Yabura 95:1-9

¹Won xa bɛɛti ba Marigi bɛ sɛɛwɛ ra, won xa won xui ite won nakisima sɛnbɛma bɛ.

²Won xa a matɔxɔ, won xa a matɔxɔɛ ba a bɛ bɛɛtie ra,

³barima Alatala, Ala xungbe na a ra, naxan findixi mangɛ xungbe ra sɛnbɛmae birin xun ma.

⁴Yire tilinxi na a bɛlɛxɛ. Geya xuntagie findixi a gbe nan na,

⁵alɔ baa nun bɔxi a naxee daaxi a bɛlɛxɛ ra.

⁶Wo fa, won xa suyidi, won xa won igoro, won xa won xinbi sin Alatala ya i naxan won daa,

⁷barima a tan nan won Marigi Ala ra. Won findixi a xa ɲama nan na a naxan dɛmadonma, alɔ xuruse dɛmadonyi mɛɛnima gɔɔrɛ ma ki naxɛ. Wo xa a xui mɛ to.

⁸Wo naxa wo bɔɲɛe raxɔrɔxɔ alɔ naxan nabaxi Meriba, alɔ naxan nabaxi Masa gbengberenyi ma tɛmui dangixi.

⁹Wo benbae n mato nɛ na lɔxɔɛ, hali e to nu bara n wali fɔxi to.