LOS HECHOS 9:5-24

⁵Cottimeja Saulo joanchiangui co ndac̈ho: ―¿Quensen soixin? Co tté mé ndac̈ho: ―Janha Jesús tti jaha ningaconhe co feo nchehe ngain. Pero jaho rritoniha ixin jaha inchin coxinttá are ẍantoe va con garrocha.

⁶Cottimeja Saulo jiẍanga de joaẍaon co ndac̈ho: ―¿Quehe rinao soixin que janha sinttaha? Co Jesús ndac̈ho: ―Dingattjen co ttji ciudad de Damasco, co nttiha jí chojni que rrondattjo quehe chonda que sinchehe jaha.

⁷Co cain xí que joicao Saulo tavinttetsjecoa xa ixin coinhi xa tti jinichja pero ẍonhi quensen vintteguicon xa.

⁸Cottimeja vingattjen Saulo de ngataha nontte, pero are conxiré jmacon ic̈hoha vicon ixin ndacochejo. Mexinxin tsehe na rá co sajoicao na ngain ciudad de Damasco.

⁹Are joiji na Damasco, Saulo viconha ngoixin ní nchanho, co ngoixin nchanho mé ẍonhi joine ni ẍonhi vihi.

¹⁰Co ngain Damasco vehe ná xí vinhi Ananías co xí mé vaguitticaon xa Jesús. Co jehe xí mé cononxinhi xa Jesús, co Jesús ndac̈ho: ―¡Ananías! Co jehe ndac̈ho: ―Nttihi rrihi. ¿Quehe rinao, soixin?

¹¹Cottimeja Jesús ndac̈ho: ―Dingattjen co sattji ngain tti nttiha dinhi Nao. Co are saso ngain nchiandoha Judas, danchiangui de ixin ná xí que joixin Tarso, dinhi Saulo. Co xí mé jinchecoanxinna xa janha jaxon.

¹²Co jehe xa cononxinhi xa co vicon xa ná xí dinhi Ananías jitonchienhe ngain xa co ttín rá ngataha já xa para nchao rrocjan xa sicon xa.

¹³Are Ananías coinhi cain yá, ndac̈ho: ―Soixin, tsje chojni ndachjenji na de ixin xí yá co de ixin cainxin cosa jianha que joinchehe xa ngain chojni que ditticaon soixin ngain ciudad de Jerusalén.

¹⁴Co jai joí xa nttihi conixin joachaxín xidána que ttetonha ngain icha xidána para rrotse xa cain chojni nttihi que nichja jian de ixin soixin.

¹⁵Pero Jesús ndac̈ho ngain: ―Sattji ixin janha coinchiá xí mé para rronichja xa de ixin janha ngain chojni de icha nación co ngain cain rey de cain nación co ngain chojni Israel cai.

¹⁶Janha tsjagoa xa cain cosa tangui que chonda que tsonhe xa ixin jehe xa sitticaon na xa janha.

¹⁷Cottimeja Ananías sacjoi para ngain nchia tti vehe Saulo. Co are jehe joixinhi nchia mé, jehe coín rá ngataha já Saulo, co ndac̈ho ngain: ―Hermano Saulo, Jesús, tti chonda cain joachaxin, tti nichjaha jaha ngatja nttiha, mé tti coetonna para joihi nttihi para que jaha nchao sicon iná co para que Espíritu Santo tsí nganji jaha conixin tsje joachaxin.

¹⁸Co rato mé vinttjixin de ngain jmacon Saulo nchin cosa inchin jochochjenhe copescado, co Saulo onchao vicon iná. Cottimeja Saulo vingattjen co joiguitte.

¹⁹Cottimeja joine co cjan vechonda fuerza iná. Co nttiha vehe ngain ciudad de Damasco canxion nchanho ngain chojni que vaguitticaon Jesús nttiha.

²⁰Saulo toin coexinhi nichja ngain cain ningoe chojni judío co ndac̈ho ixin Jesús ján tti Xenhe Dios.

²¹Cain chojni que vaquinhi tti vandac̈ho Saulo vagoan na admirado, co vandac̈ho na: ―¿Ajeha xí jihi tti vanchehe feo ngain chojni ngain ciudad de Jerusalén que vaguitticaon Jesús? Co ¿ajeha xí jihi tti joí nttihi cai para ixin rrotse xa cain chojni que ditticaon Jesús co para ixin sasicao xa na para sinchechienhe xa na ngain xidána que ttetonha ngain icha xidána?

²²Pero Saulo icha vaẍaonha para vanichja, co cjoagoe na conixin tti ẍón que jitaxin Palabré Dios que ixin Jesús jehe tti Cristo, hasta chojni judío que vintte ciudad de Damasco vinttegoan na admirado ixin Saulo oditticaon ngain Cristo.

²³Cottimeja vatto tsje nchanho, co chojni judío vinttendache chó na para rrogoen na Saulo.

²⁴Pero Saulo conohe que cjoao chó na ixin rrogoen na co ixin nchanho co ttie vachonhe na Saulo ngain cain lugar tti dac̈hjexin chojni de ngain ciudad ixin rrogoen na.