Acts 9:5-24

⁵Kata Saul i toiruba i wona, “Kom kotoi Bada?” Ba gamo i kaobeyei i wona, “Yauku Iesu! Ba kebi tupa ketowaniku,

⁶karaku nina ke bomsiri ba kuna nae ku Damascus, ba namai sina wonim awaika kuna wosei.”

⁷Ba iyabosi yabata si nenae wai asi sisiya i kakaba ba si msi damana; kairavina gamo si nonori saba kega kesana kotoi si kinani.

⁸Ba Saul i peku ku tano ba i msiri maranai, wai matana i tamotatara saba kega kesana awaika i kinakinani, wai turana yarona si yauni ba si rutitaini ku Damascus.

⁹Ba kao tonu kamonai kega i kinana ba kona maranai kega i kam kona i toma.

¹⁰Ba namai Damascus kamonai nonorayauna kesana i mamana kana waba Ananias, aba kinakinanai Bada i yorei, “Ananias!” Ba i kaobeyei, “Yauku nina Bada.”

¹¹Ba Bada Ananias i wonei, “Ke tauya kuna nae Keta kana waba Keta Totorina ba Judas ana ku yove, ba namai Tarsus sebare kana waba Saul ki toirubei, kona wai karaku nina e rupari kuriku.

¹²Ba kona aba kinakinani i kitai kata sebare kana waba Ananias i botu ba yarona ku tepana i terei wai i kinana mena.”

¹³Saba Ananias Bada i kaobeyei i wona, “Bada, Saul am bigeruwana pipiyisi Jerusalem kamonai, e kasikasi bigoyonisi wai tupana a nonora roboi.

¹⁴Ba ka nonori kata priest kaiwabona bidamanina maragasina pepana i berei kata bigeruwana biyisi ina patumisi.”

¹⁵Saba Bada Ananias i wonei, “Ke nae, kona sebarena wai a binei au saibisaibirina ba wonaku ina rumamara neubuwei, Gentile biyisi asi tautaupauma kurisi ba yebo Israel biyisi kurisi.

¹⁶Ba ani beyei ina kuiri kata mekabage yauku Iesu, kairaviku sini nomosa ina paiwarei.”

¹⁷Damanina ba Ananias i nae ku yove kamona i riu, ba yarona i terei Saul ku tepana, ba i wona, “Waresiku Saul, ketai ku yewo ku botubotu ba Bada Iesu i rerematara kurim wai kona i poraiku a botu, kata ana borubaim wai kuni kinana mena ba Kanuma Kaobaisiyena ini bonuvim.”

¹⁸Ba marakesana sawara kesana siyauwa kerarisi rutainisi si peku ba i kinana mena ba i bomsiri wai i babataito,

¹⁹ba i kam murinai wai ana maragata i veramaga mena. Ba Saul Damascus i mana yogina ba i veramaga ku Jerusalem.

²⁰Ba kao kesana Saul rumamara Jew biyisi asi dugu yovesi kamosi yai i dagui, i wonawona kata Iesu wai bisuwona God Natuna.

²¹Ba iyabosi wata namai si nonori wai si sikwana saki ba si toiruba si wona, “Niko, sebarena kesanina Jerusalem kamonai, pipiya Iesu kana wabai si bopepeta wai, i kasikasi bigoyonisi kona? Ba memena bage i botu mena, yebo pipiya ina patumisi ina nae priest kaikaposi kurisi.”

²²Saba Jew biyisi Damascus kamonai si mamana wai nuwanuwasi i kairagaraga kega rubana awaika siti sisiyei, kairavina Saul ana rumamara i maragata saki, ba i wonewonisi kata Iesu wai Baibai yawasina Kaobaisiyena.

²³Kao pesarisi murinai Jew biyisi bibune yai si dugu kata Saul sita kasibunui.

²⁴Kao ba pom meyaga kana matamketa sibo kibukibui kata sita kasibunuina kairavina, saba matapa i kuiri.