Sion 8:1-13

¹Iesu be Vathu te Urvatiei te Olip del moletin nan xil e laba lapat en.

²Ut milan, Iesu dilomun be Serusalem e ba be vioh te Nim Eo. Moletin xil holu lamei visali e lakapis xole. Ma, Iesu dotan e pispisi mi xil.

³Melele xa di tamu pispisi, titsa xil te rae na Mosis del Farasi xil ladiamu ni atou tei xa latekameti di pat tetel tiramue tei xa tave tiramue nan xati ti. Ma ladel atou ak ba misoh pe met moletin xil.

⁴Di, labiteni mi Iesu labit, “Titsa, atou ak, melele xa lakameti, xi dit pat del tiramue tei xa tave tiramue nan xati ti.

⁵Rae na Mosis biteni xa rihov vin hisit atou xil xa lamak. ?E xouk, uhit naha?”

⁶Xil lasis Iesu mak tengan vasak pisi e rin te sepinien nan tengan xos isa sepinien tova xa imaen xil ha lital xati ven. E Iesu mitingeiril, e midis neta tei e tan ni vakuhen.

⁷E xil dit lasi petinen tengan isa nenemien nan mi xil usil rin ak. Ma, Iesu mea misoh e biteni mi xil bit, “Visi e xamim xa tapol ni ti tesaen, xi vari iaxa ihov kokot ni.”

⁸Di, mitingeiril mun e midis neta teimun e tan.

⁹Melele xa titsa xil te rae na Mosis del Farasi xil lalonge mak, xil kekes labaha. Ngan xil xa lamatu ladiamu, di, tesav xil mun laba ba vuma … Iesu tasen tang da, e atou ak di tamu misoh pe meten.

¹⁰Di, Iesu mea misoh e biteni mini bit, “?Atou, moletin xil laba xave? ?Midep? ?Ti xil tara ti ak tengan vahit umat ve tesaen nam?”

¹¹Atou bit rilomun ni mini bit, “Suv moletin tovuol.” Ma Iesu biteni mini bit, “E inou mun ninavit neta ti nava xat rin nam. E utilomun uhe tim, e xosali iha, onapol ti mun nasa.”

¹²Melele xa Iesu di tamu e vioh te Nim Eo, misepin rilomun mi moletin xil bit, “Inou nabe miehen xa di mileluv e meulien na moletin xil te ut etan. E moletin xa di nggusil nou nakakao ti e maluxoluken, vengan xa miehen navan xa iti en ileluv kuh suse te meulien mini.”

¹³Farasi xil xa lalong sepinien nan labiteni mini labit, “Xouk di obit rat sepinien xil ak e rin nam tasom tang. Misak ni, xamem masakras make reitin e sepinien nam.”