Waiwia 9:5-24

⁵A ap inda: Ij komui Main? A kotin majani: Nai Iejuj, me koe kin kame.

⁶Paurida, kolan nan kanim en, nan a pan loki on uk, me koe en wiada.

⁷A ol oko, me ian i kokola, japaimokid, pwe re ronadar nil o, ap jota amen me re kilanadar.

⁸Jauluj paurida jan nan pwel, maj a papad eta, ap jota kilan meamen. A re kolokol pa a, kalualan i Damajkuj.

⁹I ari jota kilan waja pon jili pon. A jo kan de nim meakot.

¹⁰A tounpadak amen mi Damajkuj, ad a Ananiaj me Kaun o kotin majani on ni kajanjal eu: Ananiaj! I ari potoan on: Iet nai Main!

¹¹Kaun o ap kotin majani on i: Paurida kowei on nani al o, me ad a Inen, ap idok nan im en Iudaj amen, me mar a Jauluj en Tarjuj. Pwe kilan, a kapakap

¹²A kilaner ol amen ni kajanjal eu, me ad a Ananiaj, me ko don i o pwil poa pa a kan, pwe a en kilanki waja.

¹³A Ananiaj potoan on: Main, i ronadar ren aramaj toto duen ol men et, duen a kin kaokaoe japwilim ar jaraui kan, me mi Ierujalem.

¹⁴O a aleer jan ren jamero lapalap akan manaman, en jaliedi karoj, me kin likwir on mar omui.

¹⁵A Kaun o kotin majani on i: U kowei, pwe iei ol o, me I piladar, en wala mar ai ren men liki o nanmarki kan o men Ijrael.

¹⁶Pwe I pan kajanjale on i duen won a pan kamekameki mar ai.

¹⁷Ananiaj ari kola, pedelon on nan im o, pwil poa pa a pokon, indada: Ri (ai) Jaul, Kaun o me kotin porone ia do; iei Iejuj, me kotin pwara don komui nani al o ni omui kokodo, pwe komui en kilanada waja o dire kila Nen jaraui.

¹⁸A madan likamata un en mam akai, me pupedi jan ni maj a, i ari kilanadar waja o udar paptaijelar.

¹⁹I lao manaer, ap kelailadar, ap mimieta ren tounpadak en Damajkuj akan ran akai.

²⁰A madan padapadak nan jinakoke kan duen Iejuj, me i japwilim en Kot.

²¹A karoj, me roneron i, puriamui kila indada: Kaidin i, me kin kaokaoe ir, me kin likwir on mar wet nan Ierujalem o kodo waja et, pwen jali ir edi, kalua ren jamero lapalap akan?

²²A Jauluj me manaman kokoda o kapinada Juj oko, me kaujon Damajkuj ni a kawewedar, me i me Krijtuj.

²³Kadekadeo murin ran toto Juj oko kapun pena en kamela i.

²⁴A Jauluj roner, me re majamajan i; irail pil majamajan wanim akan ni ran o ni pon, pwen kamela i.