Yaburina 18:3-22

³Alatala nan n kantan fanyen na, n ma yinna, n xunba muxuna. N ma Ala nan n kantan gɛmɛ gbeen na, n na n luxunma naxan yi. A tan nan n yɛ masansan wure lefaan na, e nun marakisi tiina naxan luxi alo n ma faran makantanxina.

⁴Alatala xa tantun! N na a xili, a yi n nakisi n yaxune ma.

⁵Sayaan gbalon bata yi n nabilin nun, halagin bata yi lu n xun ma nun alo ige xunfanna.

⁶Laxira gbalon bata yi n nabilin nun. Bilinganna bata yi a lutin nati n yɛɛ ra nun.

⁷N na Alatala xili nɛn n ma tɔrɔni, n yi n xuini te n ma Ala ma malina fe ra. A yi n xuiin mɛ a Batu Banxini, a yi a tuli mati n gbelegbele xuiin na.

⁸Nanara, bɔxɔn yi xuruxurun, a yimaxa, geyane bunne yi siga, e xɛtɛ, e xuruxurun Ala xɔlɔn bun.

⁹A liga alo tutin nan minima a ɲɔɛ yinla ra. Halagi ti tɛɛ dɛgɛn nun tɛɛ wolonne yi mini a dɛ.

¹⁰A yi kuyeni bɔ firinna ra, a godo a sanne tixi kunda fɔrɛn fari.

¹¹A te maleka gubugubu kanna fari, a tugan xulɛn, a siga foyeni.

¹²A a luxun dimini, kunda fɔrɛn nun tule igen yi a rabilin kore.

¹³Kundaan yi mini a nɔrɔni. Balabalan kɛsɛne nun galanna yi godo.

¹⁴Alatala yi a galanna xuiin namini keli kore, Kore Xɔnna Ala yi a xuiin namini.

¹⁵A yi a xalimakunle woli a yaxune ma a e raxuya ayi. A e birin nagi kuye sarinna ra.

¹⁶Alatala to falan ti e xili ma, a sɔnxɔ e ma xɔlɔni, fɔxɔ igen xɔnna yi mini kɛnɛnni bɔxɔ xɔnne yi to.

¹⁷Ala yi a yiini bandun keli kore, a n suxu, a yi n ba igen tilin yireni.

¹⁸A n xunba n yaxu sɛnbɛ kanne yii, n yɛngɛfaan naxanye fangan yi gbo n xa nun.

¹⁹E n yɛngɛ nɛn, n yi gbaloni waxatin naxan yi, koni Alatala yi n natanga.

²⁰A n ba nɛn gbalo yireni, a n nakisi amasɔtɔ n tan a kɛnɛnxi.

²¹Alatala bata n kɔntɔnna fi n ma tinxinyani, a n saren fi amasɔtɔ n kɛwanle sariɲan.

²²N bata sigan ti Alatala a kirane xɔn, n mi n makuyaxi Ala ra.