Yaburina 62:6-11

⁶N bɔɲɛ xunbenla sɔtɔma Ala nan xɔn. A tan nan n yigin na.

⁷A tan nan n kantan fanyen na, n nakisimana. N ma faran makantanxin nan a ra. Yaxune mi n nɔɛ mumɛ!

⁸N ma kisin nun n ma binyena Ala nan yii. N kantan fanyen sɛnbɛmaan nan Ala ra. N ma yigiyana a tan nan na.

⁹Yamana, ɛ ɛ yigin sa a yi waxatin birin! Ɛ yi ɛ kɔntɔfinle so Ala yii, amasɔtɔ en yigiyaden nan Ala ra.

¹⁰Adamadiine ligaxi nɛn alo foyedina. A xungbeen nun a xurina, sese mi e ra. Hali e rate sikeela fari, e yelefu. E malanxin yelefu foyedin xa.

¹¹I nama i yigin sa gbalo feene yi. I nama i waso se muɲaxini. Hali nafunla gbo i yii han, i nama i yigin sa a yi!