Wiawia 27:17-42

¹⁷Irail apiada i, pwen kak piradi ong ni sop o, ap lilidi, pwe re masak re de serada nan Sirte, ap pungipungidok sili.

¹⁸Kit lao pungipungidok sili kaualap, manda ap kamararadar sop o.

¹⁹A ni ran kasilu irail kase kila pein pa arail kapwa en sop o.

²⁰Kadekadeo ran totola sota katipin o sota usu, o melimel kalaimun u dong kit, ap solar at kaporopor en pitila.

²¹A kit lao kaisesol warailar, Paulus ap pwarada nan pung arail masani: Ol oko mak eta, komail en peiki ong ia er o so masel sang Kreta, pwe kitail ender lel dong kaupatail.

²²A met i panaui komail, en kaporopor mau, pwe sota me pan mela, sop eta me pan ola.

²³Pwe tounlang en Kot, me sapwilim a ngai, o me i kin papa, me kotida imp ai pong,

²⁴Kotin masani: Paulus, koe der masak, koe pan wisike wong ren Sisa. A kilang, Kot me kotiki ong uk er karos me iang uk.

²⁵Ari ol oko komail kaporopor mau, pwe i kin poson Kot, me a masan pan pwaida.

²⁶A kitail pan serada nin dake eu.

²⁷A lao pong ngaul pa pong lar, kit peipei sili nan sed Adria. Ni ailep en pong toun sop o kasauiada, me se koren iong sap eu.

²⁸A irail lao kasedi men song, re ap diaradar, me ngap rieisok, o re kaila ekis wasa o kasedi men song, re ap diaradar, me ngap eisoklimau.

²⁹A re masak, se de serada pon mat, rap kasedi paipong paieu sang ni murin sop, ap mauki en ran pasang,

³⁰A toun sop o lao men pitila sang nin sop o, o re apiedi pot apot nan sed, dene re pan kasedi paipong kai ni mon sop o,

³¹Paulus ap masani ong kaun o saunpei kan: Ma mepukat sota pan mimieta pon sop o, komail sota pan kak dorela.

³²Saunpei kan ap leke sang pot o kasela o ari.

³³A lao pan ran pasang, Paulus ap panaui irail, ren manga, masani: Nan a pong ngaul pa pong lar, me komail kin auiaui o kaisesol o sota manga.

³⁴Ngai ari panauki komail, en manga, pwe i me komail pil pan piti kila. Pwe sota pit en mong pit pan pupedi sang amen komail.

³⁵A lao masanier met, ap ale prot, danke Kot mo ’rail karos. I lao pilitiki pasang ap sak.

³⁶Irail karos ap kaporopor maular o pil manga.

³⁷A kit karos me mi nan sop o, me riepuki isiakan wonumen.

³⁸Irail lao medier, rap kamararadar sop o, kasedi ong nan madau korn.

³⁹A lao wasa ran pasang, re sasa sap o, A re diaradar kapitau eu, me mad mia; i wasa re lamedar en walang sop ia, ma re pan kak ong.

⁴⁰Irail lao leke sang paipong ko, rap kase ir ala nan madau, o lapwada padil akan, o apiadar serok en moa ni ang o, ap tangala ni oror.

⁴¹Irail lao lel ong mad eu, sop o serada o solar mokid. Mon sop o tengela, a muri ola nan iluk kan.

⁴²Saunpei ko ap men kamela me salidi kan, pwe amen de pan pitila sang.