Yaburina 35:19-28

¹⁹I nama tin n yaxu wuledene yi ɲaxan n ma fe ra. Naxanye n naɲaxuxi fuuni, ne nama gele n ma.

²⁰E mi ngaxakedenya fala tima, fɔ e yi bɔɲɛ xunbelitɔne kansun wulen na.

²¹E feene falama n xun ma, e sɔnxɔ, e naxa, “Yɔ! I naxan ligaxi nxu bata a to!”

²²Alatala, i tan bata ne to, nayi, i nama i dundu. Marigina, i nama i makuya n na!

²³Marigina, keli, i yi n xun mayɛngɛ. N ma Ala, n ma yɛngɛn so.

²⁴Alatala n ma Ala, yoon fi n ma bayo i tinxin. I nama tin n yaxune yi ɲaxan n ma fe ra.

²⁵I nama tin e yi a fala, e naxa, “Yɔ! Nxu bata a manɔ! Nxu yi waxi na nan tun xɔn ma!”

²⁶Muxun naxanye sɛwama n tɔrɔ feen na, Ala xa ne rayagi, a e yifu. Ala xa ne rayagi, a yi e rayarabi naxanye e yɛtɛ yitema n ma.

²⁷Naxanye waxi n xɔrɔyaxin to feni, ne xa sɔnxɔ sɛwani, e naxa, “Alatala gbo! A bata sɛwa a walikɛna yɛɛ ra sigan na.”

²⁸Nayi, n ni i ya tinxinyana fe falama nɛn, n yi i tantun fɛriɲɛn gbɛn!