Xoão 8:1-13

¹Iuasaaki Xesosi sari Orivanape Xiratamoni. Oriva txipokori.

²Katimatinĩkata ikanapiriã Teoso misãkiretiko aikotimoni. Iuasaaki ikinipoko kãkiti apotiitaua iuamoni. Ininiã Xesosi topãka, Teoso sãkire isãpiretini ĩkapani.

³Iuasaaki kaiõkatsopareriakori, pariseoakori pakini minaro sito iuamoni. Ninoa apokaro oa sito õtaniri minakotikatika osirĩkini. Itakarona oa ikinimane apisatoõ.

⁴—Koerekareri, aãpokaro oia sito õtaniri minakotikatika osirĩkini.

⁵Moisesini sãkire iõkatsopatakori paniãtaua ikara atoko inakaro kai soroã oõkaãka. Pitepekana, kiãtokopa atxataro oa? —itxana Xesosimoni.

⁶Ikara atoko ipimaãrina Xesosi, kotxi inirekarina Xesosi kerokiniri isãkire. Inirekarina Moisesini paniãtakiti iaõka imakamakaniã, ininiã maerekati ikamapeka. Txamari !kasãkireri Xesosi. Iokirita, iõkata itxari kipatxi iuakokiã. Imakenakotakiniti atoko itxa.

⁷Ipimarauatapanikana, ininiã Xesosi õkaõkitaua. —Maerekati makamakatirako ĩkiika kiporonakiniro aroa kai soroã —itxa Xesosi.

⁸Eereka Xesosi iuaĩkana iokirita, iõkata itxari kipatxi.

⁹Ninoa ikaraene ikenakotakasaakina, iua apiata kiomãtxi inakariua sipeka. Eereka iua tikini auakari apaka sipeka. Ikara atoko itxaãpotana ikinikana isinina. Eereka Xesosinoka kaikota oa sitokata.

¹⁰Xesosi õkaõkitaua, atamata itxaro oa sito. Oanoka kaikota iuaã. —Ĩtapari pimaerekani sãpiretakani? —itxaro.

¹¹—Apiananiri, isipekana nimaerekani sãpiretakani —otxari. —Nota apaka kona sãpiretari pimaerekani. Pisipeka. Maerekati kona pikamapinikako —itxaro.

¹²Eereka Xesosi iuaĩkana oerekari kãkiti. —Nota ikini itixiti auakani tirikapite atoko nitxaua, kotxi noerekari Teoso sãkire notakata sikani. Teoso mimarotakani ipiaã sikani itxauana. Notakata sikanipekana !itĩpokota ipiaã. Nota sikana ninoa ãtipirika auinina ĩkapani —itxa Xesosi.

¹³Ininiã pariseoakori misãkiretari Xesosi: —Kona ate auikapiretari pisãkire, kotxi pitenani sãpiretari pisãkire. Ikara atoko ininiã, kona aimarotari atãoene inini pisãkire. Ãti sãpiretiniãri pite sãkire iaõka, aãuikari atxiĩti —itxarina Xesosi.