lu i ya yamaan xɔn ma, i naxan xunba xabu waxati xunkuye, bɔnsɔnna naxan findixi i gbeen na. I nama ɲinan i dɔxɔden Siyon Geyaan xɔn.

³I xun ti taa xɔnni ito ra. Nxu yaxune bata kala gbeen ti yire sariɲanxini.

⁴Nxu yi naralanma i ra dɛnaxan yi, I yaxune sɛwaxin bata sɔnxɔn nate mɛnni. E yi e taxamasenne yite na yi.

⁵E liga mɛnni alo xɛɛ sɛgɛne naxanye fɔtɔn wudine sɛgɛma e bunbine ra.

⁶E na sawura wudi tofaɲine birin kala e bunbine nun e dɛgɛmane ra.

⁷E tɛɛn so i ya Yire Sariɲanxin na, a gan fefe. E yi i xinla batuden naharamu.

⁸E yi a mirixi, e naxa, “En ne birin naxɔrima nɛn feu!” E yi Ala batudene birin gan yamanani.

⁹Nxu mi fa kabanako taxamasenne toma. Nabi yo mi fa na sɔnɔn. Nxu mi a kolon na buma han waxatin mundun.

¹⁰Ala, i yaxune i magelen danma waxatin mundun yi? E luma i xili kalɛ nɛn ba, han habadan?

¹¹I tondixi nxu maliyɛ nanfera? I yiini bandun, i yi e raxɔri!

¹²Ala, i tan nan nxɔ mangan na xabu a fɔlɔni. I tan nan marakisi tiin na dunuɲa yi.

¹³I tan nan fɔxɔ igene yitaxun i sɛnbɛni. I mɔn yi ige yi sube ɲaxine xunne yibɔ.

¹⁴I tan nan ige yi sube magaxuxin xunne kala. I yi a so burunna subene yii donseen na.

¹⁵I tan nan tigine nun xudene ramini. I tan nan baane yixara.

¹⁶I tan nan gbee yanyin nun kɔɛɛn na. I bata sogen nun kiken dɔxɔ e yirene yi.

¹⁷I tan nan dunuɲa danne rafalaxi. I soge furen nun ɲɛmɛn da.

¹⁸Koni Alatala, i xaxili lu ito xɔn ma: i yaxune gelema i ma! Xaxilitarene i xili kalama!

¹⁹I nama i ya yamaan nabeɲin alo ganbana sube xaɲɛne yii! I nama ɲinan i ya muxune xɔn mumɛ, naxanye tɔrɔxi.

²⁰I xaxili lu i ya layirin xɔn ma, bayo bɔxɔn yire yi fɔrɛne rafexi gbalotɔne ra.