Yaburina 18:18-33

¹⁸A n xunba n yaxu sɛnbɛ kanne yii, n yɛngɛfaan naxanye fangan yi gbo n xa nun.

¹⁹E n yɛngɛ nɛn, n yi gbaloni waxatin naxan yi, koni Alatala yi n natanga.

²⁰A n ba nɛn gbalo yireni, a n nakisi amasɔtɔ n tan a kɛnɛnxi.

²¹Alatala bata n kɔntɔnna fi n ma tinxinyani, a n saren fi amasɔtɔ n kɛwanle sariɲan.

²²N bata sigan ti Alatala a kirane xɔn, n mi n makuyaxi Ala ra.

²³N bata a kitine birin suxu, n mi tondixi a tɔnne suxɛ.

²⁴Fɛ yo mi n na a yɛɛ ra yi, bayo n bata n yɛtɛ ratanga hakɛn ma.

²⁵Nanara, Alatala bata n kɔntɔnna fi n ma amasɔtɔ n tinxin, n kɛwanle sariɲan a yɛɛ ra yi.

²⁶Naxan na tinxin i xa, i tinxinma nɛn na kanna xa. Fɛ yo mi naxanye ra, i ya fɛtareyaan yitama nɛn ne ra.

²⁷I sariɲanma nɛn ne xa naxanye na sariɲan, koni i ɲaxuma nɛn na muxune ra naxanye ɲaxu.

²⁸Bayo i tan nan yiigelitɔne rakisima, i mɔn yi wasodene ragodo.

²⁹Alatala, i tan nan kɛnɛnna fima n ma, n ma Ala, i yi n ba dimini.

³⁰N ganla yɛngɛma nɛn i tan barakani. I tan yi, n tuganma yinna xun ma.

³¹Alaa kirane kamalixi feu! Alatalaa falane tinxin. Naxanye na e luxun a yi, a ne kantanma nɛn alo wure lefana.

³²Alatala nan keden Ala ra. Nde en kantan fanyen na, ba en ma Ala ra?

³³A tan nan Ala ra naxan fangan fima n ma naxan n kantanma kira yi.