Vinara 11:5-27

⁵Mu lohoka vona pali a maka maki e BAKOVI DAGI i rata ge tuhori mua na malala golea, na tahuna i uka ma mu bele vona ma a hini si made vona ngane.

⁶Mu luhoi a maka maki i rata ne Datan rua e Abiram, re tune Eliab bakovi, ra hamone Reuben. Mua lobo mu masia a malala i mata ka, lakea rua varago turana a kabu, a kape, a maka maki lobo ne rua, ri boru dili na lovo, lakea a malala i kavitagu ria.

⁷Muholi hateka, mua kunana mu matai a maka maki dagi a Vure i rata.

⁸“Mu ramai a maka vinara a habi ne mua ngane, lakea bara mu gao, mu tulu poloa a naru iea, mu bolea a malala ra ta mu gu bolea ngane,

⁹lakea bara mu made tabaka vona a malala i vona a maki ni kani, ra robo e BAKOVI DAGI i ta muholi vona ge habia ne huriki a gare ne mua, ne mua e huriki a hamone ria.

¹⁰Ra robo ngane mu gu bolea, i uka ma i manga a robo mu made vona hosi. Na tahuna mu ngaru ni varo a hamona maki ni kani o Egipto, mu leho hateka ni kiru a naru, mu bole lakea na hania ni gi vakamea a malala vona.

¹¹Pali ra robo ngane ta mu gu vano mu gu bolea, a robo na maka lolo, na maloku, a vala i boru langa na malala.

¹²E BAKOVI DAGI a Vure ne hita, i lohoka kamumu vona a malala iea, i matakari vakaroroa na keva lobo na pida.

¹³“I mavonga mu ramai lobo a vinara a habi ne mua mona: mu ngaru hatekea e BAKOVI DAGI a Vure ne hita, mu habi a hatene mua, a niluhoi ne mua, mu rata a leho vona.

¹⁴Mua bara mu rata mavonga, bara vakaborua a vala i boru langa na maka hania, na matatalanga i lakea na matadilinga, bara mu maru na maki ni kani, na vain, na namona oliv.

¹⁵I uka ma mu gu bala vona tara maki. A maka bulmakau ne mua bara ri tahoka a maka varili ni kani.

¹⁶“Naha ni matataro e huriki a kabu ranga ri gi vakaviliha a niluhoi ne mua. Ria bara ri vakaviliha a niluhoi ne mua, bara mu ngalahere ne BAKOVI DAGI, mu kavurike a maka vure ranga, mu rata a leho ne ria.

¹⁷Mua bara mu ramaia a naro iea, e BAKOVI DAGI bara i tahate mua, i tukaria a hunu, a vala i uka ma ge boru ge vakamea a malala. Muri a maka uve i uka ma ri gi rike kamumu. I uka ma ge tabaka bara mu mate vona a robo kamumu e BAKOVI DAGI i habia ne mua.

¹⁸“Mu ru dili na hatene mua, na niluhoi ne mua a vinara nga. Mu kolotata puru na limane mua, mu ru na dumene mua, ge manga a kilakila i uka ma mu gu longokaburungi.

¹⁹Mu tovo e huriki e tune mua vona a vinara nga. Mu vakalongo ria vona na tahuna mu made na tanga, na tahuna mu laho, na tahuna mu malo, na tahuna mu hadongo.

²⁰Mu here a vinara nga na dahana logo na ruma ne mua, na poridala ne mua.

²¹Mua bara mu rata mavonga, mua turane huriki e tune mua bara mu made tabaka hateka vona a robo e BAKOVI DAGI a Vure ne hita i ta muholi vona ge habia ne huriki a gare ne mua hosi. Bara mu made vakaroro vona, i manga a hunu i tabuli vakaroro polomeli na malala.

²²“Mu ramai kamumu a ngava lobo a taki mua vona pali. Mu ngaru hatekea e BAKOVI DAGI a Vure ne hita, mu ramai loboa a maka ngava vona, mu tangotata tora vona.

²³I mavonga bara i lili tala e huriki a tara ranga, na tahuna mu lokovonga tabukoi. Muri bara mu made vona a malala ne huriki a tara dagi ri gao hateka ne mua.

²⁴A malala mu laho vona, bara mu bolea a malala ne mua. A nagi na malala ne mua ge vakatubu na tabeke i ngeki na tabeke mule puru, i lakea mai a lolo e Lebanon na tabeke mule sike. A nagi bara i vakatubu na naru e Iupretis na tabeke na nirikena haro, i lakea mai a Dari na Kurukuruna Malala na tabeke na nirolona haro.

²⁵I uka tara viri ge putukari a dala ne mua. Na tabeke lobo na malala mu lakea vona, e BAKOVI DAGI a Vure ne hita, bara i rata e huriki a bakovi a ngatavine ri mangenge ne mua, i manga a ngava i taki.

²⁶“Iau a vakasiri mua na dala i rua bara mu ramai. A dala muga a Vure bara i gamai mua. A dala tara a Vure bara i ruduraha mua.

²⁷Mua bara mu longototo a maka vinara ne BAKOVI DAGI a Vure ne hita, ra i habi mua mona, a Vure bara i gamai mua.