Yaburina 119:36-174

³⁶I ya maxadi xuine sa n bɔɲɛni, alogo n nama bira nafunla fɔxɔ ra.

³⁷N xun xanbi so fe kobine yi, alogo n xa siimayaan sɔtɔ i ya kiraan xɔn.

³⁸I dɛ xuiin naxan tongoxi i yɛɛragaxu muxune xa, na rakamali n tan i ya walikɛɛn xa.

³⁹N natanga yagine ma n gaxuma naxanye yɛɛ ra. Amasɔtɔ i ya kiti saxine fan.

⁴⁰N waxi i ya fe ragidixine suxu feni han! N xa siimayaan sɔtɔ i ya tinxinni.

⁴¹Alatala, i ya hinanna xa n li. N nakisi alo i dɛ xui tongoxi kii naxan yi.

⁴²N xa nɔ n konbi muxune yabideni, bayo n na n yigi saxi i ya falan nin.

⁴³Tin n xa lu ɲɔndin falɛ waxatin birin, amasɔtɔ n xaxili tixi i ya kitin nan na.

⁴⁴N ni i ya sariyan suxuma nɛn waxatin birin, habadan han habadan.

⁴⁵N luma nɛn xɔrɔyani, Amasɔtɔ n ni i ya fe ragidixine suxi.

⁴⁶N ni i ya maxadi xuine fe falama mangane xa nɛn. N mi yagɛ na ra mumɛ!

⁴⁷I ya yamarine n kɛnɛnxi, e rafan n ma.

⁴⁸N na n yiine tima i ya yamarine bun ma nɛn, e rafan n ma. N yi lu n mirɛ i ya tɔnne ma.

⁴⁹I xaxili lu i ya falan xɔn ma n tan i ya walikɛna fe yi, bayo i bata yigin fi n ma.

⁵⁰N yi tɔrɔni waxatin naxan yi, i n madɛndɛn nɛn amasɔtɔ n bata kisi i dɛ xuiin ma.

⁵¹Wasodene n magelema han, koni n mi i ya sariyan fataxi mumɛ.

⁵²Alatala, n na n mirima i ya kiti saxine ma. Waxati danguxine yi, ne nan yi n madɛndɛnma.

⁵³N na muxu ɲaxine to naxanye e mɛma i ya sariyan na, n xɔlɔma nɛn han.

⁵⁴I ya tɔnne findixi bɛti ba xunna nan na n xa, n xɔɲɛyani dɛnaxan yi.

⁵⁵Alatala, n na n mirima i ma kɔɛɛn na, alogo n xa i ya sariyan suxu.

⁵⁶N gbeen findixi i ya fe ragidixine suxu feen nan na.

⁵⁷Alatala, n gbeen findixi naxan na, na ni ito ra, i ya falan suxu feen na a ra.

⁵⁸N ni i maxandima n bɔɲɛn ma feu! Kininkinin n ma, alo i bata dɛ xuiin tongo kii naxan yi.

⁵⁹N bata n miri n yɛtɛ kɛɲaan ma, n waxi bira feni i ya maxadi xuine fɔxɔ ra.

⁶⁰N ni i ya yamarine suxuma nɛn mafurɛn, n mi buma.

⁶¹Muxu ɲaxine bata lutin nati n yɛɛ ra, koni n mi ɲinanma i ya sariyan xɔn ma.

⁶²N kelima nɛn kɔɛ tagini i tantundeni i ya kiti tinxinxine fe ra.

⁶³N xɔyine nan i yɛɛragaxu muxune ra, e nun naxanye i ya fe ragidixine suxuma.

⁶⁴Alatala, dunuɲa rafexi i ya hinanna nan na, n xaran i ya tɔnne ma.

⁶⁵Alatala, i bata i ya falan nakamali, i fe faɲin naba n tan i ya walikɛɛn xa.

⁶⁶N xaran xaxilimayaan nun fe kolonna ma, amasɔtɔ n laxi i ya yamarine ra.

⁶⁷Benun n xa tɔrɔ waxatin naxan yi, n bata yi tantan, koni iki, n bata i ya falan suxu.

⁶⁸I fan, i kɛwanle fan! N xaran i ya tɔnne ma.

⁶⁹Muxu wasoxine bata wulen sa n xun ma. Koni i ya fe ragidixine suxi n xɔn ma n bɔɲɛn ma feu!

⁷⁰E bɔɲɛne mi fan, koni i ya sariyana n tan kɛnɛnxi.

⁷¹A rafan n ma, n tɔrɔ, alogo n xa nɔ i ya tɔnne kolonɲɛ.

⁷²I ya sariyan nafan n tan ma dangu xɛmaan nun gbetin wuli wuyaxin xa.

⁷³I tan nan n daxi, i yi n namara, nayi xaxinla fi n ma, alogo n xa i ya yamarine xaran.

⁷⁴I yɛɛragaxu muxune sɛwama nɛn e na n to waxatin naxan yi, a n laxi i ya falan nan na.

⁷⁵Alatala, n na a kolon a i tinxin kiti sadeni. I n nayagi nɛn amasɔtɔ i tinxin.

⁷⁶I ya hinanna xa n nii yifan n ma alo i dɛ xuiin tongoxi n tan i ya walikɛɛn xa kii naxan yi.

⁷⁷Kininkinin n ma alogo n xa lu n nii ra, amasɔtɔ i ya sariyana n kɛnɛnxi.

⁷⁸Ala xa muxu wasoxine rayagi, yo mi naxanye xa, naxanye n tɔrɔma. Koni n na n mirima i ya fe ragidixine nan ma.

⁷⁹Ala xa a yɛɛragaxu muxune maso n na, naxanye birin i ya maxadi xuine kolon.

⁸⁰N xa i ya tɔnne suxu n bɔɲɛn ma feu, alogo n nama yagi.

⁸¹Ala, n bata xadan i mamɛdeni n nakisi feen na. N bata n yigi sa i ya falani.

⁸²N yɛɛne bata bu i yɛɛ ra kira yitoɛ i dɛ xuina fe ra, n yi a fala, n naxa, “I n malima waxatin mundun yi?”

⁸³N bata liga alo manpaan sa labana tɛɛn xun ma naxan xaraxi ayi. Koni hali na, n mi ɲinanxi i ya tɔnne xɔn.

⁸⁴N mɔn xa i legeden han waxatin mundun yi? I na muxune makitima waxatin mundun yi naxanye n bɛsɛnxɔnyama?

⁸⁵Muxu wasoxin naxanye mi i ya sariyan suxi ne bata yinla ge n yɛɛ ra n suxu feen na.

⁸⁶I ya yamarine birin tinxin. Muxune n tɔɲɛgɛma, n mali.

⁸⁷A yi fa luxi ndedi n xa faxa, koni n mi i ya fe ragidixine rabeɲinɲɛ mumɛ!

⁸⁸N nakisi i ya hinanni, alogo n xa i ya maxadi xuine suxu.

⁸⁹Alatala, i ya falan luma nɛn habadan. A luma nɛn ariyanna yi habadan.

⁹⁰I ya tinxinyaan luma nɛn mayixɛtɛne birin xa. I bata bɔxɔn dɔxɔ a dɔxɔdeni. A mɔn luma mɛnna nin.

⁹¹Seene birin mɔn daxi i ya maragidini han to, bayo e birin walima i xa.

⁹²Xa i ya sariyan mi yi n kɛnɛnxi nun, n yi faxama nɛn n ma tɔrɔni.

⁹³N mi ɲinanɲɛ i ya fe ragidixine xɔn mumɛ, amasɔtɔ i n nakisixi e tan nan xɔn.

⁹⁴Bayo n ni i ya fe ragidixine fenma, i tan nan gbee n na, n nakisi.

⁹⁵Muxu ɲaxine n legedenma n faxa feen na. Koni n na n ɲɔxɔ luma nɛn i ya maxadi xuine xɔn.

⁹⁶N bata a kolon danna feen birin ma, koni i ya yamarin tan dan mi na.

⁹⁷I ya sariyan nafan n ma han! N na n mirima a ma fɛriɲɛn gbɛn!

⁹⁸I ya yamarina n findima xaxilimaan na dangu n yaxune ra, bayo a n yii waxatin birin.

⁹⁹N dangu n karamɔxɔne birin na, amasɔtɔ n luma n mirɛ i ya maxadi xuine ma.

¹⁰⁰Xaxinla naxan n ma na gbo xɛmɛ fonne gbeen xa, amasɔtɔ n ni i ya fe ragidixine suxi.

¹⁰¹N bata tondi sigɛ kira ɲaxin birin xɔn, alogo n xa i ya falan suxu.

¹⁰²N mi n masigama i ya kiti saxine ra, amasɔtɔ i tan yɛtɛɛn nan n xaranma.

¹⁰³I dɛ xuine ɲaxun kumin xa.

¹⁰⁴N xaxinla sɔtɔma i ya fe ragidixine nin, nanara mayifu fe yo mi fa rafan n ma.

¹⁰⁵I ya falan findixi kɛnɛnna nan na n sanna bun ma, naxan n siga kirani yalanma.

¹⁰⁶N dɛ xuiin naxanye tongoxi i xa, n bata n kɔlɔ n ne rakamalima nɛn, n yi i ya kiti tinxinxine suxu.

¹⁰⁷Alatala n ma mantɔrɔne bata gbo ayi han. N nakisi alo i a fala n xa kii naxan yi.

¹⁰⁸Alatala, n ma tantun xuiin nasuxu, i yi n xaran i ya kiti saxine ma.

¹⁰⁹N niin gbalon dɛ waxatin birin, koni n mi ɲinanma i ya sariyan xɔn.

¹¹⁰Muxu ɲaxine bata lutin nati n yɛɛ ra, koni n mi n masigama i ya fe ragidixine ra.

¹¹¹I ya maxadi xuine nan n kɛɛn na habadan, e tan nan n bɔɲɛn nasɛwama.

¹¹²N bata a ragidi n bɔɲɛni n xa i ya tɔnne suxu, han n faxa.

¹¹³Nafigine mi rafan n ma, koni i ya sariyan tan nafan n ma.

¹¹⁴N yɛ masansan wure lefaan nan i tan na. N bata n yigi sa i ya falani.

¹¹⁵Ɛ tan fe ɲaxi rabane, ɛ ɛ masiga n na, alogo n xa n ma Alaa yamarine suxu.

¹¹⁶N sɛnbɛ so alo i bata a fala kii naxan yi, i nama n yigitɛgɛ.

¹¹⁷Findi n yigin na alogo n xa kisi, n yi i ya tɔnne binya waxatin birin.

¹¹⁸Naxanye e masigama i ya tɔnne ra, i ne makuyama i ra nɛn, bayo e yanfan nan tun tima.

¹¹⁹I muxu ɲaxine birin wolima ayi nɛn kurun na, nanara i ya maxadi xuine rafanxi n ma.

¹²⁰N bata gaxu i yɛɛ ra, n xuruxurun. I ya kiti saxine bata n magaxu han!

¹²¹N tinxinna nun sariya kɛndɛn ligama, i nama n nabeɲin n yaxune yii.

¹²²I ya walikɛɛn xaxili ragidi a i fe faɲin ligama a xa nɛn, i nama tin wasodene xa n ɲaxankata sɔnɔn.

¹²³N yɛɛne bata bu i yɛɛ ra kira yitoɛ n nakisi feen na, alo i dɛ xui tinxinxin naxan tongo n ma fe yi.

¹²⁴N suxu i ya hinanni, i yi n xaran i ya tɔnne ma.

¹²⁵Xaxinla fi n ma amasɔtɔ i ya walikɛɛn nan n na, alogo n xa i ya maxadi xuine kolon ki faɲi.

¹²⁶Alatala, i ya wanla kɛ waxatin nan ito ra, amasɔtɔ yamana i ya sariyan kalama.

¹²⁷Nanara, i ya yamarine rafan n ma xɛma faɲin xa.

¹²⁸Nanara, n biraxi i ya fe ragidixi tinxinxine fɔxɔ ra. Mayifu feene mi rafan n ma.

¹²⁹Kabanako feen nan i ya maxadi xuine ra. Nanara, n na e suxuma n niin birin na.

¹³⁰I ya falane nan kɛnɛnna fima, e tan nan xaxinla fima xaxilitaren ma.

¹³¹I ya yamarine xɔnla n suxuma alo min xɔli gbeen naxan n dɛɛn naxarama.

¹³²I yɛɛ rafindi n ma, i yi kininkinin n ma, alo i darixi a ligɛ kii naxan yi muxune xa i xinla rafan naxanye ma.

¹³³N sigati kiin sɛnbɛ so i dɛ xui tongoxine xɔn, i nama tin fe ɲaxi yo xa n nɔ.

¹³⁴N xunba ɲaxankatatiine ma, alogo n xa i ya fe ragidixine suxu.

¹³⁵I nɔrɔn xa godo i ya walikɛɛn ma, i yi n xaran i ya tɔnne ma.

¹³⁶N yɛɛgen minima alo baana, amasɔtɔ yamaan mi i ya sariyan suxuma.

¹³⁷Alatala, i tinxin, i ya kiti saxine fan tinxin.

¹³⁸I ya maxadi xuine fixi tinxinna nun lannayaan nin.

¹³⁹N na a to, n yaxune ɲinanma i fala xuiin xɔn, na xɔlɔma n ma nɛn han!

¹⁴⁰I mi i dɛ xuiin kalɛ mumɛ! E rafan n tan i ya walikɛɛn ma.

¹⁴¹N mi yatɛxi bonne yɛ, e bata n naɲaxu, koni n mi ɲinanma i ya fe ragidixine xɔn.

¹⁴²I ya tinxinyaan luma nɛn habadan! Ɲɔndin nan i ya sariyan na.

¹⁴³Tɔrɔn nun kuisanna bata n yili, koni i ya yamarine n kɛnɛnxi.

¹⁴⁴I ya maxadi xuine tinxin waxatin birin. Xaxinla fi n ma alogo n xa siimayaan sɔtɔ.

¹⁴⁵N bata n xui ramini i ma n bɔɲɛn birin na. Alatala n yabi alogo n xa i ya tɔnne suxu!

¹⁴⁶N bata n xui ramini i ma. N nakisi alogo n xa i ya maxadi xuine suxu.

¹⁴⁷N kurunma i maxandɛ, n mali. N yigi saxi i ya falan nin.

¹⁴⁸N xima n mirɛ i dɛ xui tongoxine ma nɛn.

¹⁴⁹Alatala, i hinan. N xuiin namɛ, alogo n xa siimayaan sɔtɔ i ya kiti saxin xɔn.

¹⁵⁰N nabilinna muxune biraxi fe ɲaxine fɔxɔ ra, e yi e masiga i ya sariyan na.

¹⁵¹Koni i tan Alatala, i maso n na. Ɲɔndin nan i ya yamarine birin na.

¹⁵²N na a kolon xabu waxati xunkuye a i ya maxadi xuine luma nɛn habadan.

¹⁵³Ala, n ma tɔrɔn mato i yi n xunba, amasɔtɔ n mi ɲinanxi i ya sariyan xɔn.

¹⁵⁴N xun mayɛngɛ kitin sa, i yi n xunba, n yi siimayaan sɔtɔ alo i a falaxi kii naxan yi.

¹⁵⁵Muxu ɲaxine tan mi kisima, amasɔtɔ e mi biraxi i ya tɔnne fɔxɔ ra.

¹⁵⁶Koni Alatala, i ya kininkininna gbo, n xa siimayaan sɔtɔ i ya kiti saxine xɔn.

¹⁵⁷N yaxune wuya naxanye n bɛsɛnxɔnyaxi, koni n mi i ya maxadi xuine beɲinma.

¹⁵⁸N na i ya fala suxutarene to, na n xɔlɔma nɛn.

¹⁵⁹Alatala, a mato i ya fe ragidixine rafan n ma, n xa siimayaan sɔtɔ i ya hinanni.

¹⁶⁰Ɲɔndin nan i ya falan birin na. I ya kiti tinxinxine luma nɛn habadan!

¹⁶¹Mangane bata n ɲaxankata fu, koni n gaxuma i tan nan keden ma fala yɛɛ ra.

¹⁶²N sɛwaxi i dɛ xui tongoxine fe ra, alo n na nafulu gbeen sɔtɔ.

¹⁶³Wulen mi rafan n ma, koni i ya sariyan nafan n ma.

¹⁶⁴N ni i tantunma nɛn dɔxɔɲa ma solofere lɔxɔ yo lɔxɔ i ya kiti tinxinxine fe ra.

¹⁶⁵Bɔɲɛ xunbeli gbeen na kanne xa i ya sariyan nafan naxanye ma, sese mi na kanne ratantanɲɛ.

¹⁶⁶Alatala, n yigi saxi i tan nan ma marakisi yi, n luma nɛn i ya yamarine suxɛ.

¹⁶⁷N na i ya maxadi xuine suxuma nɛn n niin birin na, bayo e rafan n ma ki faɲi.

¹⁶⁸N bata i ya fe ragidixine nun i ya maxadi xuine suxu, i n kɛwanle birin kolon.

¹⁶⁹Alatala, n ma mawuga xuiin xa i li. Xaxinla fi n ma alo i a falaxi kii naxan yi.

¹⁷⁰I tuli mati n ma maxandi xuiin na, i yi n nakisi alo i bata dɛ xuiin tongo kii naxan yi.

¹⁷¹N ni i tantunma nɛn waxatin birin, amasɔtɔ i bata n xaran i ya tɔnne ma.

¹⁷²N bɛtin bama nɛn lan i dɛ xui tongoxina fe ma, amasɔtɔ i ya yamarine birin tinxin.

¹⁷³N mali i sɛnbɛn nin, amasɔtɔ n bata i ya fe ragidixine nan sugandi.

¹⁷⁴Alatala, i ya marakisin xɔnla n na! I ya sariyana n kɛnɛnxi.